完整巴利原文 · 稳定分页 当前仅加载第 44 阅读页；保留 Bilara 原生段落标识，每页最多 120 段。
Saṁyutta Nikāya 12.43
sn12.43:0.15. Gahapativagga
sn12.43:0.2Dukkhasutta
sn12.43:0.3Sāvatthiyaṁ viharati.
sn12.43:1.1“Dukkhassa, bhikkhave, samudayañca atthaṅgamañca desessāmi.
sn12.43:1.2Taṁ suṇātha, sādhukaṁ manasi karotha, bhāsissāmī”ti.
sn12.43:1.3“Evaṁ, bhante”ti kho te bhikkhū bhagavato paccassosuṁ.
sn12.43:1.4Bhagavā etadavoca:
sn12.43:1.5“Katamo ca, bhikkhave, dukkhassa samudayo?
sn12.43:2.1Cakkhuñca paṭicca rūpe ca uppajjati cakkhuviññāṇaṁ. Tiṇṇaṁ saṅgati phasso.
sn12.43:2.2Phassapaccayā vedanā;
sn12.43:2.3vedanāpaccayā taṇhā.
sn12.43:2.4Ayaṁ kho, bhikkhave, dukkhassa samudayo.
sn12.43:2.5Sotañca paṭicca sadde ca uppajjati sotaviññāṇaṁ …pe…
sn12.43:3.1ghānañca paṭicca gandhe ca …pe…
sn12.43:3.2jivhañca paṭicca rase ca …pe…
sn12.43:3.3kāyañca paṭicca phoṭṭhabbe ca …pe…
sn12.43:3.4manañca paṭicca dhamme ca uppajjati manoviññāṇaṁ. Tiṇṇaṁ saṅgati phasso.
sn12.43:3.5Phassapaccayā vedanā;
sn12.43:3.6vedanāpaccayā taṇhā.
sn12.43:3.7Ayaṁ kho, bhikkhave, dukkhassa samudayo.
sn12.43:3.8Katamo ca, bhikkhave, dukkhassa atthaṅgamo?
sn12.43:4.1Cakkhuñca paṭicca rūpe ca uppajjati cakkhuviññāṇaṁ. Tiṇṇaṁ saṅgati phasso.
sn12.43:4.2Phassapaccayā vedanā;
sn12.43:4.3vedanāpaccayā taṇhā.
sn12.43:4.4Tassāyeva taṇhāya asesavirāganirodhā upādānanirodho;
sn12.43:4.5upādānanirodhā bhavanirodho;
sn12.43:4.6bhavanirodhā jātinirodho;
sn12.43:4.7jātinirodhā jarāmaraṇaṁ sokaparidevadukkhadomanassupāyāsā nirujjhanti.
sn12.43:4.8Evametassa kevalassa dukkhakkhandhassa nirodho hoti.
sn12.43:4.9Ayaṁ kho, bhikkhave, dukkhassa atthaṅgamo.
sn12.43:4.10Sotañca paṭicca sadde ca uppajjati sotaviññāṇaṁ …pe…
sn12.43:5.1ghānañca paṭicca gandhe ca …pe…
sn12.43:5.2jivhañca paṭicca rase ca …pe…
sn12.43:5.3kāyañca paṭicca phoṭṭhabbe ca …pe…
sn12.43:5.4manañca paṭicca dhamme ca uppajjati manoviññāṇaṁ. Tiṇṇaṁ saṅgati phasso.
sn12.43:5.5Phassapaccayā vedanā;
sn12.43:5.6vedanāpaccayā taṇhā.
sn12.43:5.7Tassāyeva taṇhāya asesavirāganirodhā upādānanirodho;
sn12.43:5.8upādānanirodhā bhavanirodho;
sn12.43:5.9bhavanirodhā jātinirodho;
sn12.43:5.10jātinirodhā jarāmaraṇaṁ sokaparidevadukkhadomanassupāyāsā nirujjhanti.
sn12.43:5.11Evametassa kevalassa dukkhakkhandhassa nirodho hoti.
sn12.43:5.12Ayaṁ kho, bhikkhave, dukkhassa atthaṅgamo”ti.
sn12.43:5.13Tatiyaṁ.
sn12.43:5.14