完整巴利原文 · 稳定分页 当前仅加载第 2 阅读页；保留 Bilara 原生段落标识，每页最多 120 段。
Saṁyutta Nikāya 22.2
sn22.2:0.11. Nakulapituvagga
sn22.2:0.2Devadahasutta
sn22.2:0.3Evaṁ me sutaṁ—
sn22.2:1.1ekaṁ samayaṁ bhagavā sakkesu viharati devadahaṁ nāma sakyānaṁ nigamo.
sn22.2:1.2Atha kho sambahulā pacchābhūmagamikā bhikkhū yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
sn22.2:1.3“icchāma mayaṁ, bhante, pacchābhūmaṁ janapadaṁ gantuṁ, pacchābhūme janapade nivāsaṁ kappetun”ti.
sn22.2:1.4“Apalokito pana vo, bhikkhave, sāriputto”ti?
sn22.2:2.1“Na kho no, bhante, apalokito āyasmā sāriputto”ti.
sn22.2:2.2“Apaloketha, bhikkhave, sāriputtaṁ.
sn22.2:2.3Sāriputto, bhikkhave, paṇḍito, bhikkhūnaṁ anuggāhako sabrahmacārīnan”ti.
sn22.2:2.4“Evaṁ, bhante”ti kho te bhikkhū bhagavato paccassosuṁ.
sn22.2:2.5Tena kho pana samayena āyasmā sāriputto bhagavato avidūre aññatarasmiṁ eḷagalāgumbe nisinno hoti.
sn22.2:3.1Atha kho te bhikkhū bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā yenāyasmā sāriputto tenupasaṅkamiṁsu; upasaṅkamitvā āyasmatā sāriputtena saddhiṁ sammodiṁsu.
sn22.2:3.2Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te bhikkhū āyasmantaṁ sāriputtaṁ etadavocuṁ:
sn22.2:3.3“icchāma mayaṁ, āvuso sāriputta, pacchābhūmaṁ janapadaṁ gantuṁ, pacchābhūme janapade nivāsaṁ kappetuṁ.
sn22.2:3.4Apalokito no satthā”ti.
sn22.2:3.5“Santi hāvuso, nānāverajjagataṁ bhikkhuṁ pañhaṁ pucchitāro—
sn22.2:4.1khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi.
sn22.2:4.2Paṇḍitā hāvuso, manussā vīmaṁsakā:
sn22.2:4.3‘kiṁvādī panāyasmantānaṁ satthā kimakkhāyī’ti, kacci vo āyasmantānaṁ dhammā sussutā suggahitā sumanasikatā sūpadhāritā suppaṭividdhā paññāya, yathā byākaramānā āyasmanto vuttavādino ceva bhagavato assatha, na ca bhagavantaṁ abhūtena abbhācikkheyyātha, dhammassa cānudhammaṁ byākareyyātha, na ca koci sahadhammiko vādānuvādo gārayhaṁ ṭhānaṁ āgaccheyyā”ti?
sn22.2:4.4“Dūratopi kho mayaṁ, āvuso, āgaccheyyāma āyasmato sāriputtassa santike etassa bhāsitassa atthamaññātuṁ.
sn22.2:5.1Sādhu vatāyasmantaṁyeva sāriputtaṁ paṭibhātu etassa bhāsitassa attho”ti.
sn22.2:5.2“Tena hāvuso, suṇātha, sādhukaṁ manasi karotha, bhāsissāmī”ti.
sn22.2:5.3“Evamāvuso”ti kho te bhikkhū āyasmato sāriputtassa paccassosuṁ.
sn22.2:5.4Āyasmā sāriputto etadavoca:
sn22.2:5.5“Santi hāvuso, nānāverajjagataṁ bhikkhuṁ pañhaṁ pucchitāro—
sn22.2:6.1khattiyapaṇḍitāpi …pe… samaṇapaṇḍitāpi.
sn22.2:6.2Paṇḍitā hāvuso, manussā vīmaṁsakā:
sn22.2:6.3‘kiṁvādī panāyasmantānaṁ satthā kimakkhāyī’ti?
sn22.2:6.4Evaṁ puṭṭhā tumhe, āvuso, evaṁ byākareyyātha:
sn22.2:6.5‘chandarāgavinayakkhāyī kho no, āvuso, satthā’ti.
sn22.2:6.6Evaṁ byākatepi kho, āvuso, assuyeva uttariṁ pañhaṁ pucchitāro—
sn22.2:7.1khattiyapaṇḍitāpi …pe… samaṇapaṇḍitāpi.
