完整巴利原文 · 稳定分页 当前仅加载第 24 阅读页；保留 Bilara 原生段落标识，每页最多 120 段。
Saṁyutta Nikāya 55.24
sn55.24:0.13. Saraṇānivagga
sn55.24:0.2Paṭhamasaraṇānisakkasutta
sn55.24:0.3Kapilavatthunidānaṁ.
sn55.24:1.1Tena kho pana samayena saraṇāni sakko kālaṅkato hoti.
sn55.24:1.2So bhagavatā byākato:
sn55.24:1.3“sotāpanno avinipātadhammo niyato sambodhiparāyaṇo”ti.
sn55.24:1.4Tatra sudaṁ sambahulā sakkā saṅgamma samāgamma ujjhāyanti khīyanti vipācenti:
sn55.24:1.5“acchariyaṁ vata bho, abbhutaṁ vata bho.
sn55.24:1.6Ettha dāni ko na sotāpanno bhavissati.
sn55.24:1.7Yatra hi nāma saraṇāni sakko kālaṅkato;
sn55.24:1.8so bhagavatā byākato:
sn55.24:1.9‘sotāpanno avinipātadhammo niyato sambodhiparāyaṇo’ti.
sn55.24:1.10Saraṇāni sakko sikkhādubbalyamāpādi, majjapānaṁ apāyī”ti.
sn55.24:1.11Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:
sn55.24:2.1“idha, bhante, saraṇāni sakko kālaṅkato.
sn55.24:2.2So bhagavatā byākato:
sn55.24:2.3‘sotāpanno avinipātadhammo niyato sambodhiparāyaṇo’ti.
sn55.24:2.4Tatra sudaṁ, bhante, sambahulā sakkā saṅgamma samāgamma ujjhāyanti khīyanti vipācenti—
sn55.24:2.5acchariyaṁ vata, bho, abbhutaṁ vata, bho.
sn55.24:2.6Ettha dāni ko na sotāpanno bhavissati.
sn55.24:2.7Yatra hi nāma saraṇāni sakko kālaṅkato;
sn55.24:2.8so bhagavatā byākato:
sn55.24:2.9‘sotāpanno avinipātadhammo niyato sambodhiparāyaṇo’ti.
sn55.24:2.10Saraṇāni sakko sikkhādubbalyamāpādi, majjapānaṁ apāyī”ti.
sn55.24:2.11“Yo so, mahānāma, dīgharattaṁ upāsako buddhaṁ saraṇaṁ gato dhammaṁ saraṇaṁ gato saṅghaṁ saraṇaṁ gato, so kathaṁ vinipātaṁ gaccheyya.
sn55.24:3.1Yañhi taṁ, mahānāma, sammā vadamāno vadeyya:
sn55.24:3.2‘dīgharattaṁ upāsako buddhaṁ saraṇaṁ gato dhammaṁ saraṇaṁ gato saṅghaṁ saraṇaṁ gato’ti, saraṇāni sakkaṁ sammā vadamāno vadeyya.
sn55.24:3.3Saraṇāni, mahānāma, sakko dīgharattaṁ upāsako buddhaṁ saraṇaṁ gato dhammaṁ saraṇaṁ gato saṅghaṁ saraṇaṁ gato.
sn55.24:3.4So kathaṁ vinipātaṁ gaccheyya.
sn55.24:3.5Idha, mahānāma, ekacco puggalo buddhe aveccappasādena samannāgato hoti—
sn55.24:4.1itipi so bhagavā …pe… satthā devamanussānaṁ buddho bhagavāti.
sn55.24:4.2Dhamme …pe…
sn55.24:4.3saṅghe …pe…
sn55.24:4.4hāsapañño javanapañño vimuttiyā ca samannāgato.
sn55.24:4.5So āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
sn55.24:4.6Ayampi kho, mahānāma, puggalo parimutto nirayā parimutto tiracchānayoniyā parimutto pettivisayā parimutto apāyaduggativinipātā.
sn55.24:4.7Idha pana, mahānāma, ekacco puggalo buddhe aveccappasādena samannāgato hoti—
sn55.24:5.1itipi so bhagavā …pe… satthā devamanussānaṁ buddho bhagavāti.
