相应部第 7 相应

Saṁyutta Nikāya 7.12

2. Upāsakavagga

Udayasutta

Sāvatthinidānaṁ.

Atha kho bhagavā pubbaṇhasamayaṁ nivāsetvā pattacīvaramādāya yena udayassa brāhmaṇassa nivesanaṁ tenupasaṅkami.

Atha kho udayo brāhmaṇo bhagavato pattaṁ odanena pūresi.

Dutiyampi kho bhagavā pubbaṇhasamayaṁ nivāsetvā pattacīvaramādāya yena udayassa brāhmaṇassa nivesanaṁ tenupasaṅkami …pe…

tatiyampi kho udayo brāhmaṇo bhagavato pattaṁ odanena pūretvā bhagavantaṁ etadavoca:

“pakaṭṭhakoyaṁ samaṇo gotamo punappunaṁ āgacchatī”ti.

“Punappunañceva vapanti bījaṁ,

Punappunaṁ vassati devarājā;

Punappunaṁ khettaṁ kasanti kassakā,

Punappunaṁ dhaññamupeti raṭṭhaṁ.

Punappunaṁ yācakā yācayanti,

Punappunaṁ dānapatī dadanti;

Punappunaṁ dānapatī daditvā,

Punappunaṁ saggamupenti ṭhānaṁ.

Punappunaṁ khīranikā duhanti,

Punappunaṁ vaccho upeti mātaraṁ;

Punappunaṁ kilamati phandati ca,

Punappunaṁ gabbhamupeti mando.

Punappunaṁ jāyati mīyati ca,

Punappunaṁ sivathikaṁ haranti;

Maggañca laddhā apunabbhavāya,

Na punappunaṁ jāyati bhūripañño”ti.

Evaṁ vutte, udayo brāhmaṇo bhagavantaṁ etadavoca:

“abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.