相应部第 45 相应

Saṁyutta Nikāya 45.48

5. Aññatitthiyapeyyālavagga

Anupādāparinibbānasutta

Sāvatthinidānaṁ.

“Sace vo, bhikkhave, aññatitthiyā paribbājakā evaṁ puccheyyuṁ:

‘kimatthiyaṁ, āvuso, samaṇe gotame brahmacariyaṁ vussatī’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:

‘anupādāparinibbānatthaṁ kho, āvuso, bhagavati brahmacariyaṁ vussatī’ti.

Sace pana vo, bhikkhave, aññatitthiyā paribbājakā evaṁ puccheyyuṁ:

‘atthi panāvuso, maggo, atthi paṭipadā anupādāparinibbānāyā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:

‘atthi kho, āvuso, maggo, atthi paṭipadā anupādāparinibbānāyā’ti.

Katamo ca, bhikkhave, maggo, katamā ca paṭipadā anupādāparinibbānāya?

Ayameva ariyo aṭṭhaṅgiko maggo, seyyathidaṁ—

sammādiṭṭhi …pe… sammāsamādhi.

Ayaṁ, bhikkhave, maggo, ayaṁ paṭipadā anupādāparinibbānāyāti.

Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyāthā”ti.

Aṭṭhamaṁ.

Aññatitthiyapeyyālaṁ.

Tassuddānaṁ

Virāgasaṁyojanaṁ anusayaṁ,

Addhānaṁ āsavā khayā;

Vijjāvimuttiñāṇañca,

Anupādāya aṭṭhamī.