foxue.ai全球佛学交流 AI 平台
经藏/Saṁyutta Nikāya 47

上座部佛教

相应部第 47 相应

Saṁyutta Nikāya 47 · Mahāsaṅgīti Tipiṭaka Buddhavasse 2500

完整原文 · 原生段落SuttaCentral SN47

完整巴利原文 · 稳定分页　当前仅加载第 9 阅读页；保留 Bilara 原生段落标识，每页最多 120 段。

0.1

Saṁyutta Nikāya 47.9

sn47.9:0.1
0.2

1. Ambapālivagga

sn47.9:0.2
0.3

Gilānasutta

sn47.9:0.3
1.1

Evaṁ me sutaṁ—

sn47.9:1.1
1.2

ekaṁ samayaṁ bhagavā vesāliyaṁ viharati veḷuvagāmake.

sn47.9:1.2
1.3

Tatra kho bhagavā bhikkhū āmantesi:

sn47.9:1.3
1.4

“etha tumhe, bhikkhave, samantā vesāliyā yathāmittaṁ yathāsandiṭṭhaṁ yathāsambhattaṁ vassaṁ upetha.

sn47.9:1.4
1.5

Idhevāhaṁ veḷuvagāmake vassaṁ upagacchāmī”ti.

sn47.9:1.5
1.6

“Evaṁ, bhante”ti kho te bhikkhū bhagavato paṭissutvā samantā vesāliyā yathāmittaṁ yathāsandiṭṭhaṁ yathāsambhattaṁ vassaṁ upagacchuṁ.

sn47.9:1.6
1.7

Bhagavā pana tattheva veḷuvagāmake vassaṁ upagacchi.

sn47.9:1.7
2.1

Atha kho bhagavato vassūpagatassa kharo ābādho uppajji, bāḷhā vedanā vattanti māraṇantikā.

sn47.9:2.1
2.2

Tatra sudaṁ bhagavā sato sampajāno adhivāsesi avihaññamāno.

sn47.9:2.2
2.3

Atha kho bhagavato etadahosi:

sn47.9:2.3
2.4

“na kho me taṁ patirūpaṁ, yohaṁ anāmantetvā upaṭṭhāke anapaloketvā bhikkhusaṅghaṁ parinibbāyeyyaṁ.

sn47.9:2.4
2.5

Yannūnāhaṁ imaṁ ābādhaṁ vīriyena paṭipaṇāmetvā jīvitasaṅkhāraṁ adhiṭṭhāya vihareyyan”ti.

sn47.9:2.5
2.6

Atha kho bhagavā taṁ ābādhaṁ vīriyena paṭipaṇāmetvā jīvitasaṅkhāraṁ adhiṭṭhāya vihāsi.

sn47.9:2.6
2.7

Atha kho bhagavato so ābādho paṭippassambhi.

sn47.9:2.7
3.1

Atha kho bhagavā gilānā vuṭṭhito aciravuṭṭhito gelaññā vihārā nikkhamitvā vihārapacchāyāyaṁ paññatte āsane nisīdi.

sn47.9:3.1
3.2

Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:

sn47.9:3.2
3.3

“diṭṭho me, bhante, bhagavato phāsu;

sn47.9:3.3
3.4

diṭṭhaṁ, bhante, bhagavato khamanīyaṁ;

sn47.9:3.4
3.5

diṭṭhaṁ, bhante, bhagavato yāpanīyaṁ.

sn47.9:3.5
3.6

Api ca me, bhante, madhurakajāto viya kāyo, disāpi me na pakkhāyanti, dhammāpi maṁ nappaṭibhanti bhagavato gelaññena.

sn47.9:3.6
3.7

Api ca me, bhante, ahosi kācideva assāsamattā:

sn47.9:3.7
3.8

‘na tāva bhagavā parinibbāyissati, na yāva bhagavā bhikkhusaṅghaṁ ārabbha kiñcideva udāharatī’”ti.

sn47.9:3.8
4.1

“Kiṁ pana dāni, ānanda, bhikkhusaṅgho mayi paccāsīsati?

sn47.9:4.1
4.2

Desito, ānanda, mayā dhammo anantaraṁ abāhiraṁ karitvā.

sn47.9:4.2
4.3

Natthānanda, tathāgatassa dhammesu ācariyamuṭṭhi.

sn47.9:4.3
4.4

Yassa nūna, ānanda, evamassa:

sn47.9:4.4
4.5

‘ahaṁ bhikkhusaṅghaṁ pariharissāmī’ti vā, ‘mamuddesiko bhikkhusaṅgho’ti vā, so nūna, ānanda, bhikkhusaṅghaṁ ārabbha kiñcideva udāhareyya.

sn47.9:4.5
4.6

Tathāgatassa kho, ānanda, na evaṁ hoti:

sn47.9:4.6
4.7

‘ahaṁ bhikkhusaṅghaṁ pariharissāmī’ti vā, ‘mamuddesiko bhikkhusaṅgho’ti vā.

sn47.9:4.7
4.8

Sa kiṁ, ānanda, tathāgato bhikkhusaṅghaṁ ārabbha kiñcideva udāharissati.

sn47.9:4.8
4.9

Etarahi kho panāhaṁ, ānanda, jiṇṇo vuddho mahallako addhagato vayoanuppatto.

sn47.9:4.9
4.10

Āsītiko me vayo vattati.

sn47.9:4.10
4.11

Seyyathāpi, ānanda, jajjarasakaṭaṁ veḷamissakena yāpeti;

sn47.9:4.11
4.12

evameva kho, ānanda, veḷamissakena maññe tathāgatassa kāyo yāpeti.

sn47.9:4.12
5.1

Yasmiṁ, ānanda, samaye tathāgato sabbanimittānaṁ amanasikārā ekaccānaṁ vedanānaṁ nirodhā animittaṁ cetosamādhiṁ upasampajja viharati, phāsutaro, ānanda, tasmiṁ samaye tathāgatassa kāyo hoti.

sn47.9:5.1
5.2

Tasmātihānanda, attadīpā viharatha attasaraṇā anaññasaraṇā, dhammadīpā dhammasaraṇā anaññasaraṇā.

sn47.9:5.2
6.1

Kathañcānanda, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo?

sn47.9:6.1
6.2

Idhānanda, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;

sn47.9:6.2
6.3

vedanāsu …pe…

sn47.9:6.3
6.4

citte …pe…

sn47.9:6.4
6.5

dhammesu dhammānupassī viharati ātāpī sampajāno satimā, vineyya loke abhijjhādomanassaṁ.

sn47.9:6.5
6.6

Evaṁ kho, ānanda, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo.

sn47.9:6.6
6.7

Ye hi keci, ānanda, etarahi vā mamaccaye vā attadīpā viharissanti attasaraṇā anaññasaraṇā, dhammadīpā dhammasaraṇā anaññasaraṇā; tamatagge mete, ānanda, bhikkhū bhavissanti ye keci sikkhākāmā”ti.

sn47.9:6.7
6.8

Navamaṁ.

sn47.9:6.8