完整巴利原文 · 稳定分页 当前仅加载第 21 阅读页；保留 Bilara 原生段落标识，每页最多 120 段。
Saṁyutta Nikāya 47.21
sn47.21:0.13. Sīlaṭṭhitivagga
sn47.21:0.2Sīlasutta
sn47.21:0.3Evaṁ me sutaṁ—
sn47.21:1.1ekaṁ samayaṁ āyasmā ca ānando āyasmā ca bhaddo pāṭaliputte viharanti kukkuṭārāme.
sn47.21:1.2Atha kho āyasmā bhaddo sāyanhasamayaṁ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṁ sammodi.
sn47.21:1.3Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā bhaddo āyasmantaṁ ānandaṁ etadavoca:
sn47.21:1.4“yānimāni, āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā”ti?
sn47.21:1.5“Sādhu sādhu, āvuso bhadda.
sn47.21:2.1Bhaddako kho te, āvuso bhadda, ummaṅgo, bhaddakaṁ paṭibhānaṁ, kalyāṇī paripucchā.
sn47.21:2.2Evañhi tvaṁ, āvuso bhadda, pucchasi:
sn47.21:2.3‘yānimāni, āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’”ti?
sn47.21:2.4“Evamāvuso”ti.
sn47.21:2.5“Yānimāni, āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva catunnaṁ satipaṭṭhānānaṁ bhāvanāya vuttāni bhagavatā.
sn47.21:2.6Katamesaṁ catunnaṁ?
sn47.21:3.1Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ;
sn47.21:3.2vedanāsu …pe…
sn47.21:3.3citte …pe…
sn47.21:3.4dhammesu dhammānupassī viharati ātāpī sampajāno satimā, vineyya loke abhijjhādomanassaṁ.
sn47.21:3.5Yānimāni, āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva imesaṁ catunnaṁ satipaṭṭhānānaṁ bhāvanāya vuttāni bhagavatā”ti.
sn47.21:3.6Paṭhamaṁ.
sn47.21:3.7