完整巴利原文 · 稳定分页 当前仅加载第 67 阅读页；保留 Bilara 原生段落标识，每页最多 120 段。
Saṁyutta Nikāya 12.66
sn12.66:0.17. Mahāvagga
sn12.66:0.2Sammasasutta
sn12.66:0.3Evaṁ me sutaṁ—
sn12.66:1.1ekaṁ samayaṁ bhagavā kurūsu viharati kammāsadhammaṁ nāma kurūnaṁ nigamo.
sn12.66:1.2Tatra kho bhagavā bhikkhū āmantesi:
sn12.66:1.3“bhikkhavo”ti.
sn12.66:1.4“Bhadante”ti te bhikkhū bhagavato paccassosuṁ.
sn12.66:1.5Bhagavā etadavoca:
sn12.66:1.6“sammasatha no tumhe, bhikkhave, antaraṁ sammasan”ti.
sn12.66:1.7Evaṁ vutte, aññataro bhikkhu bhagavantaṁ etadavoca:
sn12.66:1.8“ahaṁ kho, bhante, sammasāmi antaraṁ sammasan”ti.
sn12.66:1.9“Yathā kathaṁ pana tvaṁ, bhikkhu, sammasasi antaraṁ sammasan”ti?
sn12.66:1.10Atha kho so bhikkhu byākāsi.
sn12.66:1.11Yathā so bhikkhu byākāsi na so bhikkhu bhagavato cittaṁ ārādhesi.
sn12.66:1.12Evaṁ vutte, āyasmā ānando bhagavantaṁ etadavoca:
sn12.66:2.1“etassa, bhagavā, kālo; etassa, sugata, kālo;
sn12.66:2.2yaṁ bhagavā antaraṁ sammasaṁ bhāseyya. Bhagavato sutvā bhikkhū dhāressantī”ti.
sn12.66:2.3“Tenahānanda, suṇātha, sādhukaṁ manasi karotha, bhāsissāmī”ti.
sn12.66:2.4“Evaṁ, bhante”ti kho te bhikkhū bhagavato paccassosuṁ.
sn12.66:2.5Bhagavā etadavoca:
sn12.66:2.6“Idha, bhikkhave, bhikkhu sammasamāno sammasati antaraṁ sammasaṁ:
sn12.66:3.1‘yaṁ kho idaṁ anekavidhaṁ nānappakārakaṁ dukkhaṁ loke uppajjati jarāmaraṇaṁ.
sn12.66:3.2Idaṁ kho dukkhaṁ kiṁnidānaṁ kiṁsamudayaṁ kiṁjātikaṁ kiṁpabhavaṁ, kismiṁ sati jarāmaraṇaṁ hoti, kismiṁ asati jarāmaraṇaṁ na hotī’ti?
sn12.66:3.3So sammasamāno evaṁ jānāti:
sn12.66:3.4‘yaṁ kho idaṁ anekavidhaṁ nānappakārakaṁ dukkhaṁ loke uppajjati jarāmaraṇaṁ.
sn12.66:3.5Idaṁ kho dukkhaṁ upadhinidānaṁ upadhisamudayaṁ upadhijātikaṁ upadhipabhavaṁ, upadhismiṁ sati jarāmaraṇaṁ hoti, upadhismiṁ asati jarāmaraṇaṁ na hotī’ti.
sn12.66:3.6So jarāmaraṇañca pajānāti jarāmaraṇasamudayañca pajānāti jarāmaraṇanirodhañca pajānāti yā ca jarāmaraṇanirodhasāruppagāminī paṭipadā tañca pajānāti.
sn12.66:3.7Tathāpaṭipanno ca hoti anudhammacārī.
sn12.66:3.8Ayaṁ vuccati, bhikkhave, bhikkhu sabbaso sammā dukkhakkhayāya paṭipanno jarāmaraṇanirodhāya.
sn12.66:3.9Athāparaṁ sammasamāno sammasati antaraṁ sammasaṁ:
sn12.66:4.1‘upadhi panāyaṁ kiṁnidāno kiṁsamudayo kiṁjātiko kiṁpabhavo, kismiṁ sati upadhi hoti, kismiṁ asati upadhi na hotī’ti?
