完整巴利原文 · 稳定分页 当前仅加载第 68 阅读页；保留 Bilara 原生段落标识，每页最多 120 段。
Saṁyutta Nikāya 12.67
sn12.67:0.17. Mahāvagga
sn12.67:0.2Naḷakalāpīsutta
sn12.67:0.3Ekaṁ samayaṁ āyasmā ca sāriputto āyasmā ca mahākoṭṭhiko bārāṇasiyaṁ viharanti isipatane migadāye.
sn12.67:1.1Atha kho āyasmā mahākoṭṭhiko sāyanhasamayaṁ paṭisallānā vuṭṭhito yenāyasmā sāriputto tenupasaṅkami; upasaṅkamitvā āyasmatā sāriputtena saddhiṁ sammodi.
sn12.67:1.2Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā mahākoṭṭhiko āyasmantaṁ sāriputtaṁ etadavoca:
sn12.67:1.3“kiṁ nu kho, āvuso sāriputta, sayaṅkataṁ jarāmaraṇaṁ, paraṅkataṁ jarāmaraṇaṁ, sayaṅkatañca paraṅkatañca jarāmaraṇaṁ, udāhu asayaṅkāraṁ aparaṅkāraṁ adhiccasamuppannaṁ jarāmaraṇan”ti?
sn12.67:1.4“Na kho, āvuso koṭṭhika, sayaṅkataṁ jarāmaraṇaṁ, na paraṅkataṁ jarāmaraṇaṁ, na sayaṅkatañca paraṅkatañca jarāmaraṇaṁ, nāpi asayaṅkāraṁ aparaṅkāraṁ adhiccasamuppannaṁ jarāmaraṇaṁ.
sn12.67:1.5Api ca jātipaccayā jarāmaraṇan”ti.
sn12.67:1.6“Kiṁ nu kho, āvuso sāriputta, sayaṅkatā jāti, paraṅkatā jāti, sayaṅkatā ca paraṅkatā ca jāti, udāhu asayaṅkārā aparaṅkārā adhiccasamuppannā jātī”ti?
sn12.67:2.1“Na kho, āvuso koṭṭhika, sayaṅkatā jāti, na paraṅkatā jāti, na sayaṅkatā ca paraṅkatā ca jāti, nāpi asayaṅkārā aparaṅkārā adhiccasamuppannā jāti.
sn12.67:2.2Api ca bhavapaccayā jātī”ti.
sn12.67:2.3“Kiṁ nu kho, āvuso sāriputta, sayaṅkato bhavo …pe…
sn12.67:3.1sayaṅkataṁ upādānaṁ …
sn12.67:3.2sayaṅkatā taṇhā …
sn12.67:3.3sayaṅkatā vedanā …
sn12.67:3.4sayaṅkato phasso …
sn12.67:3.5sayaṅkataṁ saḷāyatanaṁ …
sn12.67:3.6sayaṅkataṁ nāmarūpaṁ, paraṅkataṁ nāmarūpaṁ, sayaṅkatañca paraṅkatañca nāmarūpaṁ, udāhu asayaṅkāraṁ aparaṅkāraṁ adhiccasamuppannaṁ nāmarūpan”ti?
sn12.67:3.7“Na kho, āvuso koṭṭhika, sayaṅkataṁ nāmarūpaṁ, na paraṅkataṁ nāmarūpaṁ, na sayaṅkatañca paraṅkatañca nāmarūpaṁ, nāpi asayaṅkāraṁ aparaṅkāraṁ, adhiccasamuppannaṁ nāmarūpaṁ.
sn12.67:3.8Api ca viññāṇapaccayā nāmarūpan”ti.
sn12.67:3.9“Kiṁ nu kho, āvuso sāriputta, sayaṅkataṁ viññāṇaṁ, paraṅkataṁ viññāṇaṁ, sayaṅkatañca paraṅkatañca viññāṇaṁ, udāhu asayaṅkāraṁ aparaṅkāraṁ adhiccasamuppannaṁ viññāṇan”ti?
sn12.67:4.1“Na kho, āvuso koṭṭhika, sayaṅkataṁ viññāṇaṁ, na paraṅkataṁ viññāṇaṁ, na sayaṅkatañca paraṅkatañca viññāṇaṁ, nāpi asayaṅkāraṁ aparaṅkāraṁ adhiccasamuppannaṁ viññāṇaṁ.
sn12.67:4.2Api ca nāmarūpapaccayā viññāṇan”ti.
