完整巴利原文 · 稳定分页 当前仅加载第 69 阅读页；保留 Bilara 原生段落标识，每页最多 120 段。
Udāna 7.9
ud7.9:0.1Udapānasutta
ud7.9:0.2Evaṁ me sutaṁ—
ud7.9:1.1ekaṁ samayaṁ bhagavā mallesu cārikaṁ caramāno mahatā bhikkhusaṅghena saddhiṁ yena thūṇaṁ nāma mallānaṁ brāhmaṇagāmo tadavasari.
ud7.9:1.2Assosuṁ kho thūṇeyyakā brāhmaṇagahapatikā:
ud7.9:1.3“samaṇo khalu, bho, gotamo sakyaputto sakyakulā pabbajito mallesu cārikaṁ caramāno mahatā bhikkhusaṅghena saddhiṁ thūṇaṁ anuppatto”ti.
ud7.9:1.4(…) Udapānaṁ tiṇassa ca bhusassa ca yāva mukhato pūresuṁ:
ud7.9:1.5“mā te muṇḍakā samaṇakā pānīyaṁ apaṁsū”ti.
ud7.9:1.6Atha kho bhagavā maggā okkamma yena rukkhamūlaṁ tenupasaṅkami; upasaṅkamitvā paññatte āsane nisīdi.
ud7.9:2.1Nisajja kho bhagavā āyasmantaṁ ānandaṁ āmantesi:
ud7.9:2.2“iṅgha me tvaṁ, ānanda, etamhā udapānā pānīyaṁ āharā”ti.
ud7.9:2.3Evaṁ vutte, āyasmā ānando bhagavantaṁ etadavoca:
ud7.9:3.1“idāni so, bhante, udapāno thūṇeyyakehi brāhmaṇagahapatikehi tiṇassa ca bhusassa ca yāva mukhato pūrito:
ud7.9:3.2‘mā te muṇḍakā samaṇakā pānīyaṁ apaṁsū’”ti.
ud7.9:3.3Dutiyampi kho …pe…
ud7.9:4.1tatiyampi kho bhagavā āyasmantaṁ ānandaṁ āmantesi:
ud7.9:4.2“iṅgha me tvaṁ, ānanda, etamhā udapānā pānīyaṁ āharā”ti.
ud7.9:4.3“Evaṁ, bhante”ti kho āyasmā ānando bhagavato paṭissutvā pattaṁ gahetvā yena so udapāno tenupasaṅkami.
ud7.9:4.4Atha kho so udapāno āyasmante ānande upasaṅkamante sabbaṁ taṁ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito vissandanto maññe aṭṭhāsi.
ud7.9:4.5Atha kho āyasmato ānandassa etadahosi:
ud7.9:5.1“acchariyaṁ vata bho, abbhutaṁ vata bho, tathāgatassa mahiddhikatā mahānubhāvatā.
ud7.9:5.2Ayañhi so udapāno mayi upasaṅkamante sabbaṁ taṁ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito vissandanto maññe ṭhito”ti.
ud7.9:5.3Pattena pānīyaṁ ādāya yena bhagavā tenupasaṅkami; upasaṅkamitvā bhagavantaṁ etadavoca:
ud7.9:5.4“acchariyaṁ, bhante, abbhutaṁ, bhante, tathāgatassa mahiddhikatā mahānubhāvatā.
ud7.9:5.5Ayañhi so, bhante, udapāno mayi upasaṅkamante sabbaṁ taṁ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito vissandanto maññe aṭṭhāsi.
ud7.9:5.6Pivatu bhagavā pānīyaṁ, pivatu sugato pānīyan”ti.
ud7.9:5.7Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:
ud7.9:6.1“Kiṁ kayirā udapānena,
ud7.9:7.1Āpā ce sabbadā siyuṁ;
ud7.9:7.2Taṇhāya mūlato chetvā,
ud7.9:7.3Kissa pariyesanaṁ care”ti.
ud7.9:7.4Navamaṁ.
ud7.9:7.5