相应部第 7 相应

Saṁyutta Nikāya 7.15

2. Upāsakavagga

Mānatthaddhasutta

Sāvatthinidānaṁ.

Tena kho pana samayena mānatthaddho nāma brāhmaṇo sāvatthiyaṁ paṭivasati.

So neva mātaraṁ abhivādeti, na pitaraṁ abhivādeti, na ācariyaṁ abhivādeti, na jeṭṭhabhātaraṁ abhivādeti.

Tena kho pana samayena bhagavā mahatiyā parisāya parivuto dhammaṁ deseti.

Atha kho mānatthaddhassa brāhmaṇassa etadahosi:

“ayaṁ kho samaṇo gotamo mahatiyā parisāya parivuto dhammaṁ deseti.

Yannūnāhaṁ yena samaṇo gotamo tenupasaṅkameyyaṁ.

Sace maṁ samaṇo gotamo ālapissati, ahampi taṁ ālapissāmi.

No ce maṁ samaṇo gotamo ālapissati, ahampi nālapissāmī”ti.

Atha kho mānatthaddho brāhmaṇo yena bhagavā tenupasaṅkami; upasaṅkamitvā tuṇhībhūto ekamantaṁ aṭṭhāsi.

Atha kho bhagavā taṁ nālapi.

Atha kho mānatthaddho brāhmaṇo:

“nāyaṁ samaṇo gotamo kiñci jānātī”ti tatova puna nivattitukāmo ahosi.

Atha kho bhagavā mānatthaddhassa brāhmaṇassa cetasā cetoparivitakkamaññāya mānatthaddhaṁ brāhmaṇaṁ gāthāya ajjhabhāsi:

“Na mānaṁ brāhmaṇa sādhu,

atthikassīdha brāhmaṇa;

Yena atthena āgacchi,

tamevamanubrūhaye”ti.

Atha kho mānatthaddho brāhmaṇo:

“cittaṁ me samaṇo gotamo jānātī”ti tattheva bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati, nāmañca sāveti:

“mānatthaddhāhaṁ, bho gotama, mānatthaddhāhaṁ, bho gotamā”ti.

Atha kho sā parisā abbhutavittajātā ahosi:

“acchariyaṁ vata bho, abbhutaṁ vata bho.

Ayañhi mānatthaddho brāhmaṇo neva mātaraṁ abhivādeti, na pitaraṁ abhivādeti, na ācariyaṁ abhivādeti, na jeṭṭhabhātaraṁ abhivādeti;

atha ca pana samaṇe gotame evarūpaṁ paramanipaccakāraṁ karotī”ti.

Atha kho bhagavā mānatthaddhaṁ brāhmaṇaṁ etadavoca:

“alaṁ, brāhmaṇa, uṭṭhehi, sake āsane nisīda.

Yato te mayi cittaṁ pasannan”ti.

Atha kho mānatthaddho brāhmaṇo sake āsane nisīditvā bhagavantaṁ gāthāya ajjhabhāsi:

“Kesu na mānaṁ kayirātha,

kesu cassa sagāravo;

Kyassa apacitā assu,

kyassu sādhu supūjitā”ti.

“Mātari pitari cāpi,

atho jeṭṭhamhi bhātari;

Ācariye catutthamhi,

tesu na mānaṁ kayirātha;

Tesu assa sagāravo,

tyassa apacitā assu;

Tyassu sādhu supūjitā.

Arahante sītībhūte,

katakicce anāsave;

Nihacca mānaṁ athaddho,

te namasse anuttare”ti.

Evaṁ vutte, mānatthaddho brāhmaṇo bhagavantaṁ etadavoca:

“abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.