完整巴利原文 · 稳定分页 当前仅加载第 29 阅读页；保留 Bilara 原生段落标识，每页最多 120 段。
Saṁyutta Nikāya 47.29
sn47.29:0.13. Sīlaṭṭhitivagga
sn47.29:0.2Sirivaḍḍhasutta
sn47.29:0.3Ekaṁ samayaṁ āyasmā ānando rājagahe viharati veḷuvane kalandakanivāpe.
sn47.29:1.1Tena kho pana samayena sirivaḍḍho gahapati ābādhiko hoti dukkhito bāḷhagilāno.
sn47.29:1.2Atha kho sirivaḍḍho gahapati aññataraṁ purisaṁ āmantesi:
sn47.29:1.3“ehi tvaṁ, ambho purisa, yenāyasmā ānando tenupasaṅkama; upasaṅkamitvā mama vacanena āyasmato ānandassa pāde sirasā vanda:
sn47.29:1.4‘sirivaḍḍho, bhante, gahapati ābādhiko dukkhito bāḷhagilāno.
sn47.29:1.5So āyasmato ānandassa pāde sirasā vandatī’ti.
sn47.29:1.6Evañca vadehi:
sn47.29:1.7‘sādhu kira, bhante, āyasmā ānando yena sirivaḍḍhassa gahapatissa nivesanaṁ tenupasaṅkamatu anukampaṁ upādāyā’”ti.
sn47.29:1.8“Evaṁ, bhante”ti kho so puriso sirivaḍḍhassa gahapatissa paṭissutvā yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho so puriso āyasmantaṁ ānandaṁ etadavoca:
sn47.29:1.9“sirivaḍḍho, bhante, gahapati ābādhiko dukkhito bāḷhagilāno, so āyasmato ānandassa pāde sirasā vandati.
sn47.29:1.10Evañca vadeti:
sn47.29:1.11‘sādhu kira, bhante, āyasmā ānando yena sirivaḍḍhassa gahapatissa nivesanaṁ tenupasaṅkamatu anukampaṁ upādāyā’”ti.
sn47.29:1.12Adhivāsesi kho āyasmā ānando tuṇhībhāvena.
sn47.29:1.13Atha kho āyasmā ānando pubbaṇhasamayaṁ nivāsetvā pattacīvaramādāya yena sirivaḍḍhassa gahapatissa nivesanaṁ tenupasaṅkami; upasaṅkamitvā paññatte āsane nisīdi. Nisajja kho āyasmā ānando sirivaḍḍhaṁ gahapatiṁ etadavoca:
sn47.29:2.1“kacci te, gahapati, khamanīyaṁ kacci yāpanīyaṁ, kacci dukkhā vedanā paṭikkamanti, no abhikkamanti; paṭikkamosānaṁ paññāyati, no abhikkamo”ti?
sn47.29:2.2“Na me, bhante, khamanīyaṁ na yāpanīyaṁ. Bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo”ti.
sn47.29:2.3“Tasmātiha te, gahapati, evaṁ sikkhitabbaṁ:
sn47.29:3.1‘kāye kāyānupassī viharissāmi ātāpī sampajāno satimā, vineyya loke abhijjhādomanassaṁ;
sn47.29:3.2vedanāsu …pe…
sn47.29:3.3citte …pe…
sn47.29:3.4dhammesu dhammānupassī viharissāmi ātāpī sampajāno satimā, vineyya loke abhijjhādomanassan’ti.
sn47.29:3.5Evañhi te, gahapati, sikkhitabban”ti.
sn47.29:3.6“Yeme, bhante, bhagavatā cattāro satipaṭṭhānā desitā saṁvijjanti, te dhammā mayi, ahañca tesu dhammesu sandissāmi.
sn47.29:4.1Ahañhi, bhante, kāye kāyānupassī viharāmi ātāpī sampajāno satimā, vineyya loke abhijjhādomanassaṁ;
sn47.29:4.2vedanāsu …pe…
sn47.29:4.3citte …pe…
sn47.29:4.4dhammesu dhammānupassī viharāmi ātāpī sampajāno satimā, vineyya loke abhijjhādomanassaṁ.
sn47.29:4.5Yāni cimāni, bhante, bhagavatā pañcorambhāgiyāni saṁyojanāni desitāni, nāhaṁ, bhante, tesaṁ kiñci attani appahīnaṁ samanupassāmī”ti.
sn47.29:4.6“Lābhā te, gahapati, suladdhaṁ te, gahapati.
sn47.29:4.7Anāgāmiphalaṁ tayā, gahapati, byākatan”ti.
sn47.29:4.8Navamaṁ.
sn47.29:4.9