完整巴利原文 · 稳定分页 当前仅加载第 35 阅读页；保留 Bilara 原生段落标识，每页最多 120 段。
Udāna 4.5
ud4.5:0.1Nāgasutta
ud4.5:0.2Evaṁ me sutaṁ—
ud4.5:1.1ekaṁ samayaṁ bhagavā kosambiyaṁ viharati ghositārāme.
ud4.5:1.2Tena kho pana samayena bhagavā ākiṇṇo viharati bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi.
ud4.5:1.3Ākiṇṇo dukkhaṁ na phāsu viharati.
ud4.5:1.4Atha kho bhagavato etadahosi:
ud4.5:1.5“ahaṁ kho etarahi ākiṇṇo viharāmi bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi.
ud4.5:1.6Ākiṇṇo dukkhaṁ na phāsu viharāmi.
ud4.5:1.7Yannūnāhaṁ eko gaṇasmā vūpakaṭṭho vihareyyan”ti.
ud4.5:1.8Atha kho bhagavā pubbaṇhasamayaṁ nivāsetvā pattacīvaramādāya kosambiṁ piṇḍāya pāvisi.
ud4.5:2.1Kosambiyaṁ piṇḍāya caritvā pacchābhattaṁ piṇḍapātapaṭikkanto sāmaṁ senāsanaṁ saṁsāmetvā pattacīvaramādāya anāmantetvā upaṭṭhākaṁ anapaloketvā bhikkhusaṅghaṁ eko adutiyo yena pālileyyakaṁ tena cārikaṁ pakkāmi.
ud4.5:2.2Anupubbena cārikaṁ caramāno yena pālileyyakaṁ tadavasari.
ud4.5:2.3Tatra sudaṁ bhagavā pālileyyake viharati rakkhitavanasaṇḍe bhaddasālamūle.
ud4.5:2.4Aññataropi kho hatthināgo ākiṇṇo viharati hatthīhi hatthinīhi hatthikalabhehi hatthicchāpehi. Chinnaggāni ceva tiṇāni khādati, obhaggobhaggañcassa sākhābhaṅgaṁ khādanti, āvilāni ca pānīyāni pivati, ogāhā cassa uttiṇṇassa hatthiniyo kāyaṁ upanighaṁsantiyo gacchanti.
ud4.5:3.1Ākiṇṇo dukkhaṁ na phāsu viharati.
ud4.5:3.2Atha kho tassa hatthināgassa etadahosi:
ud4.5:3.3“ahaṁ kho etarahi ākiṇṇo viharāmi hatthīhi hatthinīhi hatthikalabhehi hatthicchāpehi, chinnaggāni ceva tiṇāni khādāmi, obhaggobhaggañca me sākhābhaṅgaṁ khādanti, āvilāni ca pānīyāni pivāmi, ogāhā ca me uttiṇṇassa hatthiniyo kāyaṁ upanighaṁsantiyo gacchanti, ākiṇṇo dukkhaṁ na phāsu viharāmi.
ud4.5:3.4Yannūnāhaṁ eko gaṇasmā vūpakaṭṭho vihareyyan”ti.
ud4.5:3.5Atha kho so hatthināgo yūthā apakkamma yena pālileyyakaṁ rakkhitavanasaṇḍo bhaddasālamūlaṁ yena bhagavā tenupasaṅkami.
ud4.5:4.1Tatra sudaṁ so hatthināgo yasmiṁ padese bhagavā viharati taṁ padesaṁ appaharitaṁ karoti, soṇḍāya ca bhagavato pānīyaṁ paribhojanīyaṁ upaṭṭhāpeti.
ud4.5:4.2Atha kho bhagavato rahogatassa paṭisallīnassa evaṁ cetaso parivitakko udapādi:
ud4.5:5.1“ahaṁ kho pubbe ākiṇṇo vihāsiṁ bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi, ākiṇṇo dukkhaṁ na phāsu vihāsiṁ.
ud4.5:5.2Somhi etarahi anākiṇṇo viharāmi bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi, anākiṇṇo sukhaṁ phāsu viharāmī”ti.
ud4.5:5.3Tassapi kho hatthināgassa evaṁ cetaso parivitakko udapādi:
ud4.5:6.1“ahaṁ kho pubbe ākiṇṇo vihāsiṁ hatthīhi hatthinīhi hatthikalabhehi hatthicchāpehi, chinnaggāni ceva tiṇāni khādiṁ, obhaggobhaggañca me sākhābhaṅgaṁ khādiṁsu, āvilāni ca pānīyāni apāyiṁ, ogāhā ca me uttiṇṇassa hatthiniyo kāyaṁ upanighaṁsantiyo agamaṁsu, ākiṇṇo dukkhaṁ na phāsu vihāsiṁ.
ud4.5:6.2Somhi etarahi anākiṇṇo viharāmi hatthīhi hatthinīhi hatthikalabhehi hatthicchāpehi, acchinnaggāni ceva tiṇāni khādāmi, obhaggobhaggañca me sākhābhaṅgaṁ na khādanti, anāvilāni ca pānīyāni pivāmi, ogāhā ca me uttiṇṇassa hatthiniyo na kāyaṁ upanighaṁsantiyo gacchanti, anākiṇṇo sukhaṁ phāsu viharāmī”ti.
ud4.5:6.3Atha kho bhagavā attano ca pavivekaṁ viditvā tassa ca hatthināgassa cetasā cetoparivitakkamaññāya tāyaṁ velāyaṁ imaṁ udānaṁ udānesi:
ud4.5:7.1“Etaṁ nāgassa nāgena,
ud4.5:8.1īsādantassa hatthino;
ud4.5:8.2Sameti cittaṁ cittena,
ud4.5:8.3yadeko ramatī mano”ti.
ud4.5:8.4Pañcamaṁ.
ud4.5:8.5