完整藏文原文 · 德格版页 当前仅加载第 99 函德格 271a 版页；藏文 NFD、目录标记与异常页序保留在来源切片中，重复版页行以稳定序号区分。
ཀྱི་བཀའ་ལུང་རྗེས་བཞིན་དུ། །བརྟུལ་ཞུགས་འཛིན་པ་དེ་དག་ལ། །ཕྲིན་ལས་སྤྱོད་པའི་གྲོགས་བྱའི་ཕྱིར། །བདག་ཅག་སོ་སོའི་གནས་དང་དུས། །རང་གི་སྡེ་དང་འཁོར་གཡོག་དཔུང་། །མཐུན་པའི་ལས་དང་ལོངས་སྤྱོད་དང་། །ཆ་ལུགས་
D844.099.0271a01.01རིགས་དང་བསམ་པ་དང་། །ཁམས་དང་བྱེད་པའི་ཚུལ་དག་དང་། །དམ་ཚིག་སྦྱོར་བའི་ཁྱད་པར་དག །བདག་ཅག་རྣམས་དང་མ་འོངས་པའི། །རིག་པའི་ཚུལ་འཛིན་དོན་ཕྱིར་རུ། །མ་ལུས་རྒྱས་པར་བཤད་དུ་གསོལ། །ཞེས་གསོལ་པས། དེ་ནས་བཅོམ་ལྡན་
D844.099.0271a02.01འདས་ཀྱིས་འཇིག་རྟེན་གྱི་དྲེགས་པ་ཅན་དག་གི་གཙོ་བོ་དབང་ཕྱུག་ཆེན་པོ་ལ་སོགས་པ་རྣམས། །སོ་སོའི་ལས་དང་གཅིག་ཏུ་སྦས་པ་དང་། །ཐ་དད་དུ་སྦྱར་བ་དང་། ངེས་པ་དང་། མ་ངེས་པ་དང་། རིམ་པ་དང་འཆོལ་བ་དང་། ཕྱི་དང་ནང་དང་། གསང་བ་དང་། སྦས་པ་དང་།
D844.099.0271a03.01འཚོགས་པ་དང་། འཐོར་བ་དང་། མཐུན་པའི་རྫས་དང་། སྙིང་པོ་དང་། མག་པ་དང་། གཉེར་གཏད་པ་དང་། སྐུལ་བ་དང་། རྦད་པ་དང་། བཟློག་པ་དང་། ཚར་གཅད་པ་དང་། གཟིར་བ་དང་། སྤོགས་པ་དང་། ལས་སྣ་ཚོགས་པ་དག་གི་སྒོ་ནས། །རོལ་པ་ཆེན་
D844.099.0271a04.01པོའི་གསང་བ་སྐུ་གསུང་ཐུགས་ཀྱི་རྡོ་རྗེ་དམ་ཚིག་ཆེན་པོ་ལས་ཕྱུང་སྟེ་བཀའ་སྩལ་ཏོ། །ཉོན་ཅིག་འཇིག་རྟེན་དྲེགས་པའི་ཚོགས། །ཕྱི་མའི་ཚེ་ན་སྙིགས་མའི་དུས། །དགེ་སྦྱོང་ཆེན་པོའི་བསྟན་པ་འདི། །སོ་སོའི་སྐྱེ་བོ་རྣམས་ལ་སྣང་། །ཉན་ཐོས་རང་རྒྱལ་རྣམས་ཀྱི་
D844.099.0271a05.01ཚུལ། །རྡོ་རྗེ་འཆང་བ་རྣམས་ཀྱི་སྐུ། །རྒྱུད་དག་ས་ལམ་རྫོགས་ལ་གསལ། །སྤྲོས་མེད་ཆོས་སྐུ་འདུ་འབྲལ་མེད། །ཏིང་ངེ་འཛིན་ལ་སྦྱངས་པས་འགྲུབ། །བསམ་པ་ཚེ་སྔ་སྨོན་པ་ཡིས། །རིགས་དྲུག་སོ་སོའི་བདག་པོར་སྣང་། །ལས་ཀྱི་དྲེགས་པས་ཁྱེད་རྣམས་ནི། །
D844.099.0271a06.01འཇིགས་ཤིང་འཇིགས་པར་བྱེད་པ་ཡིས། །གཏུམ་ཞིང་དཔའ་ལ་ཆེས་དཔའ་བས། །གདུལ་ཞིང་དྲག་པར་ནུས་པ་ལས། །ཞི་བས་འདུལ་བར་མི་འགྱུར་ཏེ། །རིག་པ་འཛིན་པའི་སྐྱེས་བུ་ནི། །སྟོབས་ལྡན་དྲེགས་ཚོགས་ཀུན་འདུལ་བ། །ཁམས་གསུམ་སྤྱི་ལ་དབང་
D844.099.0271a07.01