巴利《小部》· 自说

Udāna 8.10

Dutiyadabbasutta

Evaṁ me sutaṁ—

ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.

Tatra kho bhagavā bhikkhū āmantesi:

“bhikkhavo”ti.

“Bhadante”ti te bhikkhū bhagavato paccassosuṁ.

Bhagavā etadavoca:

“Dabbassa, bhikkhave, mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi.

Seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi;

evamevaṁ kho, bhikkhave, dabbassa mallaputtassa vehāsaṁ abbhuggantvā ākāse antalikkhe pallaṅkena nisīditvā tejodhātuṁ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masī”ti.

Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:

“Ayoghanahatasseva,

jalato jātavedaso;

Anupubbūpasantassa,

yathā na ñāyate gati.

Evaṁ sammāvimuttānaṁ,

kāmabandhoghatārinaṁ;

Paññāpetuṁ gati natthi,

pattānaṁ acalaṁ sukhan”ti.

Dasamaṁ.

Pāṭaligāmiyavaggo aṭṭhamo.

Tassuddānaṁ

Nibbānā caturo vuttā,

cundo pāṭaligāmiyā;

Dvidhāpatho visākhā ca,

dabbena saha te dasāti.

Udāne vaggānamuddānaṁ

Vaggamidaṁ paṭhamaṁ varabodhi,

Vaggamidaṁ dutiyaṁ mucalindo;

Nandakavaggavaro tatiyo tu,

Meghiyavaggavaro ca catuttho.

Pañcamavaggavarantidha soṇo,

Chaṭṭhamavaggavaranti jaccandho;

Sattamavaggavaranti ca cūḷo,

Pāṭaligāmiyamaṭṭhamavaggo.

Asītimanūnakasuttavaraṁ,

Vaggamidaṭṭhakaṁ suvibhattaṁ;

Dassitaṁ cakkhumatā vimalena,

Addhā hi taṁ udānamitīdamāhu.

Udānapāḷi niṭṭhitā.