sn12.66:4.2So sammasamāno evaṁ jānāti:
sn12.66:4.3‘upadhi taṇhānidāno taṇhāsamudayo taṇhājātiko taṇhāpabhavo, taṇhāya sati upadhi hoti, taṇhāya asati upadhi na hotī’ti.
sn12.66:4.4So upadhiñca pajānāti upadhisamudayañca pajānāti upadhinirodhañca pajānāti yā ca upadhinirodhasāruppagāminī paṭipadā tañca pajānāti.
sn12.66:4.5Tathāpaṭipanno ca hoti anudhammacārī.
sn12.66:4.6Ayaṁ vuccati, bhikkhave, bhikkhu sabbaso sammā dukkhakkhayāya paṭipanno upadhinirodhāya.
sn12.66:4.7Athāparaṁ sammasamāno sammasati antaraṁ sammasaṁ:
sn12.66:5.1‘taṇhā panāyaṁ kattha uppajjamānā uppajjati, kattha nivisamānā nivisatī’ti?
sn12.66:5.2So sammasamāno evaṁ jānāti—
sn12.66:5.3yaṁ kho loke piyarūpaṁ sātarūpaṁ etthesā taṇhā uppajjamānā uppajjati, ettha nivisamānā nivisati.
sn12.66:5.4Kiñca loke piyarūpaṁ sātarūpaṁ?
sn12.66:5.5Cakkhuṁ loke piyarūpaṁ, sātarūpaṁ, etthesā taṇhā uppajjamānā uppajjati, ettha nivisamānā nivisati.
sn12.66:5.6Sotaṁ loke piyarūpaṁ sātarūpaṁ …pe…
sn12.66:5.7ghānaṁ loke piyarūpaṁ sātarūpaṁ …
sn12.66:5.8jivhā loke piyarūpaṁ sātarūpaṁ …
sn12.66:5.9kāyo loke piyarūpaṁ sātarūpaṁ …
sn12.66:5.10mano loke piyarūpaṁ sātarūpaṁ, etthesā taṇhā uppajjamānā uppajjati ettha nivisamānā nivisati.
sn12.66:5.11Ye hi keci, bhikkhave, atītamaddhānaṁ samaṇā vā brāhmaṇā vā yaṁ loke piyarūpaṁ sātarūpaṁ taṁ niccato addakkhuṁ sukhato addakkhuṁ attato addakkhuṁ ārogyato addakkhuṁ khemato addakkhuṁ.
sn12.66:6.1Te taṇhaṁ vaḍḍhesuṁ.
sn12.66:6.2Ye taṇhaṁ vaḍḍhesuṁ te upadhiṁ vaḍḍhesuṁ.
sn12.66:6.3Ye upadhiṁ vaḍḍhesuṁ te dukkhaṁ vaḍḍhesuṁ.
sn12.66:6.4Ye dukkhaṁ vaḍḍhesuṁ te na parimucciṁsu jātiyā jarāya maraṇena sokehi paridevehi dukkhehi domanassehi upāyāsehi, ‘na parimucciṁsu dukkhasmā’ti vadāmi.
sn12.66:6.5Yepi hi keci, bhikkhave, anāgatamaddhānaṁ samaṇā vā brāhmaṇā vā yaṁ loke piyarūpaṁ sātarūpaṁ taṁ niccato dakkhissanti sukhato dakkhissanti attato dakkhissanti ārogyato dakkhissanti khemato dakkhissanti.
sn12.66:7.1Te taṇhaṁ vaḍḍhissanti.
sn12.66:7.2Ye taṇhaṁ vaḍḍhissanti te upadhiṁ vaḍḍhissanti.
sn12.66:7.3Ye upadhiṁ vaḍḍhissanti te dukkhaṁ vaḍḍhissanti.
sn12.66:7.4Ye dukkhaṁ vaḍḍhissanti te na parimuccissanti jātiyā jarāya maraṇena sokehi paridevehi dukkhehi domanassehi upāyāsehi, ‘na parimuccissanti dukkhasmā’ti vadāmi.
sn12.66:7.5Yepi hi keci, bhikkhave, etarahi samaṇā vā brāhmaṇā vā yaṁ loke piyarūpaṁ sātarūpaṁ taṁ niccato passanti sukhato passanti attato passanti ārogyato passanti khemato passanti.
sn12.66:8.1Te taṇhaṁ vaḍḍhenti.
