完整巴利原文 · 稳定分页 当前仅加载第 7 阅读页；保留 Bilara 原生段落标识，每页最多 120 段。
Saṁyutta Nikāya 20.7
sn20.7:0.11. Opammavagga
sn20.7:0.2Āṇisutta
sn20.7:0.3Sāvatthiyaṁ viharati.
sn20.7:1.1“Bhūtapubbaṁ, bhikkhave, dasārahānaṁ ānako nāma mudiṅgo ahosi.
sn20.7:1.2Tassa dasārahā ānake ghaṭite aññaṁ āṇiṁ odahiṁsu.
sn20.7:1.3Ahu kho so, bhikkhave, samayo yaṁ ānakassa mudiṅgassa porāṇaṁ pokkharaphalakaṁ antaradhāyi.
sn20.7:1.4Āṇisaṅghāṭova avasissi.
sn20.7:1.5Evameva kho, bhikkhave, bhavissanti bhikkhū anāgatamaddhānaṁ, ye te suttantā tathāgatabhāsitā gambhīrā gambhīratthā lokuttarā suññatappaṭisaṁyuttā, tesu bhaññamānesu na sussūsissanti na sotaṁ odahissanti na aññā cittaṁ upaṭṭhāpessanti na ca te dhamme uggahetabbaṁ pariyāpuṇitabbaṁ maññissanti.
sn20.7:1.6Ye pana te suttantā kavikatā kāveyyā cittakkharā cittabyañjanā bāhirakā sāvakabhāsitā, tesu bhaññamānesu sussūsissanti, sotaṁ odahissanti, aññā cittaṁ upaṭṭhāpessanti, te ca dhamme uggahetabbaṁ pariyāpuṇitabbaṁ maññissanti.
sn20.7:2.1Evametesaṁ, bhikkhave, suttantānaṁ tathāgatabhāsitānaṁ gambhīrānaṁ gambhīratthānaṁ lokuttarānaṁ suññatappaṭisaṁyuttānaṁ antaradhānaṁ bhavissati.
sn20.7:2.2Tasmātiha, bhikkhave, evaṁ sikkhitabbaṁ:
sn20.7:2.3‘ye te suttantā tathāgatabhāsitā gambhīrā gambhīratthā lokuttarā suññatappaṭisaṁyuttā, tesu bhaññamānesu sussūsissāma, sotaṁ odahissāma, aññā cittaṁ upaṭṭhāpessāma, te ca dhamme uggahetabbaṁ pariyāpuṇitabbaṁ maññissāmā’ti.
sn20.7:2.4Evañhi vo, bhikkhave, sikkhitabban”ti.
sn20.7:2.5Sattamaṁ.
sn20.7:2.6