完整巴利原文 · 稳定分页 当前仅加载第 8 阅读页；保留 Bilara 原生段落标识，每页最多 120 段。
Saṁyutta Nikāya 20.8
sn20.8:0.11. Opammavagga
sn20.8:0.2Kaliṅgarasutta
sn20.8:0.3Evaṁ me sutaṁ—
sn20.8:1.1ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
sn20.8:1.2Tatra kho bhagavā bhikkhū āmantesi:
sn20.8:1.3“bhikkhavo”ti.
sn20.8:1.4“Bhadante”ti te bhikkhū bhagavato paccassosuṁ.
sn20.8:1.5Bhagavā etadavoca:
sn20.8:1.6“Kaliṅgarūpadhānā, bhikkhave, etarahi licchavī viharanti appamattā ātāpino upāsanasmiṁ.
sn20.8:2.1Tesaṁ rājā māgadho ajātasattu vedehiputto na labhati otāraṁ na labhati ārammaṇaṁ.
sn20.8:2.2Bhavissanti, bhikkhave, anāgatamaddhānaṁ licchavī sukhumālā mudutalunahatthapādā
sn20.8:2.3te mudukāsu seyyāsu tūlabibbohanāsu yāvasūriyuggamanā seyyaṁ kappissanti.
sn20.8:2.4Tesaṁ rājā māgadho ajātasattu vedehiputto lacchati otāraṁ lacchati ārammaṇaṁ.
sn20.8:2.5Kaliṅgarūpadhānā, bhikkhave, etarahi bhikkhū viharanti appamattā ātāpino padhānasmiṁ.
sn20.8:3.1Tesaṁ māro pāpimā na labhati otāraṁ na labhati ārammaṇaṁ.
sn20.8:3.2Bhavissanti, bhikkhave, anāgatamaddhānaṁ bhikkhū sukhumā mudutalunahatthapādā.
sn20.8:3.3Te mudukāsu seyyāsu tūlabibbohanāsu yāvasūriyuggamanā seyyaṁ kappissanti.
sn20.8:3.4Tesaṁ māro pāpimā lacchati otāraṁ lacchati ārammaṇaṁ.
sn20.8:3.5Tasmātiha, bhikkhave, evaṁ sikkhitabbaṁ:
sn20.8:3.6‘kaliṅgarūpadhānā viharissāma appamattā ātāpino padhānasmin’ti.
sn20.8:3.7Evañhi vo, bhikkhave, sikkhitabban”ti.
sn20.8:3.8Aṭṭhamaṁ.
sn20.8:3.9