sn12.66:8.2Ye taṇhaṁ vaḍḍhenti te upadhiṁ vaḍḍhenti.
sn12.66:8.3Ye upadhiṁ vaḍḍhenti te dukkhaṁ vaḍḍhenti.
sn12.66:8.4Ye dukkhaṁ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, ‘na parimuccanti dukkhasmā’ti vadāmi.
sn12.66:8.5Seyyathāpi, bhikkhave, āpānīyakaṁso vaṇṇasampanno gandhasampanno rasasampanno.
sn12.66:9.1So ca kho visena saṁsaṭṭho.
sn12.66:9.2Atha puriso āgaccheyya ghammābhitatto ghammapareto kilanto tasito pipāsito.
sn12.66:9.3Tamenaṁ evaṁ vadeyyuṁ:
sn12.66:9.4‘ayaṁ te, ambho purisa, āpānīyakaṁso vaṇṇasampanno gandhasampanno rasasampanno;
sn12.66:9.5so ca kho visena saṁsaṭṭho.
sn12.66:9.6Sace ākaṅkhasi piva.
sn12.66:9.7Pivato hi kho taṁ chādessati vaṇṇenapi gandhenapi rasenapi, pivitvā ca pana tatonidānaṁ maraṇaṁ vā nigacchasi maraṇamattaṁ vā dukkhan’ti.
sn12.66:9.8So taṁ āpānīyakaṁsaṁ sahasā appaṭisaṅkhā piveyya, nappaṭinissajjeyya.
sn12.66:9.9So tatonidānaṁ maraṇaṁ vā nigaccheyya maraṇamattaṁ vā dukkhaṁ.
sn12.66:9.10Evameva kho, bhikkhave, ye hi keci atītamaddhānaṁ samaṇā vā brāhmaṇā vā yaṁ loke piyarūpaṁ …pe…
sn12.66:9.11anāgatamaddhānaṁ …pe…
sn12.66:9.12etarahi samaṇā vā brāhmaṇā vā yaṁ loke piyarūpaṁ sātarūpaṁ taṁ niccato passanti sukhato passanti attato passanti ārogyato passanti khemato passanti, te taṇhaṁ vaḍḍhenti.
sn12.66:9.13Ye taṇhaṁ vaḍḍhenti te upadhiṁ vaḍḍhenti.
sn12.66:9.14Ye upadhiṁ vaḍḍhenti te dukkhaṁ vaḍḍhenti.
sn12.66:9.15Ye dukkhaṁ vaḍḍhenti te na parimuccanti jātiyā jarāya maraṇena sokehi paridevehi dukkhehi domanassehi upāyāsehi, ‘na parimuccanti dukkhasmā’ti vadāmi.
sn12.66:9.16Ye ca kho keci, bhikkhave, atītamaddhānaṁ samaṇā vā brāhmaṇā vā yaṁ loke piyarūpaṁ sātarūpaṁ taṁ aniccato addakkhuṁ dukkhato addakkhuṁ anattato addakkhuṁ rogato addakkhuṁ bhayato addakkhuṁ,
sn12.66:10.1te taṇhaṁ pajahiṁsu.
sn12.66:10.2Ye taṇhaṁ pajahiṁsu te upadhiṁ pajahiṁsu.
sn12.66:10.3Ye upadhiṁ pajahiṁsu te dukkhaṁ pajahiṁsu.
sn12.66:10.4Ye dukkhaṁ pajahiṁsu te parimucciṁsu jātiyā jarāya maraṇena sokehi paridevehi dukkhehi domanassehi upāyāsehi, ‘parimucciṁsu dukkhasmā’ti vadāmi.
sn12.66:10.5Yepi hi keci, bhikkhave, anāgatamaddhānaṁ samaṇā vā brāhmaṇā vā yaṁ loke piyarūpaṁ sātarūpaṁ taṁ aniccato dakkhissanti dukkhato dakkhissanti anattato dakkhissanti rogato dakkhissanti bhayato dakkhissanti,
sn12.66:11.1te taṇhaṁ pajahissanti.
sn12.66:11.2Ye taṇhaṁ pajahissanti …pe…
sn12.66:11.3‘parimuccissanti dukkhasmā’ti vadāmi.
