相应部第 7 相应

Saṁyutta Nikāya 7.19

2. Upāsakavagga

Mātuposakasutta

Sāvatthinidānaṁ.

Atha kho mātuposako brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho mātuposako brāhmaṇo bhagavantaṁ etadavoca:

“ahañhi, bho gotama, dhammena bhikkhaṁ pariyesāmi, dhammena bhikkhaṁ pariyesitvā mātāpitaro posemi.

Kaccāhaṁ, bho gotama, evaṅkārī kiccakārī homī”ti?

“Taggha tvaṁ, brāhmaṇa, evaṅkārī kiccakārī hosi.

Yo kho, brāhmaṇa, dhammena bhikkhaṁ pariyesati, dhammena bhikkhaṁ pariyesitvā mātāpitaro poseti, bahuṁ so puññaṁ pasavatīti.

Yo mātaraṁ pitaraṁ vā,

macco dhammena posati;

Tāya naṁ pāricariyāya,

mātāpitūsu paṇḍitā;

Idheva naṁ pasaṁsanti,

pecca sagge pamodatī”ti.

Evaṁ vutte, mātuposako brāhmaṇo bhagavantaṁ etadavoca:

“abhikkantaṁ, bho gotama, abhikkantaṁ, bho gotama …pe…

upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.