完整巴利原文 · 稳定分页 当前仅加载第 7 阅读页；保留 Bilara 原生段落标识，每页最多 120 段。
Saṁyutta Nikāya 55.7
sn55.7:0.11. Veḷudvāravagga
sn55.7:0.2Veḷudvāreyyasutta
sn55.7:0.3Evaṁ me sutaṁ—
sn55.7:1.1ekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena veḷudvāraṁ nāma kosalānaṁ brāhmaṇagāmo tadavasari.
sn55.7:1.2Assosuṁ kho te veḷudvāreyyakā brāhmaṇagahapatikā:
sn55.7:1.3“samaṇo khalu, bho, gotamo sakyaputto sakyakulā pabbajito kosalesu cārikaṁ caramāno mahatā bhikkhusaṅghena saddhiṁ veḷudvāraṁ anuppatto.
sn55.7:1.4Taṁ kho pana bhavantaṁ gotamaṁ evaṁ kalyāṇo kittisaddo abbhuggato:
sn55.7:1.5‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’.
sn55.7:1.6So imaṁ lokaṁ sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā pavedeti.
sn55.7:1.7So dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ, kevalaparipuṇṇaṁ parisuddhaṁ brahmacariyaṁ pakāseti.
sn55.7:1.8Sādhu kho pana tathārūpānaṁ arahataṁ dassanaṁ hotī”ti.
sn55.7:1.9Atha kho te veḷudvāreyyakā brāhmaṇagahapatikā yena bhagavā tenupasaṅkamiṁsu; upasaṅkamitvā appekacce bhagavantaṁ abhivādetvā ekamantaṁ nisīdiṁsu. Appekacce bhagavatā saddhiṁ sammodiṁsu; sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Appekacce yena bhagavā tenañjaliṁ paṇāmetvā ekamantaṁ nisīdiṁsu. Appekacce bhagavato santike nāmagottaṁ sāvetvā ekamantaṁ nisīdiṁsu. Appekacce tuṇhībhūtā ekamantaṁ nisīdiṁsu. Ekamantaṁ nisinnā kho te veḷudvāreyyakā brāhmaṇagahapatikā bhagavantaṁ etadavocuṁ:
sn55.7:2.1“mayaṁ, bho gotama, evaṅkāmā evaṁchandā evaṁadhippāyā—
sn55.7:2.2puttasambādhasayanaṁ ajjhāvaseyyāma, kāsikacandanaṁ paccanubhaveyyāma, mālāgandhavilepanaṁ dhāreyyāma, jātarūparajataṁ sādiyeyyāma, kāyassa bhedā paraṁ maraṇā sugatiṁ saggaṁ lokaṁ upapajjeyyāma.
sn55.7:2.3Tesaṁ no bhavaṁ gotamo amhākaṁ evaṅkāmānaṁ evaṁchandānaṁ evaṁadhippāyānaṁ tathā dhammaṁ desetu yathā mayaṁ puttasambādhasayanaṁ ajjhāvaseyyāma …pe… sugatiṁ saggaṁ lokaṁ upapajjeyyāmā”ti.
sn55.7:2.4“Attupanāyikaṁ vo, gahapatayo, dhammapariyāyaṁ desessāmi.
sn55.7:3.1Taṁ suṇātha, sādhukaṁ manasi karotha, bhāsissāmī”ti.
sn55.7:3.2“Evaṁ, bho”ti kho te veḷudvāreyyakā brāhmaṇagahapatikā bhagavato paccassosuṁ.
sn55.7:3.3Bhagavā etadavoca:
sn55.7:3.4“Katamo ca, gahapatayo, attupanāyiko dhammapariyāyo?
sn55.7:4.1Idha, gahapatayo, ariyasāvako iti paṭisañcikkhati:
sn55.7:4.2‘ahaṁ khosmi jīvitukāmo amaritukāmo sukhakāmo dukkhappaṭikūlo.
sn55.7:4.3Yo kho maṁ jīvitukāmaṁ amaritukāmaṁ sukhakāmaṁ dukkhappaṭikūlaṁ jīvitā voropeyya, na metaṁ assa piyaṁ manāpaṁ.