sn12.66:11.4Yepi hi keci, bhikkhave, etarahi samaṇā vā brāhmaṇā vā yaṁ loke piyarūpaṁ sātarūpaṁ taṁ aniccato passanti dukkhato passanti anattato passanti rogato passanti bhayato passanti,
sn12.66:12.1te taṇhaṁ pajahanti.
sn12.66:12.2Ye taṇhaṁ pajahanti te upadhiṁ pajahanti.
sn12.66:12.3Ye upadhiṁ pajahanti te dukkhaṁ pajahanti.
sn12.66:12.4Ye dukkhaṁ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, ‘parimuccanti dukkhasmā’ti vadāmi.
sn12.66:12.5Seyyathāpi, bhikkhave, āpānīyakaṁso vaṇṇasampanno gandhasampanno rasasampanno.
sn12.66:13.1So ca kho visena saṁsaṭṭho.
sn12.66:13.2Atha puriso āgaccheyya ghammābhitatto ghammapareto kilanto tasito pipāsito.
sn12.66:13.3Tamenaṁ evaṁ vadeyyuṁ:
sn12.66:13.4‘ayaṁ te, ambho purisa, āpānīyakaṁso vaṇṇasampanno gandhasampanno rasasampanno
sn12.66:13.5so ca kho visena saṁsaṭṭho.
sn12.66:13.6Sace ākaṅkhasi piva.
sn12.66:13.7Pivato hi kho taṁ chādessati vaṇṇenapi gandhenapi rasenapi; pivitvā ca pana tatonidānaṁ maraṇaṁ vā nigacchasi maraṇamattaṁ vā dukkhan’ti.
sn12.66:13.8Atha kho, bhikkhave, tassa purisassa evamassa:
sn12.66:13.9‘sakkā kho me ayaṁ surāpipāsitā pānīyena vā vinetuṁ dadhimaṇḍakena vā vinetuṁ bhaṭṭhaloṇikāya vā vinetuṁ loṇasovīrakena vā vinetuṁ, na tvevāhaṁ taṁ piveyyaṁ, yaṁ mama assa dīgharattaṁ hitāya sukhāyā’ti.
sn12.66:13.10So taṁ āpānīyakaṁsaṁ paṭisaṅkhā na piveyya, paṭinissajjeyya.
sn12.66:13.11So tatonidānaṁ na maraṇaṁ vā nigaccheyya maraṇamattaṁ vā dukkhaṁ.
sn12.66:13.12Evameva kho, bhikkhave, ye hi keci atītamaddhānaṁ samaṇā vā brāhmaṇā vā yaṁ loke piyarūpaṁ sātarūpaṁ taṁ aniccato addakkhuṁ dukkhato addakkhuṁ anattato addakkhuṁ rogato addakkhuṁ bhayato addakkhuṁ,
sn12.66:13.13te taṇhaṁ pajahiṁsu.
sn12.66:13.14Ye taṇhaṁ pajahiṁsu te upadhiṁ pajahiṁsu.
sn12.66:13.15Ye upadhiṁ pajahiṁsu te dukkhaṁ pajahiṁsu.
sn12.66:13.16Ye dukkhaṁ pajahiṁsu te parimucciṁsu jātiyā jarāya maraṇena sokehi paridevehi dukkhehi domanassehi upāyāsehi, ‘parimucciṁsu dukkhasmā’ti vadāmi.
sn12.66:13.17Yepi hi keci, bhikkhave, anāgatamaddhānaṁ …pe…
sn12.66:14.1etarahi samaṇā vā brāhmaṇā vā yaṁ loke piyarūpaṁ sātarūpaṁ taṁ aniccato passanti dukkhato passanti anattato passanti rogato passanti bhayato passanti,
sn12.66:14.2te taṇhaṁ pajahanti.
sn12.66:14.3Ye taṇhaṁ pajahanti te upadhiṁ pajahanti.
sn12.66:14.4Ye upadhiṁ pajahanti te dukkhaṁ pajahanti.
sn12.66:14.5Ye dukkhaṁ pajahanti te parimuccanti jātiyā jarāya maraṇena sokehi paridevehi dukkhehi domanassehi upāyāsehi, ‘parimuccanti dukkhasmā’ti vadāmī”ti.
sn12.66:14.6Chaṭṭhaṁ.
sn12.66:14.7