完整巴利原文 · 稳定分页 当前仅加载第 3 阅读页；保留 Bilara 原生段落标识，每页最多 120 段。
Saṁyutta Nikāya 16.3
sn16.3:0.11. Kassapavagga
sn16.3:0.2Candūpamāsutta
sn16.3:0.3Sāvatthiyaṁ viharati.
sn16.3:1.1“Candūpamā, bhikkhave, kulāni upasaṅkamatha—
sn16.3:1.2apakasseva kāyaṁ, apakassa cittaṁ, niccanavakā kulesu appagabbhā.
sn16.3:1.3Seyyathāpi, bhikkhave, puriso jarudapānaṁ vā olokeyya pabbatavisamaṁ vā nadīviduggaṁ vā—
sn16.3:1.4apakasseva kāyaṁ, apakassa cittaṁ;
sn16.3:1.5evameva kho, bhikkhave, candūpamā kulāni upasaṅkamatha—
sn16.3:1.6apakasseva kāyaṁ, apakassa cittaṁ, niccanavakā kulesu appagabbhā.
sn16.3:1.7Kassapo, bhikkhave, candūpamo kulāni upasaṅkamati—
sn16.3:2.1apakasseva kāyaṁ, apakassa cittaṁ, niccanavako kulesu appagabbho.
sn16.3:2.2Taṁ kiṁ maññatha, bhikkhave,
sn16.3:2.3kathaṁrūpo bhikkhu arahati kulāni upasaṅkamitun”ti?
sn16.3:2.4“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
sn16.3:2.5Atha kho bhagavā ākāse pāṇiṁ cālesi.
sn16.3:3.1“Seyyathāpi, bhikkhave, ayaṁ ākāse pāṇi na sajjati na gayhati na bajjhati;
sn16.3:3.2evameva kho, bhikkhave, yassa kassaci bhikkhuno kulāni upasaṅkamato kulesu cittaṁ na sajjati na gayhati na bajjhati:
sn16.3:3.3‘labhantu lābhakāmā, puññakāmā karontu puññānī’ti;
sn16.3:3.4yathāsakena lābhena attamano hoti sumano, evaṁ paresaṁ lābhena attamano hoti sumano;
sn16.3:3.5evarūpo kho, bhikkhave, bhikkhu arahati kulāni upasaṅkamituṁ.
sn16.3:3.6Kassapassa, bhikkhave, kulāni upasaṅkamato kulesu cittaṁ na sajjati na gayhati na bajjhati:
sn16.3:4.1‘labhantu lābhakāmā, puññakāmā karontu puññānī’ti;
sn16.3:4.2yathāsakena lābhena attamano hoti sumano;
sn16.3:4.3evaṁ paresaṁ lābhena attamano hoti sumano.
sn16.3:4.4Taṁ kiṁ maññatha, bhikkhave,
sn16.3:5.1kathaṁrūpassa bhikkhuno aparisuddhā dhammadesanā hoti, kathaṁrūpassa bhikkhuno parisuddhā dhammadesanā hotī”ti?
sn16.3:5.2“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.
sn16.3:5.3“Tena hi, bhikkhave, suṇātha, sādhukaṁ manasi karotha, bhāsissāmī”ti.
sn16.3:5.4“Evaṁ, bhante”ti kho te bhikkhū bhagavato paccassosuṁ.
sn16.3:5.5Bhagavā etadavoca:
sn16.3:5.6“Yo hi koci, bhikkhave, bhikkhu evaṁcitto paresaṁ dhammaṁ deseti:
sn16.3:6.1‘aho vata me dhammaṁ suṇeyyuṁ, sutvā ca pana dhammaṁ pasīdeyyuṁ, pasannā ca me pasannākāraṁ kareyyun’ti;
sn16.3:6.2evarūpassa kho, bhikkhave, bhikkhuno aparisuddhā dhammadesanā hoti.
sn16.3:6.3Yo ca kho, bhikkhave, bhikkhu evaṁcitto paresaṁ dhammaṁ deseti:
sn16.3:7.1‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhīti.
sn16.3:7.2Aho vata me dhammaṁ suṇeyyuṁ, sutvā ca pana dhammaṁ ājāneyyuṁ, ājānitvā ca pana tathattāya paṭipajjeyyun’ti.
sn16.3:7.3Iti dhammasudhammataṁ paṭicca paresaṁ dhammaṁ deseti, kāruññaṁ paṭicca anuddayaṁ paṭicca anukampaṁ upādāya paresaṁ dhammaṁ deseti.
sn16.3:7.4Evarūpassa kho, bhikkhave, bhikkhuno parisuddhā dhammadesanā hoti.
sn16.3:7.5Kassapo, bhikkhave, evaṁcitto paresaṁ dhammaṁ deseti:
sn16.3:8.1‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhīti.
sn16.3:8.2Aho vata me dhammaṁ suṇeyyuṁ, sutvā ca pana dhammaṁ ājāneyyuṁ, ājānitvā ca pana tathattāya paṭipajjeyyun’ti.
sn16.3:8.3Iti dhammasudhammataṁ paṭicca paresaṁ dhammaṁ deseti, kāruññaṁ paṭicca anuddayaṁ paṭicca anukampaṁ upādāya paresaṁ dhammaṁ deseti.
sn16.3:8.4Kassapena vā hi vo, bhikkhave, ovadissāmi yo vā panassa kassapasadiso, ovaditehi ca pana vo tathattāya paṭipajjitabban”ti.
sn16.3:8.5Tatiyaṁ.
sn16.3:8.6