Saṁyutta Nikāya 42 · SN42.11

完整巴利原文 · 稳定分页　当前仅加载第 11 阅读页；保留 Bilara 原生段落标识，每页最多 120 段。

0.1

Saṁyutta Nikāya 42.11

sn42.11:0.1

0.2

1. Gāmaṇivagga

sn42.11:0.2

0.3

Bhadrakasutta

sn42.11:0.3

1.1

Ekaṁ samayaṁ bhagavā mallesu viharati uruvelakappaṁ nāma mallānaṁ nigamo.

sn42.11:1.1

1.2

Atha kho bhadrako gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho bhadrako gāmaṇi bhagavantaṁ etadavoca:

sn42.11:1.2

1.3

“sādhu me, bhante, bhagavā dukkhassa samudayañca atthaṅgamañca desetū”ti.

sn42.11:1.3

1.4

“Ahañce te, gāmaṇi, atītamaddhānaṁ ārabbha dukkhassa samudayañca atthaṅgamañca deseyyaṁ:

sn42.11:1.4

1.5

‘evaṁ ahosi atītamaddhānan’ti, tatra te siyā kaṅkhā, siyā vimati.

sn42.11:1.5

1.6

Ahañce te, gāmaṇi, anāgatamaddhānaṁ ārabbha dukkhassa samudayañca atthaṅgamañca deseyyaṁ:

sn42.11:1.6

1.7

‘evaṁ bhavissati anāgatamaddhānan’ti, tatrāpi te siyā kaṅkhā, siyā vimati.

sn42.11:1.7

1.8

Api cāhaṁ, gāmaṇi, idheva nisinno ettheva te nisinnassa dukkhassa samudayañca atthaṅgamañca desessāmi.

sn42.11:1.8

1.9

Taṁ suṇāhi, sādhukaṁ manasi karohi; bhāsissāmī”ti.

sn42.11:1.9

1.10

“Evaṁ, bhante”ti kho bhadrako gāmaṇi bhagavato paccassosi.

sn42.11:1.10

1.11

Bhagavā etadavoca:

sn42.11:1.11

2.1

“Taṁ kiṁ maññasi, gāmaṇi,

sn42.11:2.1

2.2

atthi te uruvelakappe manussā yesaṁ te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

sn42.11:2.2

2.3

“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti.

sn42.11:2.3

2.4

“Atthi pana te, gāmaṇi, uruvelakappe manussā yesaṁ te vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti?

sn42.11:2.4

2.5

“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti.

sn42.11:2.5

2.6

“Ko nu kho, gāmaṇi, hetu, ko paccayo yena te ekaccānaṁ uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

sn42.11:2.6

2.7

“Yesaṁ me, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā, atthi me tesu chandarāgo.

sn42.11:2.7

2.8

Yesaṁ pana, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā, natthi me tesu chandarāgo”ti.

sn42.11:2.8

2.9

“Iminā tvaṁ, gāmaṇi, dhammena diṭṭhena viditena akālikena pattena pariyogāḷhena atītānāgate nayaṁ nehi:

sn42.11:2.9

2.10

‘yaṁ kho kiñci atītamaddhānaṁ dukkhaṁ uppajjamānaṁ uppajji sabbaṁ taṁ chandamūlakaṁ chandanidānaṁ.

sn42.11:2.10

2.11

Chando hi mūlaṁ dukkhassa.

sn42.11:2.11

2.12

Yampi hi kiñci anāgatamaddhānaṁ dukkhaṁ uppajjamānaṁ uppajjissati, sabbaṁ taṁ chandamūlakaṁ chandanidānaṁ.

sn42.11:2.12

2.13

Chando hi mūlaṁ dukkhassā’”ti.

sn42.11:2.13

2.14

“Acchariyaṁ, bhante, abbhutaṁ, bhante.

sn42.11:2.14

2.15

Yāva subhāsitañcidaṁ, bhante, bhagavatā:

sn42.11:2.15

2.16

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

sn42.11:2.16

2.17

Chando hi mūlaṁ dukkhassā’ti.

sn42.11:2.17

2.18

Atthi me, bhante, ciravāsī nāma kumāro bahi āvasathe paṭivasati.

sn42.11:2.18

2.19

So khvāhaṁ, bhante, kālasseva vuṭṭhāya purisaṁ uyyojemi:

sn42.11:2.19

2.20

‘gaccha, bhaṇe, ciravāsiṁ kumāraṁ jānāhī’ti.

sn42.11:2.20

2.21

Yāvakīvañca, bhante, so puriso nāgacchati, tassa me hoteva aññathattaṁ:

sn42.11:2.21

2.22

‘mā heva ciravāsissa kumārassa kiñci ābādhayitthā’”ti.

sn42.11:2.22

3.1

“Taṁ kiṁ maññasi, gāmaṇi,

sn42.11:3.1

3.2

ciravāsissa kumārassa vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

sn42.11:3.2

3.3

“Ciravāsissa me, bhante, kumārassa vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.

sn42.11:3.3

3.4

“Imināpi kho etaṁ, gāmaṇi, pariyāyena veditabbaṁ:

sn42.11:3.4

3.5

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

sn42.11:3.5

3.6

Chando hi mūlaṁ dukkhassā’ti.

sn42.11:3.6

4.1

Taṁ kiṁ maññasi, gāmaṇi,

sn42.11:4.1

4.2

yadā te ciravāsimātā adiṭṭhā ahosi, assutā ahosi, te ciravāsimātuyā chando vā rāgo vā pemaṁ vā”ti?

sn42.11:4.2

4.3

“No hetaṁ, bhante”.

sn42.11:4.3

4.4

“Dassanaṁ vā te, gāmaṇi, āgamma savanaṁ vā evaṁ te ahosi:

sn42.11:4.4

4.5

‘ciravāsimātuyā chando vā rāgo vā pemaṁ vā’”ti?

sn42.11:4.5

4.6

“Evaṁ, bhante”.

sn42.11:4.6

5.1

“Taṁ kiṁ maññasi, gāmaṇi,

sn42.11:5.1

5.2

ciravāsimātuyā te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

sn42.11:5.2

5.3

“Ciravāsimātuyā me, bhante, vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.

sn42.11:5.3

5.4

“Imināpi kho etaṁ, gāmaṇi, pariyāyena veditabbaṁ:

sn42.11:5.4

5.5

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

sn42.11:5.5

5.6

Chando hi mūlaṁ dukkhassā’”ti.

sn42.11:5.6

5.7

Ekādasamaṁ.

sn42.11:5.7