完整巴利原文 · 稳定分页 当前仅加载第 19 阅读页；保留 Bilara 原生段落标识，每页最多 120 段。
Saṁyutta Nikāya 55.19
sn55.19:0.12. Rājakārāmavagga
sn55.19:0.2Dutiyadevacārikasutta
sn55.19:0.3Sāvatthinidānaṁ.
sn55.19:1.1Atha kho āyasmā mahāmoggallāno—seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evameva—jetavane antarahito devesu tāvatiṁsesu pāturahosi.
sn55.19:1.2Atha kho sambahulā tāvatiṁsakāyikā devatāyo yenāyasmā mahāmoggallāno tenupasaṅkamiṁsu; upasaṅkamitvā āyasmantaṁ mahāmoggallānaṁ abhivādetvā ekamantaṁ aṭṭhaṁsu. Ekamantaṁ ṭhitā kho tā devatāyo āyasmā mahāmoggallāno etadavoca:
sn55.19:1.3“Sādhu kho, āvuso, buddhe aveccappasādena samannāgamanaṁ hoti—
sn55.19:2.1itipi so bhagavā …pe… satthā devamanussānaṁ buddho bhagavāti.
sn55.19:2.2Buddhe aveccappasādena samannāgamanahetu kho, āvuso, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapannā.
sn55.19:2.3Sādhu kho, āvuso, dhamme …pe…
sn55.19:2.4saṅghe …pe…
sn55.19:2.5ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.
sn55.19:2.6Ariyakantehi sīlehi samannāgamanahetu kho, āvuso, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapannā”ti.
sn55.19:2.7“Sādhu kho, mārisa moggallāna, buddhe aveccappasādena samannāgamanaṁ hoti—
sn55.19:3.1itipi so bhagavā …pe… satthā devamanussānaṁ buddho bhagavāti.
sn55.19:3.2Buddhe aveccappasādena samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapannā.
sn55.19:3.3Sādhu kho, mārisa moggallāna, dhamme …pe…
sn55.19:3.4saṅghe …pe…
sn55.19:3.5ariyakantehi sīlehi samannāgamanaṁ hoti akhaṇḍehi …pe… samādhisaṁvattanikehi.
sn55.19:3.6Ariyakantehi sīlehi samannāgamanahetu kho, mārisa moggallāna, evam’idhekacce sattā kāyassa bhedā paraṁ maraṇā sugatiṁ saggaṁ lokaṁ upapannā”ti.
sn55.19:3.7Navamaṁ.
sn55.19:3.8