完整巴利原文 · 稳定分页 当前仅加载第 7 阅读页；保留 Bilara 原生段落标识，每页最多 120 段。
Saṁyutta Nikāya 16.7
sn16.7:0.11. Kassapavagga
sn16.7:0.2Dutiyaovādasutta
sn16.7:0.3Rājagahe viharati veḷuvane.
sn16.7:1.1Atha kho āyasmā mahākassapo yena bhagavā tenupasaṅkami …pe…
sn16.7:1.2ekamantaṁ nisinnaṁ kho āyasmantaṁ mahākassapaṁ bhagavā etadavoca:
sn16.7:1.3“ovada, kassapa, bhikkhū;
sn16.7:1.4karohi, kassapa, bhikkhūnaṁ dhammiṁ kathaṁ.
sn16.7:1.5Ahaṁ vā, kassapa, bhikkhū ovadeyyaṁ tvaṁ vā;
sn16.7:1.6ahaṁ vā bhikkhūnaṁ dhammiṁ kathaṁ kareyyaṁ tvaṁ vā”ti.
sn16.7:1.7“Dubbacā kho, bhante, etarahi bhikkhū, dovacassakaraṇehi dhammehi samannāgatā akkhamā appadakkhiṇaggāhino anusāsaniṁ.
sn16.7:2.1Yassa kassaci, bhante, saddhā natthi kusalesu dhammesu, hirī natthi kusalesu dhammesu, ottappaṁ natthi kusalesu dhammesu, vīriyaṁ natthi kusalesu dhammesu, paññā natthi kusalesu dhammesu, tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
sn16.7:2.2Seyyathāpi, bhante, kāḷapakkhe candassa yā ratti vā divaso vā āgacchati, hāyateva vaṇṇena, hāyati maṇḍalena, hāyati ābhāya, hāyati ārohapariṇāhena.
sn16.7:3.1Evameva kho, bhante, yassa kassaci saddhā natthi kusalesu dhammesu …pe…
sn16.7:3.2hirī natthi …
sn16.7:3.3ottappaṁ natthi …
sn16.7:3.4vīriyaṁ natthi …
sn16.7:3.5paññā natthi … kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
sn16.7:3.6‘Assaddho purisapuggalo’ti, bhante, parihānametaṁ;
sn16.7:4.1‘ahiriko purisapuggalo’ti, bhante, parihānametaṁ;
sn16.7:4.2‘anottappī purisapuggalo’ti, bhante, parihānametaṁ;
sn16.7:4.3‘kusīto purisapuggalo’ti, bhante, parihānametaṁ;
sn16.7:4.4‘duppañño purisapuggalo’ti, bhante, parihānametaṁ;
sn16.7:4.5‘kodhano purisapuggalo’ti, bhante, parihānametaṁ;
sn16.7:4.6‘upanāhī purisapuggalo’ti, bhante, parihānametaṁ;
sn16.7:4.7‘na santi bhikkhū ovādakā’ti, bhante, parihānametaṁ.
sn16.7:4.8Yassa kassaci, bhante, saddhā atthi kusalesu dhammesu, hirī atthi kusalesu dhammesu, ottappaṁ atthi kusalesu dhammesu, vīriyaṁ atthi kusalesu dhammesu, paññā atthi kusalesu dhammesu, tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
sn16.7:5.1Seyyathāpi, bhante, juṇhapakkhe candassa yā ratti vā divaso vā āgacchati, vaḍḍhateva vaṇṇena, vaḍḍhati maṇḍalena, vaḍḍhati ābhāya, vaḍḍhati ārohapariṇāhena.
