完整巴利原文 · 稳定分页 当前仅加载第 5 阅读页；保留 Bilara 原生段落标识，每页最多 120 段。
Saṁyutta Nikāya 16.5
sn16.5:0.11. Kassapavagga
sn16.5:0.2Jiṇṇasutta
sn16.5:0.3Evaṁ me sutaṁ …
sn16.5:1.1rājagahe veḷuvane.
sn16.5:1.2Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ mahākassapaṁ bhagavā etadavoca:
sn16.5:1.3“jiṇṇosi dāni tvaṁ, kassapa, garukāni ca te imāni sāṇāni paṁsukūlāni nibbasanāni.
sn16.5:1.4Tasmātiha tvaṁ, kassapa, gahapatāni ceva cīvarāni dhārehi, nimantanāni ca bhuñjāhi, mama ca santike viharāhī”ti.
sn16.5:1.5“Ahaṁ kho, bhante, dīgharattaṁ āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṁsukūliko ceva paṁsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṁsaṭṭho ceva asaṁsaggassa ca vaṇṇavādī, āraddhavīriyo ceva vīriyārambhassa ca vaṇṇavādī”ti.
sn16.5:2.1“Kiṁ pana tvaṁ, kassapa, atthavasaṁ sampassamāno dīgharattaṁ āraññiko ceva āraññikattassa ca vaṇṇavādī, piṇḍapātiko ceva …pe…
sn16.5:3.1paṁsukūliko ceva …
sn16.5:3.2tecīvariko ceva …
sn16.5:3.3appiccho ceva …
sn16.5:3.4santuṭṭho ceva …
sn16.5:3.5pavivitto ceva …
sn16.5:3.6asaṁsaṭṭho ceva …
sn16.5:3.7āraddhavīriyo ceva vīriyārambhassa ca vaṇṇavādī”ti?
sn16.5:3.8“Dve khvāhaṁ, bhante, atthavase sampassamāno dīgharattaṁ āraññiko ceva āraññikattassa ca vaṇṇavādī, piṇḍapātiko ceva …pe…
sn16.5:4.1paṁsukūliko ceva …
sn16.5:4.2tecīvariko ceva …
sn16.5:4.3appiccho ceva …
sn16.5:4.4santuṭṭho ceva …
sn16.5:4.5pavivitto ceva …
sn16.5:4.6asaṁsaṭṭho ceva …
sn16.5:4.7āraddhavīriyo ceva vīriyārambhassa ca vaṇṇavādī.
sn16.5:4.8Attano ca diṭṭhadhammasukhavihāraṁ sampassamāno, pacchimañca janataṁ anukampamāno:
sn16.5:5.1‘appeva nāma pacchimā janatā diṭṭhānugatiṁ āpajjeyyuṁ.
sn16.5:5.2Ye kira te ahesuṁ buddhānubuddhasāvakā te dīgharattaṁ āraññikā ceva ahesuṁ āraññikattassa ca vaṇṇavādino …pe…
sn16.5:5.3piṇḍapātikā ceva ahesuṁ …pe…
sn16.5:5.4paṁsukūlikā ceva ahesuṁ …
sn16.5:5.5tecīvarikā ceva ahesuṁ …
sn16.5:5.6appicchā ceva ahesuṁ …
sn16.5:5.7santuṭṭhā ceva ahesuṁ …
sn16.5:5.8pavivittā ceva ahesuṁ …
sn16.5:5.9asaṁsaṭṭhā ceva ahesuṁ …
sn16.5:5.10āraddhavīriyā ceva ahesuṁ vīriyārambhassa ca vaṇṇavādino’ti.
sn16.5:5.11Te tathattāya paṭipajjissanti, tesaṁ taṁ bhavissati dīgharattaṁ hitāya sukhāya.
sn16.5:5.12Ime khvāhaṁ, bhante, dve atthavase sampassamāno dīgharattaṁ āraññiko ceva āraññikattassa ca vaṇṇavādī, piṇḍapātiko ceva …pe…
sn16.5:6.1paṁsukūliko ceva …
sn16.5:6.2tecīvariko ceva …
sn16.5:6.3appiccho ceva …
sn16.5:6.4santuṭṭho ceva …
sn16.5:6.5pavivitto ceva …
sn16.5:6.6asaṁsaṭṭho ceva …
sn16.5:6.7āraddhavīriyo ceva vīriyārambhassa ca vaṇṇavādī”ti.
sn16.5:6.8“Sādhu sādhu, kassapa.
sn16.5:7.1Bahujanahitāya kira tvaṁ, kassapa, paṭipanno bahujanasukhāya lokānukampāya atthāya hitāya sukhāya devamanussānaṁ.
sn16.5:7.2Tasmātiha tvaṁ, kassapa, sāṇāni ceva paṁsukūlāni dhārehi nibbasanāni, piṇḍāya ca carāhi, araññe ca viharāhī”ti.
sn16.5:7.3Pañcamaṁ.
sn16.5:7.4