巴利《小部》· 自说

Udāna 3.10

Lokasutta

Evaṁ me sutaṁ—

ekaṁ samayaṁ bhagavā uruvelāyaṁ viharati najjā nerañjarāya tīre bodhirukkhamūle paṭhamābhisambuddho.

Tena kho pana samayena bhagavā sattāhaṁ ekapallaṅkena nisinno hoti vimuttisukhapaṭisaṁvedī.

Atha kho bhagavā tassa sattāhassa accayena tamhā samādhimhā vuṭṭhahitvā buddhacakkhunā lokaṁ volokesi.

Addasā kho bhagavā buddhacakkhunā volokento satte anekehi santāpehi santappamāne, anekehi ca pariḷāhehi pariḍayhamāne—

rāgajehipi, dosajehipi, mohajehipi.

Atha kho bhagavā etamatthaṁ viditvā tāyaṁ velāyaṁ imaṁ udānaṁ udānesi:

“Ayaṁ loko santāpajāto,

Phassapareto rogaṁ vadati attato;

Yena yena hi maññati,

Tato taṁ hoti aññathā.

Aññathābhāvī bhavasatto loko,

Bhavapareto bhavamevābhinandati;

Yadabhinandati taṁ bhayaṁ,

Yassa bhāyati taṁ dukkhaṁ;

Bhavavippahānāya kho,

Panidaṁ brahmacariyaṁ vussati.

‘Ye hi keci samaṇā vā brāhmaṇā vā bhavena bhavassa vippamokkhamāhaṁsu, sabbe te avippamuttā bhavasmā’ti vadāmi.

‘Ye vā pana keci samaṇā vā brāhmaṇā vā vibhavena bhavassa nissaraṇamāhaṁsu, sabbe te anissaṭā bhavasmā’ti vadāmi.

Upadhiñhi paṭicca dukkhamidaṁ sambhoti, sabbupādānakkhayā natthi dukkhassa sambhavo.

Lokamimaṁ passa;

puthū avijjāya paretā bhūtā bhūtaratā aparimuttā;

ye hi keci bhavā sabbadhi sabbatthatāya sabbe te bhavā aniccā dukkhā vipariṇāmadhammāti.

Evametaṁ yathābhūtaṁ,

Sammappaññāya passato;

Bhavataṇhā pahīyati,

Vibhavaṁ nābhinandati;

Sabbaso taṇhānaṁ khayā,

Asesavirāganirodho nibbānaṁ.

Tassa nibbutassa bhikkhuno,

Anupādā punabbhavo na hoti;

Abhibhūto māro vijitasaṅgāmo,

Upaccagā sabbabhavāni tādī”ti.

Dasamaṁ.

Nandavaggo tatiyo.

Tassuddānaṁ

Kammaṁ nando yasojo ca,

sāriputto ca kolito;

Pilindo kassapo piṇḍo,

sippaṁ lokena te dasāti.