完整巴利原文 · 稳定分页 当前仅加载第 5 阅读页；保留 Bilara 原生段落标识，每页最多 120 段。
Saṁyutta Nikāya 42.5
sn42.5:0.11. Gāmaṇivagga
sn42.5:0.2Assārohasutta
sn42.5:0.3Atha kho assāroho gāmaṇi yena bhagavā tenupasaṅkami; upasaṅkamitvā ekamantaṁ nisīdi. Ekamantaṁ nisinno kho assāroho gāmaṇi bhagavantaṁ etadavoca:
sn42.5:1.1“sutaṁ metaṁ, bhante, pubbakānaṁ ācariyapācariyānaṁ assārohānaṁ bhāsamānānaṁ:
sn42.5:1.2‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti.
sn42.5:1.3Idha bhagavā kimāhā”ti?
sn42.5:1.4“Alaṁ, gāmaṇi, tiṭṭhatetaṁ; mā maṁ etaṁ pucchī”ti.
sn42.5:1.5Dutiyampi kho …pe…
sn42.5:2.1tatiyampi kho assāroho gāmaṇi bhagavantaṁ etadavoca:
sn42.5:2.2“sutaṁ metaṁ, bhante, pubbakānaṁ ācariyapācariyānaṁ assārohānaṁ bhāsamānānaṁ:
sn42.5:2.3‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti.
sn42.5:2.4Idha bhagavā kimāhā”ti?
sn42.5:2.5“Addhā kho tyāhaṁ, gāmaṇi, na labhāmi:
sn42.5:3.1‘alaṁ, gāmaṇi, tiṭṭhatetaṁ; mā maṁ etaṁ pucchī’ti.
sn42.5:3.2Api ca kho tyāhaṁ byākarissāmi.
sn42.5:3.3Yo so, gāmaṇi, assāroho saṅgāme ussahati vāyamati tassa taṁ cittaṁ pubbe gahitaṁ dukkaṭaṁ duppaṇihitaṁ:
sn42.5:3.4‘ime sattā haññantu vā bajjhantu vā ucchijjantu vā vinassantu vā mā ahesuṁ iti vā’ti.
sn42.5:3.5Tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajito nāma nirayo tattha upapajjati.
sn42.5:3.6Sace kho panassa evaṁ diṭṭhi hoti:
sn42.5:3.7‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’ti, sāssa hoti micchādiṭṭhi.
sn42.5:3.8Micchādiṭṭhikassa kho panāhaṁ, gāmaṇi, purisapuggalassa dvinnaṁ gatīnaṁ aññataraṁ gatiṁ vadāmi—
sn42.5:3.9nirayaṁ vā tiracchānayoniṁ vā”ti.
sn42.5:3.10Evaṁ vutte, assāroho gāmaṇi parodi, assūni pavattesi.
sn42.5:4.1“Etaṁ kho tyāhaṁ, gāmaṇi, nālatthaṁ:
sn42.5:4.2‘alaṁ, gāmaṇi, tiṭṭhatetaṁ; mā maṁ etaṁ pucchī’”ti.
sn42.5:4.3“Nāhaṁ, bhante, etaṁ rodāmi yaṁ maṁ bhagavā evamāha.
sn42.5:4.4Api cāhaṁ, bhante, pubbakehi ācariyapācariyehi assārohehi dīgharattaṁ nikato vañcito paluddho:
sn42.5:4.5‘yo so assāroho saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti, so kāyassa bhedā paraṁ maraṇā parajitānaṁ devānaṁ sahabyataṁ upapajjatī’”ti.
sn42.5:4.6“Abhikkantaṁ, bhante …pe…
sn42.5:4.7ajjatagge pāṇupetaṁ saraṇaṁ gatan”ti.
sn42.5:4.8Pañcamaṁ.
sn42.5:4.9