sn55.7:4.4Ahañceva kho pana paraṁ jīvitukāmaṁ amaritukāmaṁ sukhakāmaṁ dukkhappaṭikūlaṁ jīvitā voropeyyaṁ, parassapi taṁ assa appiyaṁ amanāpaṁ.
sn55.7:4.5Yo kho myāyaṁ dhammo appiyo amanāpo, parassa peso dhammo appiyo amanāpo.
sn55.7:4.6Yo kho myāyaṁ dhammo appiyo amanāpo, kathāhaṁ paraṁ tena saṁyojeyyan’ti.
sn55.7:4.7So iti paṭisaṅkhāya attanā ca pāṇātipātā paṭivirato hoti, parañca pāṇātipātā veramaṇiyā samādapeti, pāṇātipātā veramaṇiyā ca vaṇṇaṁ bhāsati.
sn55.7:4.8Evamassāyaṁ kāyasamācāro tikoṭiparisuddho hoti.
sn55.7:4.9Puna caparaṁ, gahapatayo, ariyasāvako iti paṭisañcikkhati:
sn55.7:5.1‘yo kho me adinnaṁ theyyasaṅkhātaṁ ādiyeyya, na metaṁ assa piyaṁ manāpaṁ.
sn55.7:5.2Ahañceva kho pana parassa adinnaṁ theyyasaṅkhātaṁ ādiyeyyaṁ, parassapi taṁ assa appiyaṁ amanāpaṁ.
sn55.7:5.3Yo kho myāyaṁ dhammo appiyo amanāpo, parassa peso dhammo appiyo amanāpo.
sn55.7:5.4Yo kho myāyaṁ dhammo appiyo amanāpo, kathāhaṁ paraṁ tena saṁyojeyyan’ti.
sn55.7:5.5So iti paṭisaṅkhāya attanā ca adinnādānā paṭivirato hoti, parañca adinnādānā veramaṇiyā samādapeti, adinnādānā veramaṇiyā ca vaṇṇaṁ bhāsati.
sn55.7:5.6Evamassāyaṁ kāyasamācāro tikoṭiparisuddho hoti.
sn55.7:5.7Puna caparaṁ, gahapatayo, ariyasāvako iti paṭisañcikkhati:
sn55.7:6.1‘yo kho me dāresu cārittaṁ āpajjeyya, na metaṁ assa piyaṁ manāpaṁ.
sn55.7:6.2Ahañceva kho pana parassa dāresu cārittaṁ āpajjeyyaṁ, parassapi taṁ assa appiyaṁ amanāpaṁ.
sn55.7:6.3Yo kho myāyaṁ dhammo appiyo amanāpo, parassa peso dhammo appiyo amanāpo.
sn55.7:6.4Yo kho myāyaṁ dhammo appiyo amanāpo, kathāhaṁ paraṁ tena saṁyojeyyan’ti.
sn55.7:6.5So iti paṭisaṅkhāya attanā ca kāmesumicchācārā paṭivirato hoti, parañca kāmesumicchācārā veramaṇiyā samādapeti, kāmesumicchācārā veramaṇiyā ca vaṇṇaṁ bhāsati.
sn55.7:6.6Evamassāyaṁ kāyasamācāro tikoṭiparisuddho hoti.
sn55.7:6.7Puna caparaṁ, gahapatayo, ariyasāvako iti paṭisañcikkhati:
sn55.7:7.1‘yo kho me musāvādena atthaṁ bhañjeyya, na metaṁ assa piyaṁ manāpaṁ.
sn55.7:7.2Ahañceva kho pana parassa musāvādena atthaṁ bhañjeyyaṁ, parassapi taṁ assa appiyaṁ amanāpaṁ.
sn55.7:7.3Yo kho myāyaṁ dhammo appiyo amanāpo, parassa peso dhammo appiyo amanāpo.
sn55.7:7.4Yo kho myāyaṁ dhammo appiyo amanāpo, kathāhaṁ paraṁ tena saṁyojeyyan’ti.
