完整巴利原文 · 稳定分页 当前仅加载第 27 阅读页；保留 Bilara 原生段落标识，每页最多 120 段。
Udāna 3.7
ud3.7:0.1Sakkudānasutta
ud3.7:0.2Evaṁ me sutaṁ—
ud3.7:1.1ekaṁ samayaṁ bhagavā rājagahe viharati veḷuvane kalandakanivāpe.
ud3.7:1.2Tena kho pana samayena āyasmā mahākassapo pippaliguhāyaṁ viharati, sattāhaṁ ekapallaṅkena nisinno hoti aññataraṁ samādhiṁ samāpajjitvā.
ud3.7:1.3Atha kho āyasmā mahākassapo tassa sattāhassa accayena tamhā samādhimhā vuṭṭhāsi.
ud3.7:1.4Atha kho āyasmato mahākassapassa tamhā samādhimhā vuṭṭhitassa etadahosi:
ud3.7:1.5“yannūnāhaṁ rājagahaṁ piṇḍāya paviseyyan”ti.
ud3.7:1.6Tena kho pana samayena pañcamattāni devatāsatāni ussukkaṁ āpannāni honti āyasmato mahākassapassa piṇḍapātapaṭilābhāya.
ud3.7:2.1Atha kho āyasmā mahākassapo tāni pañcamattāni devatāsatāni paṭikkhipitvā pubbaṇhasamayaṁ nivāsetvā pattacīvaramādāya rājagahaṁ piṇḍāya pāvisi.
ud3.7:2.2Tena kho pana samayena sakko devānamindo āyasmato mahākassapassa piṇḍapātaṁ dātukāmo hoti.
ud3.7:2.3Pesakāravaṇṇaṁ abhinimminitvā tantaṁ vināti. Sujā asurakaññā tasaraṁ pūreti.
ud3.7:3.2Atha kho āyasmā mahākassapo rājagahe sapadānaṁ piṇḍāya caramāno yena sakkassa devānamindassa nivesanaṁ tenupasaṅkami.
ud3.7:3.3Addasā kho sakko devānamindo āyasmantaṁ mahākassapaṁ dūratova āgacchantaṁ.
ud3.7:3.4Disvāna gharā nikkhamitvā paccuggantvā hatthato pattaṁ gahetvā gharaṁ pavisitvā ghaṭiyā odanaṁ uddharitvā pattaṁ pūretvā āyasmato mahākassapassa adāsi.
ud3.7:3.5So ahosi piṇḍapāto anekasūpo anekabyañjano anekarasabyañjano.
ud3.7:3.6Atha kho āyasmato mahākassapassa etadahosi:
ud3.7:3.7“ko nu kho ayaṁ satto yassāyaṁ evarūpo iddhānubhāvo”ti?
ud3.7:3.8Atha kho āyasmato mahākassapassa etadahosi:
ud3.7:3.9“sakko kho ayaṁ devānamindo”ti.
ud3.7:3.10Iti viditvā sakkaṁ devānamindaṁ etadavoca:
ud3.7:3.11“kataṁ kho te idaṁ, kosiya;
ud3.7:3.12mā punapi evarūpamakāsī”ti.
ud3.7:3.13“Amhākampi, bhante kassapa, puññena attho;
ud3.7:3.14amhākampi puññena karaṇīyan”ti.
ud3.7:3.15Atha kho sakko devānamindo āyasmantaṁ mahākassapaṁ abhivādetvā padakkhiṇaṁ katvā vehāsaṁ abbhuggantvā ākāse antalikkhe tikkhattuṁ udānaṁ udānesi:
ud3.7:4.1“aho dānaṁ paramadānaṁ kassape suppatiṭṭhitaṁ.
ud3.7:4.2Aho dānaṁ paramadānaṁ kassape suppatiṭṭhitaṁ.
ud3.7:4.3Aho dānaṁ paramadānaṁ kassape suppatiṭṭhitan”ti.
ud3.7:4.4Assosi kho bhagavā dibbāya sotadhātuyā visuddhāya atikkantamānusikāya sakkassa devānamindassa vehāsaṁ abbhuggantvā ākāse antalikkhe tikkhattuṁ udānaṁ udānentassa:
ud3.7:4.5“aho dānaṁ paramadānaṁ kassape suppatiṭṭhitaṁ.
ud3.7:4.6Aho dānaṁ paramadānaṁ kassape suppatiṭṭhitaṁ.
ud3.7:4.7Aho dānaṁ paramadānaṁ kassape suppatiṭṭhitan”ti.
ud3.7:4.8Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud3.7:5.1“Piṇḍapātikassa bhikkhuno,
ud3.7:6.1Attabharassa anaññaposino;
ud3.7:6.2Devā pihayanti tādino,
ud3.7:6.3Upasantassa sadā satīmato”ti.
ud3.7:6.4Sattamaṁ.
ud3.7:6.5