完整巴利原文 · 稳定分页 当前仅加载第 52 阅读页；保留 Bilara 原生段落标识，每页最多 120 段。
Saṁyutta Nikāya 55.52
sn55.52:0.16. Sappaññavagga
sn55.52:0.2Vassaṁvutthasutta
sn55.52:0.3Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.
sn55.52:1.1Tena kho pana samayena aññataro bhikkhu sāvatthiyaṁ vassaṁvuttho kapilavatthuṁ anuppatto hoti kenacideva karaṇīyena.
sn55.52:1.2Assosuṁ kho kāpilavatthavā sakyā: “aññataro kira bhikkhu sāvatthiyaṁ vassaṁvuttho kapilavatthuṁ anuppatto”ti.
sn55.52:1.3Atha kho kāpilavatthavā sakyā yena so bhikkhu tenupasaṅkamiṁsu; upasaṅkamitvā taṁ bhikkhuṁ abhivādetvā ekamantaṁ nisīdiṁsu. Ekamantaṁ nisinnā kho kāpilavatthavā sakyā taṁ bhikkhuṁ etadavocuṁ:
sn55.52:2.1“kacci, bhante, bhagavā arogo ceva balavā cā”ti?
sn55.52:2.2“Arogo cāvuso, bhagavā balavā cā”ti.
sn55.52:2.3“Kacci pana, bhante, sāriputtamoggallānā arogā ceva balavanto cā”ti?
sn55.52:3.1“Sāriputtamoggallānāpi kho, āvuso, arogā ceva balavanto cā”ti.
sn55.52:3.2“Kacci pana, bhante, bhikkhusaṅgho arogo ca balavā cā”ti.
sn55.52:4.1“Bhikkhusaṅghopi kho, āvuso, arogo ca balavā cā”ti.
sn55.52:4.2“Atthi pana te, bhante, kiñci iminā antaravassena bhagavato sammukhā sutaṁ sammukhā paṭiggahitan”ti?
sn55.52:5.1“Sammukhā metaṁ, āvuso, bhagavato sutaṁ sammukhā paṭiggahitaṁ:
sn55.52:5.2‘appakā te, bhikkhave, bhikkhū ye āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharanti.
sn55.52:5.3Atha kho eteva bahutarā bhikkhū ye pañcannaṁ orambhāgiyānaṁ saṁyojanānaṁ parikkhayā opapātikā tattha parinibbāyino anāvattidhammā tasmā lokā’ti.
sn55.52:5.4Aparampi kho me, āvuso, bhagavato sammukhā sutaṁ sammukhā paṭiggahitaṁ:
sn55.52:6.1‘appakā te, bhikkhave, bhikkhū ye pañcannaṁ orambhāgiyānaṁ saṁyojanānaṁ parikkhayā opapātikā tattha parinibbāyino anāvattidhammā tasmā lokā.
sn55.52:6.2Atha kho eteva bahutarā bhikkhū ye tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmino, sakideva imaṁ lokaṁ āgantvā dukkhassantaṁ karissantī’ti.
sn55.52:6.3Aparampi kho me, āvuso, bhagavato sammukhā sutaṁ sammukhā paṭiggahitaṁ:
sn55.52:7.1‘appakā te, bhikkhave, bhikkhū ye tiṇṇaṁ saṁyojanānaṁ parikkhayā rāgadosamohānaṁ tanuttā sakadāgāmino, sakideva imaṁ lokaṁ āgantvā dukkhassantaṁ karissanti.
sn55.52:7.2Atha kho eteva bahutarā bhikkhū ye tiṇṇaṁ saṁyojanānaṁ parikkhayā sotāpannā avinipātadhammā niyatā sambodhiparāyaṇā’”ti.
sn55.52:7.3Dutiyaṁ.
sn55.52:7.4