sn55.7:7.5So iti paṭisaṅkhāya attanā ca musāvādā paṭivirato hoti, parañca musāvādā veramaṇiyā samādapeti, musāvādā veramaṇiyā ca vaṇṇaṁ bhāsati.
sn55.7:7.6Evamassāyaṁ vacīsamācāro tikoṭiparisuddho hoti.
sn55.7:7.7Puna caparaṁ, gahapatayo, ariyasāvako iti paṭisañcikkhati:
sn55.7:8.1“yo kho maṁ pisuṇāya vācāya mitte bhindeyya, na metaṁ assa piyaṁ manāpaṁ.
sn55.7:8.2Ahañceva kho pana paraṁ pisuṇāya vācāya mitte bhindeyyaṁ, parassapi taṁ assa appiyaṁ amanāpaṁ …pe…
sn55.7:8.3evamassāyaṁ vacīsamācāro tikoṭiparisuddho hoti.
sn55.7:8.4Puna caparaṁ, gahapatayo, ariyasāvako iti paṭisañcikkhati:
sn55.7:9.1“yo kho maṁ pharusāya vācāya samudācareyya, na metaṁ assa piyaṁ manāpaṁ.
sn55.7:9.2Ahañceva kho pana paraṁ pharusāya vācāya samudācareyyaṁ, parassapi taṁ assa appiyaṁ amanāpaṁ.
sn55.7:9.3Yo kho myāyaṁ dhammo …pe…
sn55.7:9.4evamassāyaṁ vacīsamācāro tikoṭiparisuddho hoti.
sn55.7:9.5Puna caparaṁ, gahapatayo, ariyasāvako iti paṭisañcikkhati:
sn55.7:10.1‘yo kho maṁ samphabhāsena samphappalāpabhāsena samudācareyya, na metaṁ assa piyaṁ manāpaṁ.
sn55.7:10.2Ahañceva kho pana paraṁ samphabhāsena samphappalāpabhāsena samudācareyyaṁ, parassapi taṁ assa appiyaṁ amanāpaṁ.
sn55.7:10.3Yo kho myāyaṁ dhammo appiyo amanāpo, parassa peso dhammo appiyo amanāpo.
sn55.7:10.4Yo kho myāyaṁ dhammo appiyo amanāpo, kathāhaṁ paraṁ tena saṁyojeyyan’ti.
sn55.7:10.5So iti paṭisaṅkhāya attanā ca samphappalāpā paṭivirato hoti, parañca samphappalāpā veramaṇiyā samādapeti, samphappalāpā veramaṇiyā ca vaṇṇaṁ bhāsati.
sn55.7:10.6Evamassāyaṁ vacīsamācāro tikoṭiparisuddho hoti.
sn55.7:10.7So buddhe aveccappasādena samannāgato hoti—
sn55.7:11.1itipi so bhagavā …pe… satthā devamanussānaṁ buddho bhagavāti;
sn55.7:11.2dhamme …pe…
sn55.7:11.3saṅghe aveccappasādena samannāgato hoti suppaṭipanno bhagavato sāvakasaṅgho …pe… anuttaraṁ puññakkhettaṁ lokassāti.
sn55.7:11.4ariyakantehi sīlehi samannāgato hoti akhaṇḍehi …pe… samādhisaṁvattanikehi.
sn55.7:11.5Yato kho, gahapatayo, ariyasāvako imehi sattahi saddhammehi samannāgato hoti imehi catūhi ākaṅkhiyehi ṭhānehi, so ākaṅkhamāno attanāva attānaṁ byākareyya:
sn55.7:11.6‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’”ti.
sn55.7:11.7Evaṁ vutte, veḷudvāreyyakā brāhmaṇagahapatikā bhagavantaṁ etadavocuṁ:
sn55.7:12.1“abhikkantaṁ, bho gotama …pe…
sn55.7:12.2ete mayaṁ bhavantaṁ gotamaṁ saraṇaṁ gacchāma dhammañca bhikkhusaṅghañca.
sn55.7:12.3Upāsake no bhavaṁ gotamo dhāretu ajjatagge pāṇupete saraṇaṁ gate”ti.
sn55.7:12.4Sattamaṁ.
sn55.7:12.5