sn16.7:6.1Evameva kho, bhante, yassa kassaci saddhā atthi kusalesu dhammesu …
sn16.7:6.2hirī atthi …pe…
sn16.7:6.3ottappaṁ atthi …
sn16.7:6.4vīriyaṁ atthi …
sn16.7:6.5paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
sn16.7:6.6‘Saddho purisapuggalo’ti, bhante, aparihānametaṁ;
sn16.7:7.1‘hirimā purisapuggalo’ti, bhante, aparihānametaṁ;
sn16.7:7.2‘ottappī purisapuggalo’ti, bhante, aparihānametaṁ;
sn16.7:7.3‘āraddhavīriyo purisapuggalo’ti, bhante, aparihānametaṁ;
sn16.7:7.4‘paññavā purisapuggalo’ti, bhante, aparihānametaṁ;
sn16.7:7.5‘akkodhano purisapuggalo’ti, bhante, aparihānametaṁ;
sn16.7:7.6‘anupanāhī purisapuggalo’ti, bhante, aparihānametaṁ;
sn16.7:7.7‘santi bhikkhū ovādakā’ti, bhante, aparihānametan”ti.
sn16.7:7.8“Sādhu sādhu, kassapa.
sn16.7:8.1Yassa kassaci, kassapa, saddhā natthi kusalesu dhammesu …pe…
sn16.7:8.2hirī natthi …
sn16.7:8.3ottappaṁ natthi …
sn16.7:8.4vīriyaṁ natthi …
sn16.7:8.5paññā natthi kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
sn16.7:8.6Seyyathāpi, kassapa, kāḷapakkhe candassa yā ratti vā divaso vā āgacchati, hāyateva vaṇṇena …pe…
sn16.7:9.1hāyati ārohapariṇāhena.
sn16.7:9.2Evameva kho, kassapa, yassa kassaci saddhā natthi kusalesu dhammesu …pe…
sn16.7:9.3hirī natthi …
sn16.7:9.4ottappaṁ natthi …
sn16.7:9.5vīriyaṁ natthi …
sn16.7:9.6paññā natthi kusalesu dhammesu tassa yā ratti vā divaso vā āgacchati, hāniyeva pāṭikaṅkhā kusalesu dhammesu, no vuddhi.
sn16.7:9.7‘Assaddho purisapuggalo’ti, kassapa, parihānametaṁ;
sn16.7:9.8ahiriko …pe…
sn16.7:9.9anottappī …
sn16.7:9.10kusīto …
sn16.7:9.11duppañño …
sn16.7:9.12kodhano …
sn16.7:9.13‘upanāhī purisapuggalo’ti, kassapa, parihānametaṁ;
sn16.7:9.14‘na santi bhikkhū ovādakā’ti, kassapa, parihānametaṁ.
sn16.7:9.15Yassa kassaci, kassapa, saddhā atthi kusalesu dhammesu …pe…
sn16.7:10.1hirī atthi …
sn16.7:10.2ottappaṁ atthi …
sn16.7:10.3vīriyaṁ atthi …
sn16.7:10.4paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
sn16.7:10.5Seyyathāpi, kassapa, juṇhapakkhe candassa yā ratti vā divaso vā āgacchati, vaḍḍhateva vaṇṇena, vaḍḍhati maṇḍalena, vaḍḍhati ābhāya, vaḍḍhati ārohapariṇāhena.
sn16.7:11.1Evameva kho, kassapa, yassa kassaci saddhā atthi kusalesu dhammesu hirī atthi …
sn16.7:11.2ottappaṁ atthi …
sn16.7:11.3vīriyaṁ atthi …
sn16.7:11.4paññā atthi kusalesu dhammesu tassa yā ratti vā divaso vā āgacchati, vuddhiyeva pāṭikaṅkhā kusalesu dhammesu, no parihāni.
sn16.7:11.5‘Saddho purisapuggalo’ti, kassapa, aparihānametaṁ;
sn16.7:12.1hirimā …pe…
sn16.7:12.2ottappī …
sn16.7:12.3āraddhavīriyo …
sn16.7:12.4paññavā …
sn16.7:12.5akkodhano …
sn16.7:12.6‘anupanāhī purisapuggalo’ti, kassapa, aparihānametaṁ;
sn16.7:12.7‘santi bhikkhū ovādakā’ti, kassapa, aparihānametan”ti.
sn16.7:12.8Sattamaṁ.
sn16.7:12.9