完整巴利原文 · 稳定分页 当前仅加载第 9 阅读页；保留 Bilara 原生段落标识，每页最多 120 段。
Saṁyutta Nikāya 20.9
sn20.9:0.11. Opammavagga
sn20.9:0.2Nāgasutta
sn20.9:0.3Evaṁ me sutaṁ—
sn20.9:1.1ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
sn20.9:1.2Tena kho pana samayena aññataro navo bhikkhu ativelaṁ kulāni upasaṅkamati.
sn20.9:1.3Tamenaṁ bhikkhū evamāhaṁsu:
sn20.9:1.4“māyasmā ativelaṁ kulāni upasaṅkamī”ti.
sn20.9:1.5So bhikkhu bhikkhūhi vuccamāno evamāha:
sn20.9:1.6“ime hi nāma therā bhikkhū kulāni upasaṅkamitabbaṁ maññissanti, kimaṅgaṁ panāhan”ti?
sn20.9:1.7Atha kho sambahulā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
sn20.9:2.1“idha, bhante, aññataro navo bhikkhu ativelaṁ kulāni upasaṅkamati.
sn20.9:2.2Tamenaṁ bhikkhū evamāhaṁsu:
sn20.9:2.3‘māyasmā ativelaṁ kulāni upasaṅkamī’ti.
sn20.9:2.4So bhikkhu bhikkhūhi vuccamāno evamāha:
sn20.9:2.5‘ime hi nāma therā bhikkhū kulāni upasaṅkamitabbaṁ maññissanti, kimaṅgaṁ panāhan’”ti.
sn20.9:2.6“Bhūtapubbaṁ, bhikkhave, araññāyatane mahāsarasī.
sn20.9:3.1Taṁ nāgā upanissāya viharanti.
sn20.9:3.2Te taṁ sarasiṁ ogāhetvā soṇḍāya bhisamuḷālaṁ abbuhetvā suvikkhālitaṁ vikkhāletvā akaddamaṁ saṅkhāditvā ajjhoharanti.
sn20.9:3.3Tesaṁ taṁ vaṇṇāya ceva hoti balāya ca, na ca tatonidānaṁ maraṇaṁ vā nigacchanti maraṇamattaṁ vā dukkhaṁ.
sn20.9:3.4Tesaṁyeva kho pana, bhikkhave, mahānāgānaṁ anusikkhamānā taruṇā bhiṅkacchāpā taṁ sarasiṁ ogāhetvā soṇḍāya bhisamuḷālaṁ abbuhetvā na suvikkhālitaṁ vikkhāletvā sakaddamaṁ asaṅkhāditvā ajjhoharanti.
sn20.9:3.5Tesaṁ taṁ neva vaṇṇāya hoti na balāya.
sn20.9:3.6Tatonidānaṁ maraṇaṁ vā nigacchanti maraṇamattaṁ vā dukkhaṁ.
sn20.9:3.7Evameva kho, bhikkhave, idha therā bhikkhū pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisanti.
sn20.9:4.1Te tattha dhammaṁ bhāsanti.
sn20.9:4.2Tesaṁ gihī pasannākāraṁ karonti.
sn20.9:4.3Te taṁ lābhaṁ agadhitā amucchitā anajjhopannā ādīnavadassāvino nissaraṇapaññā paribhuñjanti.
sn20.9:4.4Tesaṁ taṁ vaṇṇāya ceva hoti balāya ca, na ca tatonidānaṁ maraṇaṁ vā nigacchanti maraṇamattaṁ vā dukkhaṁ.
sn20.9:4.5Tesaṁyeva kho pana, bhikkhave, therānaṁ bhikkhūnaṁ anusikkhamānā navā bhikkhū pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisanti.
sn20.9:4.6Te tattha dhammaṁ bhāsanti.
sn20.9:4.7Tesaṁ gihī pasannākāraṁ karonti.
sn20.9:4.8Te taṁ lābhaṁ gadhitā mucchitā ajjhopannā anādīnavadassāvino anissaraṇapaññā paribhuñjanti.
sn20.9:4.9Tesaṁ taṁ neva vaṇṇāya hoti na balāya, te tatonidānaṁ maraṇaṁ vā nigacchanti maraṇamattaṁ vā dukkhaṁ.
sn20.9:4.10Tasmātiha, bhikkhave, evaṁ sikkhitabbaṁ:
sn20.9:4.11‘agadhitā amucchitā anajjhopannā ādīnavadassāvino nissaraṇapaññā taṁ lābhaṁ paribhuñjissāmā’ti.
sn20.9:4.12Evañhi vo, bhikkhave, sikkhitabban”ti.
sn20.9:4.13Navamaṁ.
sn20.9:4.14