Saṁyutta Nikāya 42 · SN42.2

完整巴利原文 · 稳定分页　当前仅加载第 2 阅读页；保留 Bilara 原生段落标识，每页最多 120 段。

0.1

Saṁyutta Nikāya 42.2

sn42.2:0.1

0.2

1. Gāmaṇivagga

sn42.2:0.2

0.3

Tālapuṭasutta

sn42.2:0.3

1.1

Ekaṁ samayaṁ bhagavā rājagahe viharati veḷuvane kalandakanivāpe.

sn42.2:1.1

1.2

Atha kho tālapuṭo naṭagāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho tālapuṭo naṭagāmaṇi bhagavantaṁ etadavoca:

sn42.2:1.2

1.3

“sutaṁ metaṁ, bhante, pubbakānaṁ ācariyapācariyānaṁ naṭānaṁ bhāsamānānaṁ:

sn42.2:1.3

1.4

‘yo so naṭo raṅgamajjhe samajjamajjhe saccālikena janaṁ hāseti rameti, so kāyassa bhedā paraṁ maraṇā pahāsānaṁ devānaṁ sahabyataṁ upapajjatī’ti.

sn42.2:1.4

1.5

Idha bhagavā kimāhā”ti?

sn42.2:1.5

1.6

“Alaṁ, gāmaṇi, tiṭṭhatetaṁ. Mā maṁ etaṁ pucchī”ti.

sn42.2:1.6

1.7

Dutiyampi kho tālapuṭo naṭagāmaṇi bhagavantaṁ etadavoca:

sn42.2:1.7

1.8

“sutaṁ metaṁ, bhante, pubbakānaṁ ācariyapācariyānaṁ naṭānaṁ bhāsamānānaṁ:

sn42.2:1.8

1.9

‘yo so naṭo raṅgamajjhe samajjamajjhe saccālikena janaṁ hāseti rameti, so kāyassa bhedā paraṁ maraṇā pahāsānaṁ devānaṁ sahabyataṁ upapajjatī’ti.

sn42.2:1.9

1.10

Idha bhagavā kimāhā”ti?

sn42.2:1.10

1.11

“Alaṁ, gāmaṇi, tiṭṭhatetaṁ. Mā maṁ etaṁ pucchī”ti.

sn42.2:1.11

1.12

Tatiyampi kho tālapuṭo naṭagāmaṇi bhagavantaṁ etadavoca:

sn42.2:1.12

1.13

“sutaṁ metaṁ, bhante, pubbakānaṁ ācariyapācariyānaṁ naṭānaṁ bhāsamānānaṁ:

sn42.2:1.13

1.14

‘yo so naṭo raṅgamajjhe samajjamajjhe saccālikena janaṁ hāseti rameti, so kāyassa bhedā paraṁ maraṇā pahāsānaṁ devānaṁ sahabyataṁ upapajjatī’ti.

sn42.2:1.14

1.15

Idha bhagavā kimāhā”ti?

sn42.2:1.15

2.1

“Addhā kho tyāhaṁ, gāmaṇi, na labhāmi:

sn42.2:2.1

2.2

‘alaṁ, gāmaṇi, tiṭṭhatetaṁ,

sn42.2:2.2

2.3

mā maṁ etaṁ pucchī’ti.

sn42.2:2.3

2.4

Api ca tyāhaṁ byākarissāmi.

sn42.2:2.4

2.5

Pubbe kho, gāmaṇi, sattā avītarāgā rāgabandhanabaddhā.

sn42.2:2.5

2.6

Tesaṁ naṭo raṅgamajjhe samajjamajjhe ye dhammā rajanīyā te upasaṁharati bhiyyoso mattāya.

sn42.2:2.6

2.7

Pubbe kho, gāmaṇi, sattā avītadosā dosabandhanabaddhā.

sn42.2:2.7

2.8

Tesaṁ naṭo raṅgamajjhe samajjamajjhe ye dhammā dosanīyā te upasaṁharati bhiyyoso mattāya.

sn42.2:2.8

2.9

Pubbe kho, gāmaṇi, sattā avītamohā mohabandhanabaddhā.

sn42.2:2.9

2.10

Tesaṁ naṭo raṅgamajjhe samajjamajjhe ye dhammā mohanīyā te upasaṁharati bhiyyoso mattāya.

sn42.2:2.10

2.11

So attanā matto pamatto pare madetvā pamādetvā kāyassa bhedā paraṁ maraṇā pahāso nāma nirayo tattha upapajjati.

sn42.2:2.11

2.12

Sace kho panassa evaṁdiṭṭhi hoti:

sn42.2:2.12

2.13

‘yo so naṭo raṅgamajjhe samajjamajjhe saccālikena janaṁ hāseti rameti, so kāyassa bhedā paraṁ maraṇā pahāsānaṁ devānaṁ sahabyataṁ upapajjatī’ti, sāssa hoti micchādiṭṭhi.

sn42.2:2.13

2.14

Micchādiṭṭhikassa kho panāhaṁ, gāmaṇi, purisapuggalassa dvinnaṁ gatīnaṁ aññataraṁ gatiṁ vadāmi—

sn42.2:2.14

2.15

nirayaṁ vā tiracchānayoniṁ vā”ti.

sn42.2:2.15

3.1

Evaṁ vutte, tālapuṭo naṭagāmaṇi parodi assūni pavattesi.

sn42.2:3.1

3.2

“Etaṁ kho tyāhaṁ, gāmaṇi, nālatthaṁ:

sn42.2:3.2

3.3

‘alaṁ, gāmaṇi, tiṭṭhatetaṁ; mā maṁ etaṁ pucchī’”ti.

sn42.2:3.3

3.4

“Nāhaṁ, bhante, etaṁ rodāmi yaṁ maṁ bhagavā evamāha;

sn42.2:3.4

3.5

api cāhaṁ, bhante, pubbakehi ācariyapācariyehi naṭehi dīgharattaṁ nikato vañcito paluddho:

sn42.2:3.5

3.6

‘yo so naṭo raṅgamajjhe samajjamajjhe saccālikena janaṁ hāseti rameti so kāyassa bhedā paraṁ maraṇā pahāsānaṁ devānaṁ sahabyataṁ upapajjatī’”ti.

sn42.2:3.6

3.7

“Abhikkantaṁ, bhante, abhikkantaṁ, bhante.

sn42.2:3.7

3.8

Seyyathāpi, bhante, nikkujjitaṁ vā ukkujjeyya, paṭicchannaṁ vā vivareyya, mūḷhassa vā maggaṁ ācikkheyya, andhakāre vā telapajjotaṁ dhāreyya: ‘cakkhumanto rūpāni dakkhantī’ti; evamevaṁ bhagavatā anekapariyāyena dhammo pakāsito.

sn42.2:3.8

3.9

Esāhaṁ, bhante, bhagavantaṁ saraṇaṁ gacchāmi dhammañca bhikkhusaṅghañca.

sn42.2:3.9

3.10

Labheyyāhaṁ, bhante, bhagavato santike pabbajjaṁ, labheyyaṁ upasampadan”ti.

sn42.2:3.10

3.11

Alattha kho tālapuṭo naṭagāmaṇi bhagavato santike pabbajjaṁ, alattha upasampadaṁ.

sn42.2:3.11

3.12

Acirūpasampanno ca panāyasmā tālapuṭo …pe…

sn42.2:3.12

3.13

arahataṁ ahosīti.

sn42.2:3.13

3.14

Dutiyaṁ.

sn42.2:3.14