完整巴利原文 · 稳定分页 当前仅加载第 34 阅读页；保留 Bilara 原生段落标识，每页最多 120 段。
Saṁyutta Nikāya 12.33
sn12.33:0.14. Kaḷārakhattiyavagga
sn12.33:0.2Ñāṇavatthusutta
sn12.33:0.3Sāvatthiyaṁ …
sn12.33:1.1“Catucattārīsaṁ vo, bhikkhave, ñāṇavatthūni desessāmi,
sn12.33:1.2taṁ suṇātha, sādhukaṁ manasi karotha, bhāsissāmī”ti.
sn12.33:1.3“Evaṁ, bhante”ti kho te bhikkhū bhagavato paccassosuṁ.
sn12.33:1.4Bhagavā etadavoca:
sn12.33:1.5“Katamāni, bhikkhave, catucattārīsaṁ ñāṇavatthūni?
sn12.33:2.1Jarāmaraṇe ñāṇaṁ, jarāmaraṇasamudaye ñāṇaṁ, jarāmaraṇanirodhe ñāṇaṁ, jarāmaraṇanirodhagāminiyā paṭipadāya ñāṇaṁ;
sn12.33:2.2jātiyā ñāṇaṁ, jātisamudaye ñāṇaṁ, jātinirodhe ñāṇaṁ, jātinirodhagāminiyā paṭipadāya ñāṇaṁ;
sn12.33:2.3bhave ñāṇaṁ, bhavasamudaye ñāṇaṁ, bhavanirodhe ñāṇaṁ, bhavanirodhagāminiyā paṭipadāya ñāṇaṁ;
sn12.33:2.4upādāne ñāṇaṁ, upādānasamudaye ñāṇaṁ, upādānanirodhe ñāṇaṁ, upādānanirodhagāminiyā paṭipadāya ñāṇaṁ;
sn12.33:2.5taṇhāya ñāṇaṁ, taṇhāsamudaye ñāṇaṁ, taṇhānirodhe ñāṇaṁ, taṇhānirodhagāminiyā paṭipadāya ñāṇaṁ;
sn12.33:2.6vedanāya ñāṇaṁ, vedanāsamudaye ñāṇaṁ, vedanānirodhe ñāṇaṁ, vedanānirodhagāminiyā paṭipadāya ñāṇaṁ;
sn12.33:2.7phasse ñāṇaṁ …pe…
sn12.33:2.8saḷāyatane ñāṇaṁ …
sn12.33:2.9nāmarūpe ñāṇaṁ …
sn12.33:2.10viññāṇe ñāṇaṁ …
sn12.33:2.11saṅkhāresu ñāṇaṁ, saṅkhārasamudaye ñāṇaṁ, saṅkhāranirodhe ñāṇaṁ, saṅkhāranirodhagāminiyā paṭipadāya ñāṇaṁ.
sn12.33:2.12Imāni vuccanti, bhikkhave, catucattārīsaṁ ñāṇavatthūni.
sn12.33:2.13Katamañca, bhikkhave, jarāmaraṇaṁ?
sn12.33:3.1Yā tesaṁ tesaṁ sattānaṁ tamhi tamhi sattanikāye jarā jīraṇatā khaṇḍiccaṁ pāliccaṁ valittacatā āyuno saṁhāni indriyānaṁ paripāko,
sn12.33:3.2ayaṁ vuccati jarā.
sn12.33:3.3Yā tesaṁ tesaṁ sattānaṁ tamhā tamhā sattanikāyā cuti cavanatā bhedo antaradhānaṁ maccu maraṇaṁ kālakiriyā khandhānaṁ bhedo kaḷevarassa nikkhepo.
sn12.33:3.4Idaṁ vuccati maraṇaṁ.
sn12.33:3.5Iti ayañca jarā, idañca maraṇaṁ;
sn12.33:3.6idaṁ vuccati, bhikkhave, jarāmaraṇaṁ.
sn12.33:3.7Jātisamudayā jarāmaraṇasamudayo;
sn12.33:4.1jātinirodhā jarāmaraṇanirodho;
sn12.33:4.2ayameva ariyo aṭṭhaṅgiko maggo jarāmaraṇanirodhagāminī paṭipadā, seyyathidaṁ—
sn12.33:4.3sammādiṭṭhi …pe… sammāsamādhi.
sn12.33:4.4Yato kho, bhikkhave, ariyasāvako evaṁ jarāmaraṇaṁ pajānāti, evaṁ jarāmaraṇasamudayaṁ pajānāti, evaṁ jarāmaraṇanirodhaṁ pajānāti, evaṁ jarāmaraṇanirodhagāminiṁ paṭipadaṁ pajānāti, idamassa dhamme ñāṇaṁ.
sn12.33:5.1So iminā dhammena diṭṭhena viditena akālikena pattena pariyogāḷhena atītānāgate nayaṁ neti.
sn12.33:5.2Ye kho keci atītamaddhānaṁ samaṇā vā brāhmaṇā vā jarāmaraṇaṁ abbhaññaṁsu, jarāmaraṇasamudayaṁ abbhaññaṁsu, jarāmaraṇanirodhaṁ abbhaññaṁsu, jarāmaraṇanirodhagāminiṁ paṭipadaṁ abbhaññaṁsu, sabbete evameva abbhaññaṁsu, seyyathāpāhaṁ etarahi.
