完整巴利原文 · 稳定分页 当前仅加载第 16 阅读页；保留 Bilara 原生段落标识，每页最多 120 段。
Saṁyutta Nikāya 47.16
sn47.16:0.12. Nālandavagga
sn47.16:0.2Uttiyasutta
sn47.16:0.3Sāvatthinidānaṁ.
sn47.16:1.1Atha kho āyasmā uttiyo yena bhagavā tenupasaṅkami …pe… ekamantaṁ nisinno kho āyasmā uttiyo bhagavantaṁ etadavoca:
sn47.16:1.2“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.
sn47.16:1.3“Tasmātiha tvaṁ, uttiya, ādimeva visodhehi kusalesu dhammesu.
sn47.16:1.4Ko cādi kusalānaṁ dhammānaṁ?
sn47.16:1.5Sīlañca suvisuddhaṁ, diṭṭhi ca ujukā.
sn47.16:1.6Yato ca kho te, uttiya, sīlañca suvisuddhaṁ bhavissati, diṭṭhi ca ujukā, tato tvaṁ, uttiya, sīlaṁ nissāya sīle patiṭṭhāya cattāro satipaṭṭhāne bhāveyyāsi.
sn47.16:1.7Katame cattāro?
sn47.16:2.1Idha tvaṁ, uttiya, kāye kāyānupassī viharāhi ātāpī sampajāno satimā, vineyya loke abhijjhādomanassaṁ;
sn47.16:2.2vedanāsu …pe…
sn47.16:2.3citte …pe…
sn47.16:2.4dhammesu dhammānupassī viharāhi ātāpī sampajāno satimā, vineyya loke abhijjhādomanassaṁ.
sn47.16:2.5Yato kho tvaṁ, uttiya, sīlaṁ nissāya sīle patiṭṭhāya ime cattāro satipaṭṭhāne evaṁ bhāvessasi, tato tvaṁ, uttiya, gamissasi maccudheyyassa pāran”ti.
sn47.16:2.6Atha kho āyasmā uttiyo bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.
sn47.16:3.1Atha kho āyasmā uttiyo eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.
sn47.16:3.2“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.
sn47.16:3.3Aññataro ca panāyasmā uttiyo arahataṁ ahosīti.
sn47.16:3.4Chaṭṭhaṁ.
sn47.16:3.5