完整巴利原文 · 稳定分页 当前仅加载第 30 阅读页；保留 Bilara 原生段落标识，每页最多 120 段。
Saṁyutta Nikāya 45.30
sn45.30:0.13. Micchattavagga
sn45.30:0.2Uttiyasutta
sn45.30:0.3Sāvatthinidānaṁ.
sn45.30:1.1Atha kho āyasmā uttiyo yena bhagavā tenupasaṅkami …pe… ekamantaṁ nisinno kho āyasmā uttiyo bhagavantaṁ etadavoca:
sn45.30:1.2“idha mayhaṁ, bhante, rahogatassa paṭisallīnassa evaṁ cetaso parivitakko udapādi:
sn45.30:1.3‘pañca kāmaguṇā vuttā bhagavatā.
sn45.30:1.4Katame nu kho pañca kāmaguṇā vuttā bhagavatā’”ti?
sn45.30:1.5“Sādhu sādhu, uttiya.
sn45.30:1.6Pañcime kho, uttiya, kāmaguṇā vuttā mayā.
sn45.30:1.7Katame pañca?
sn45.30:1.8Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,
sn45.30:1.9sotaviññeyyā saddā …pe…
sn45.30:1.10ghānaviññeyyā gandhā …pe…
sn45.30:1.11jivhāviññeyyā rasā …pe…
sn45.30:1.12kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā—
sn45.30:1.13ime kho, uttiya, pañca kāmaguṇā vuttā mayā.
sn45.30:1.14Imesaṁ kho, uttiya, pañcannaṁ kāmaguṇānaṁ pahānāya ariyo aṭṭhaṅgiko maggo bhāvetabbo.
sn45.30:1.15Katamo ariyo aṭṭhaṅgiko maggo?
sn45.30:1.16Seyyathidaṁ—sammādiṭṭhi …pe… sammāsamādhi.
sn45.30:1.17Imesaṁ kho, uttiya, pañcannaṁ kāmaguṇānaṁ pahānāya ayaṁ ariyo aṭṭhaṅgiko maggo bhāvetabbo”ti.
sn45.30:1.18Dasamaṁ.
sn45.30:1.19Micchattavaggo tatiyo.
sn45.30:1.20Tassuddānaṁ
sn45.30:2.0Micchattaṁ akusalaṁ dhammaṁ,
sn45.30:2.1Duve paṭipadāpi ca;
sn45.30:2.2Asappurisena dve kumbho,
sn45.30:2.3Samādhi vedanuttiyenāti.
sn45.30:2.4