sn12.67:4.3“Idāneva kho mayaṁ āyasmato sāriputtassa bhāsitaṁ evaṁ ājānāma:
sn12.67:5.1‘na khvāvuso koṭṭhika, sayaṅkataṁ nāmarūpaṁ, na paraṅkataṁ nāmarūpaṁ, na sayaṅkatañca paraṅkatañca nāmarūpaṁ, nāpi asayaṅkāraṁ aparaṅkāraṁ adhiccasamuppannaṁ nāmarūpaṁ.
sn12.67:5.2Api ca viññāṇapaccayā nāmarūpan’ti.
sn12.67:5.3Idāneva ca pana mayaṁ āyasmato sāriputtassa bhāsitaṁ evaṁ ājānāma:
sn12.67:6.1‘na khvāvuso koṭṭhika, sayaṅkataṁ viññāṇaṁ, na paraṅkataṁ viññāṇaṁ, na sayaṅkatañca paraṅkatañca viññāṇaṁ, nāpi asayaṅkāraṁ aparaṅkāraṁ adhiccasamuppannaṁ viññāṇaṁ.
sn12.67:6.2Api ca nāmarūpapaccayā viññāṇan’ti.
sn12.67:6.3Yathā kathaṁ panāvuso sāriputta, imassa bhāsitassa attho daṭṭhabbo”ti?
sn12.67:7.1“Tenahāvuso, upamaṁ te karissāmi.
sn12.67:7.2Upamāyapidhekacce viññū purisā bhāsitassa atthaṁ jānanti.
sn12.67:7.3Seyyathāpi, āvuso, dve naḷakalāpiyo aññamaññaṁ nissāya tiṭṭheyyuṁ.
sn12.67:7.4Evameva kho, āvuso, nāmarūpapaccayā viññāṇaṁ;
sn12.67:7.5viññāṇapaccayā nāmarūpaṁ;
sn12.67:7.6nāmarūpapaccayā saḷāyatanaṁ;
sn12.67:7.7saḷāyatanapaccayā phasso …pe…
sn12.67:7.8evametassa kevalassa dukkhakkhandhassa samudayo hoti.
sn12.67:7.9Tāsañce, āvuso, naḷakalāpīnaṁ ekaṁ ākaḍḍheyya, ekā papateyya;
sn12.67:7.10aparañce ākaḍḍheyya, aparā papateyya.
sn12.67:7.11Evameva kho, āvuso, nāmarūpanirodhā viññāṇanirodho;
sn12.67:7.12viññāṇanirodhā nāmarūpanirodho;
sn12.67:7.13nāmarūpanirodhā saḷāyatananirodho;
sn12.67:7.14saḷāyatananirodhā phassanirodho …pe…
sn12.67:7.15evametassa kevalassa dukkhakkhandhassa nirodho hotī”ti.
sn12.67:7.16“Acchariyaṁ, āvuso sāriputta;
sn12.67:8.1abbhutaṁ, āvuso sāriputta.
sn12.67:8.2Yāvasubhāsitañcidaṁ āyasmatā sāriputtena.
sn12.67:8.3Idañca pana mayaṁ āyasmato sāriputtassa bhāsitaṁ imehi chattiṁsāya vatthūhi anumodāma:
sn12.67:8.4‘Jarāmaraṇassa ce, āvuso, bhikkhu nibbidāya virāgāya nirodhāya dhammaṁ deseti, dhammakathiko bhikkhūti alaṁvacanāya.
sn12.67:9.1Jarāmaraṇassa ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṁvacanāya.
sn12.67:9.2Jarāmaraṇassa ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṁvacanāya.
sn12.67:9.3Jātiyā ce …
sn12.67:9.4bhavassa ce …
sn12.67:9.5upādānassa ce …
sn12.67:9.6taṇhāya ce …
sn12.67:9.7vedanāya ce …
sn12.67:9.8phassassa ce …
sn12.67:9.9saḷāyatanassa ce …
sn12.67:9.10nāmarūpassa ce …
sn12.67:9.11viññāṇassa ce …
sn12.67:9.12saṅkhārānañce …
sn12.67:9.13avijjāya ce, āvuso, bhikkhu nibbidāya virāgāya nirodhāya dhammaṁ deseti, dhammakathiko bhikkhūti alaṁvacanāya.
sn12.67:9.14Avijjāya ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṁvacanāya.
sn12.67:9.15Avijjāya ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṁvacanāyā’”ti.
sn12.67:9.16Sattamaṁ.
sn12.67:9.17