Saṁyutta Nikāya 12 · SN12.41 · Pañcaverabhayasutta

完整巴利原文 · 稳定分页　当前仅加载第 42 阅读页；保留 Bilara 原生段落标识，每页最多 120 段。

0.1

Saṁyutta Nikāya 12.41

sn12.41:0.1

0.2

5. Gahapativagga

sn12.41:0.2

0.3

Pañcaverabhayasutta

sn12.41:0.3

1.1

Sāvatthiyaṁ viharati.

sn12.41:1.1

1.2

Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:

sn12.41:1.2

2.1

“Yato kho, gahapati, ariyasāvakassa pañca bhayāni verāni vūpasantāni honti, catūhi ca sotāpattiyaṅgehi samannāgato hoti, ariyo cassa ñāyo paññāya sudiṭṭho hoti suppaṭividdho, so ākaṅkhamāno attanāva attānaṁ byākareyya:

sn12.41:2.1

2.2

‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyano’ti.

sn12.41:2.2

3.1

Katamāni pañca bhayāni verāni vūpasantāni honti?

sn12.41:3.1

3.2

Yaṁ, gahapati, pāṇātipātī pāṇātipātapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedayati, pāṇātipātā paṭiviratassa evaṁ taṁ bhayaṁ veraṁ vūpasantaṁ hoti.

sn12.41:3.2

4.1

Yaṁ, gahapati, adinnādāyī adinnādānapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedayati, adinnādānā paṭiviratassa evaṁ taṁ bhayaṁ veraṁ vūpasantaṁ hoti.

sn12.41:4.1

5.1

Yaṁ, gahapati, kāmesumicchācārī kāmesumicchācārapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedayati, kāmesumicchācārā paṭiviratassa evaṁ taṁ bhayaṁ veraṁ vūpasantaṁ hoti.

sn12.41:5.1

6.1

Yaṁ, gahapati, musāvādī musāvādapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedayati, musāvādā paṭiviratassa evaṁ taṁ bhayaṁ veraṁ vūpasantaṁ hoti.

sn12.41:6.1

7.1

Yaṁ, gahapati, surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikampi bhayaṁ veraṁ pasavati, samparāyikampi bhayaṁ veraṁ pasavati, cetasikampi dukkhaṁ domanassaṁ paṭisaṁvedayati, surāmerayamajjapamādaṭṭhānā paṭiviratassa evaṁ taṁ bhayaṁ veraṁ vūpasantaṁ hoti.

sn12.41:7.1

7.2

Imāni pañca bhayāni verāni vūpasantāni honti.

sn12.41:7.2

8.1

Katamehi catūhi sotāpattiyaṅgehi samannāgato hoti?

sn12.41:8.1

8.2

Idha, gahapati, ariyasāvako buddhe aveccappasādena samannāgato hoti:

sn12.41:8.2

8.3

‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.

sn12.41:8.3

9.1

Dhamme aveccappasādena samannāgato hoti:

sn12.41:9.1

9.2

‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.

sn12.41:9.2

10.1

Saṅghe aveccappasādena samannāgato hoti:

sn12.41:10.1

10.2

‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.

sn12.41:10.2

11.1

Ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.

sn12.41:11.1

11.2

Imehi catūhi sotāpattiyaṅgehi samannāgato hoti.

sn12.41:11.2

12.1

Katamo cassa ariyo ñāyo paññāya sudiṭṭho hoti suppaṭividdho?

sn12.41:12.1

12.2

Idha, gahapati, ariyasāvako paṭiccasamuppādaññeva sādhukaṁ yoniso manasi karoti:

sn12.41:12.2

12.3

‘iti imasmiṁ sati idaṁ hoti, imasmiṁ asati idaṁ na hoti;

sn12.41:12.3

12.4

imassuppādā idaṁ uppajjati, imassa nirodhā idaṁ nirujjhati.

sn12.41:12.4

12.5

Yadidaṁ avijjāpaccayā saṅkhārā;

sn12.41:12.5

12.6

saṅkhārapaccayā viññāṇaṁ …pe…

sn12.41:12.6

12.7

evametassa kevalassa dukkhakkhandhassa samudayo hoti.

sn12.41:12.7

12.8

Avijjāya tveva asesavirāganirodhā saṅkhāranirodho;

sn12.41:12.8

12.9

saṅkhāranirodhā viññāṇanirodho …pe…

sn12.41:12.9

12.10

evametassa kevalassa dukkhakkhandhassa nirodho hoti.

sn12.41:12.10

12.11

Ayamassa ariyo ñāyo paññāya sudiṭṭho hoti suppaṭividdho.

sn12.41:12.11

13.1

Yato kho, gahapati, ariyasāvakassa imāni pañca bhayāni verāni vūpasantāni honti, imehi catūhi sotāpattiyaṅgehi samannāgato hoti, ayañcassa ariyo ñāyo paññāya sudiṭṭho hoti suppaṭividdho, so ākaṅkhamāno attanāva attānaṁ byākareyya:

sn12.41:13.1

13.2

‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyano’”ti.

sn12.41:13.2

13.3

Paṭhamaṁ.

sn12.41:13.3