sn12.33:6.1Yepi hi keci anāgatamaddhānaṁ samaṇā vā brāhmaṇā vā jarāmaraṇaṁ abhijānissanti, jarāmaraṇasamudayaṁ abhijānissanti, jarāmaraṇanirodhaṁ abhijānissanti, jarāmaraṇanirodhagāminiṁ paṭipadaṁ abhijānissanti, sabbete evameva abhijānissanti, seyyathāpāhaṁ etarahīti.
sn12.33:7.1Idamassa anvaye ñāṇaṁ.
sn12.33:7.2Yato kho, bhikkhave, ariyasāvakassa imāni dve ñāṇāni parisuddhāni honti pariyodātāni—
sn12.33:8.1dhamme ñāṇañca anvaye ñāṇañca.
sn12.33:8.2Ayaṁ vuccati, bhikkhave, ariyasāvako diṭṭhisampanno itipi, dassanasampanno itipi, āgato imaṁ saddhammaṁ itipi, passati imaṁ saddhammaṁ itipi, sekkhena ñāṇena samannāgato itipi, sekkhāya vijjāya samannāgato itipi, dhammasotaṁ samāpanno itipi, ariyo nibbedhikapañño itipi, amatadvāraṁ āhacca tiṭṭhati itipīti.
sn12.33:8.3Katamā ca, bhikkhave, jāti …
sn12.33:9.1katamo ca, bhikkhave, bhavo …
sn12.33:9.2katamañca, bhikkhave, upādānaṁ …
sn12.33:9.3katamā ca, bhikkhave, taṇhā …
sn12.33:9.4katamā ca, bhikkhave, vedanā …
sn12.33:9.5katamo ca, bhikkhave, phasso …
sn12.33:9.6katamañca, bhikkhave, saḷāyatanaṁ …
sn12.33:9.7katamañca, bhikkhave, nāmarūpaṁ …
sn12.33:9.8katamañca, bhikkhave, viññāṇaṁ …
sn12.33:9.9katame ca, bhikkhave, saṅkhārā?
sn12.33:9.10Tayome, bhikkhave, saṅkhārā—
sn12.33:9.11kāyasaṅkhāro, vacīsaṅkhāro, cittasaṅkhāroti.
sn12.33:9.12Ime vuccanti, bhikkhave, saṅkhārā.
sn12.33:9.13Avijjāsamudayā saṅkhārasamudayo;
sn12.33:10.1avijjānirodhā saṅkhāranirodho;
sn12.33:10.2ayameva ariyo aṭṭhaṅgiko maggo saṅkhāranirodhagāminī paṭipadā, seyyathidaṁ—
sn12.33:10.3sammādiṭṭhi …pe… sammāsamādhi.
sn12.33:10.4Yato kho, bhikkhave, ariyasāvako evaṁ saṅkhāre pajānāti, evaṁ saṅkhārasamudayaṁ pajānāti, evaṁ saṅkhāranirodhaṁ pajānāti, evaṁ saṅkhāranirodhagāminiṁ paṭipadaṁ pajānāti, idamassa dhamme ñāṇaṁ.
sn12.33:11.1So iminā dhammena diṭṭhena viditena akālikena pattena pariyogāḷhena atītānāgate nayaṁ neti.
sn12.33:11.2Ye kho keci atītamaddhānaṁ samaṇā vā brāhmaṇā vā saṅkhāre abbhaññaṁsu, saṅkhārasamudayaṁ abbhaññaṁsu, saṅkhāranirodhaṁ abbhaññaṁsu, saṅkhāranirodhagāminiṁ paṭipadaṁ abbhaññaṁsu, sabbete evameva abbhaññaṁsu, seyyathāpāhaṁ etarahi.
sn12.33:12.1Ye hipi keci anāgatamaddhānaṁ samaṇā vā brāhmaṇā vā saṅkhāre abhijānissanti, saṅkhārasamudayaṁ abhijānissanti, saṅkhāranirodhaṁ abhijānissanti, saṅkhāranirodhagāminiṁ paṭipadaṁ abhijānissanti, sabbete evameva abhijānissanti, seyyathāpāhaṁ etarahi.
sn12.33:13.1Idamassa anvaye ñāṇaṁ.
sn12.33:13.2Yato kho, bhikkhave, ariyasāvakassa imāni dve ñāṇāni parisuddhāni honti pariyodātāni—
sn12.33:14.1dhamme ñāṇañca anvaye ñāṇañca.
sn12.33:14.2Ayaṁ vuccati, bhikkhave, ariyasāvako diṭṭhisampanno itipi, dassanasampanno itipi, āgato imaṁ saddhammaṁ itipi, passati imaṁ saddhammaṁ itipi, sekkhena ñāṇena samannāgato itipi, sekkhāya vijjāya samannāgato itipi, dhammasotaṁ samāpanno itipi, ariyo nibbedhikapañño itipi, amatadvāraṁ āhacca tiṭṭhati itipī”ti.
sn12.33:14.3Tatiyaṁ.
sn12.33:14.4