sn55.24:5.2Dhamme …pe…
sn55.24:5.3saṅghe …pe…
sn55.24:5.4hāsapañño javanapañño na ca vimuttiyā samannāgato.
sn55.24:5.5So pañcannaṁ orambhāgiyānaṁ saṁyojanānaṁ parikkhayā opapātiko hoti tattha parinibbāyī anāvattidhammo tasmā lokā.
sn55.24:5.6Ayampi kho, mahānāma, puggalo parimutto nirayā parimutto tiracchānayoniyā parimutto pettivisayā parimutto apāyaduggativinipātā.
sn55.24:5.7Idha pana, mahānāma, ekacco puggalo buddhe aveccappasādena samannāgato hoti—
sn55.24:6.1itipi so bhagavā …pe… satthā devamanussānaṁ buddho bhagavāti.
sn55.24:6.2Dhamme …pe…
sn55.24:6.3saṅghe …pe…
sn55.24:6.4na hāsapañño na javanapañño na ca vimuttiyā samannāgato.
sn55.24:6.5So tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmī hoti, sakideva imaṁ lokaṁ āgantvā dukkhassantaṁ karoti.
sn55.24:6.6Ayampi kho, mahānāma, puggalo parimutto nirayā parimutto tiracchānayoniyā parimutto pettivisayā parimutto apāyaduggativinipātā.
sn55.24:6.7Idha pana, mahānāma, ekacco puggalo buddhe aveccappasādena samannāgato hoti—
sn55.24:7.1itipi so bhagavā …pe… satthā devamanussānaṁ buddho bhagavāti;
sn55.24:7.2dhamme …pe…
sn55.24:7.3saṅghe …pe…
sn55.24:7.4na hāsapañño na javanapañño na ca vimuttiyā samannāgato.
sn55.24:7.5So tiṇṇaṁ saṁyojanānaṁ parikkhayā sotāpanno hoti avinipātadhammo niyato sambodhiparāyaṇoti.
sn55.24:7.6Ayampi kho, mahānāma, puggalo parimutto nirayā parimutto tiracchānayoniyā parimutto pettivisayā parimutto apāyaduggativinipātā.
sn55.24:7.7Idha pana, mahānāma, ekacco puggalo na heva kho buddhe aveccappasādena samannāgato hoti …
sn55.24:8.1na dhamme …pe…
sn55.24:8.2na saṅghe …pe…
sn55.24:8.3na hāsapañño na javanapañño na ca vimuttiyā samannāgato.
sn55.24:8.4Api cassa ime dhammā honti—
sn55.24:8.5saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
sn55.24:8.6Tathāgatappaveditā cassa dhammā paññāya mattaso nijjhānaṁ khamanti.
sn55.24:8.7Ayampi kho, mahānāma, puggalo agantā nirayaṁ agantā tiracchānayoniṁ agantā pettivisayaṁ agantā apāyaṁ duggatiṁ vinipātaṁ.
sn55.24:8.8Idha pana, mahānāma, ekacco puggalo na heva kho buddhe aveccappasādena samannāgato hoti …
sn55.24:9.1na dhamme …pe…
sn55.24:9.2na saṅghe …pe…
sn55.24:9.3na hāsapañño na javanapañño na ca vimuttiyā samannāgato,
sn55.24:9.4api cassa ime dhammā honti
sn55.24:9.5saddhindriyaṁ …pe… paññindriyaṁ.
sn55.24:9.6Tathāgate cassa saddhāmattaṁ hoti pemamattaṁ.
sn55.24:9.7Ayampi kho, mahānāma, puggalo agantā nirayaṁ agantā tiracchānayoniṁ agantā pettivisayaṁ agantā apāyaṁ duggatiṁ vinipātaṁ.
sn55.24:9.8Ime cepi, mahānāma, mahāsālā subhāsitaṁ dubbhāsitaṁ ājāneyyuṁ, ime cāhaṁ mahāsāle byākareyyaṁ: ‘sotāpannā avinipātadhammā niyatā sambodhiparāyaṇā’ti;
sn55.24:9.9kimaṅgaṁ pana saraṇāniṁ sakkaṁ.
sn55.24:9.10Saraṇāni, mahānāma, sakko maraṇakāle sikkhaṁ samādiyī”ti.
sn55.24:9.11Catutthaṁ.
sn55.24:9.12