sn22.2:7.2Paṇḍitā hāvuso, manussā vīmaṁsakā:
sn22.2:7.3‘kismiṁ panāyasmantānaṁ chandarāgavinayakkhāyī satthā’ti?
sn22.2:7.4Evaṁ puṭṭhā tumhe, āvuso, evaṁ byākareyyātha:
sn22.2:7.5‘rūpe kho, āvuso, chandarāgavinayakkhāyī satthā,
sn22.2:7.6vedanāya …
sn22.2:7.7saññāya …
sn22.2:7.8saṅkhāresu …
sn22.2:7.9viññāṇe chandarāgavinayakkhāyī satthā’ti.
sn22.2:7.10Evaṁ byākatepi kho, āvuso, assuyeva uttariṁ pañhaṁ pucchitāro—
sn22.2:8.1khattiyapaṇḍitāpi …pe… samaṇapaṇḍitāpi.
sn22.2:8.2Paṇḍitā hāvuso, manussā vīmaṁsakā:
sn22.2:8.3‘kiṁ panāyasmantānaṁ ādīnavaṁ disvā rūpe chandarāgavinayakkhāyī satthā,
sn22.2:8.4vedanāya …
sn22.2:8.5saññāya …
sn22.2:8.6saṅkhāresu …
sn22.2:8.7viññāṇe chandarāgavinayakkhāyī satthā’ti?
sn22.2:8.8Evaṁ puṭṭhā tumhe, āvuso, evaṁ byākareyyātha:
sn22.2:8.9‘rūpe kho, āvuso, avigatarāgassa avigatacchandassa avigatapemassa avigatapipāsassa avigatapariḷāhassa avigatataṇhassa tassa rūpassa vipariṇāmaññathābhāvā uppajjanti sokaparidevadukkhadomanassupāyāsā.
sn22.2:8.10Vedanāya …
sn22.2:8.11saññāya …
sn22.2:8.12saṅkhāresu avigatarāgassa …pe…
sn22.2:8.13avigatataṇhassa tesaṁ saṅkhārānaṁ vipariṇāmaññathābhāvā uppajjanti sokaparidevadukkhadomanassupāyāsā.
sn22.2:8.14Viññāṇe avigatarāgassa avigatacchandassa avigatapemassa avigatapipāsassa avigatapariḷāhassa avigatataṇhassa tassa viññāṇassa vipariṇāmaññathābhāvā uppajjanti sokaparidevadukkhadomanassupāyāsā.
sn22.2:8.15Idaṁ kho no, āvuso, ādīnavaṁ disvā rūpe chandarāgavinayakkhāyī satthā,
sn22.2:8.16vedanāya …
sn22.2:8.17saññāya …
sn22.2:8.18saṅkhāresu …
sn22.2:8.19viññāṇe chandarāgavinayakkhāyī satthā’ti.
sn22.2:8.20Evaṁ byākatepi kho, āvuso, assuyeva uttariṁ pañhaṁ pucchitāro—
sn22.2:9.1khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi.
sn22.2:9.2Paṇḍitā hāvuso, manussā vīmaṁsakā:
sn22.2:9.3‘kiṁ panāyasmantānaṁ ānisaṁsaṁ disvā rūpe chandarāgavinayakkhāyī satthā,
sn22.2:9.4vedanāya …
sn22.2:9.5saññāya …
sn22.2:9.6saṅkhāresu …
sn22.2:9.7viññāṇe chandarāgavinayakkhāyī satthā’ti?
sn22.2:9.8Evaṁ puṭṭhā tumhe, āvuso, evaṁ byākareyyātha:
sn22.2:9.9‘rūpe kho, āvuso, vigatarāgassa vigatacchandassa vigatapemassa vigatapipāsassa vigatapariḷāhassa vigatataṇhassa tassa rūpassa vipariṇāmaññathābhāvā nuppajjanti sokaparidevadukkhadomanassupāyāsā.
sn22.2:9.10Vedanāya …
sn22.2:9.11saññāya …
sn22.2:9.12saṅkhāresu vigatarāgassa vigatacchandassa vigatapemassa vigatapipāsassa vigatapariḷāhassa vigatataṇhassa tesaṁ saṅkhārānaṁ vipariṇāmaññathābhāvā nuppajjanti sokaparidevadukkhadomanassupāyāsā.
sn22.2:9.13Viññāṇe vigatarāgassa vigatacchandassa vigatapemassa vigatapipāsassa vigatapariḷāhassa vigatataṇhassa tassa viññāṇassa vipariṇāmaññathābhāvā nuppajjanti sokaparidevadukkhadomanassupāyāsā.
sn22.2:9.14Idaṁ kho no, āvuso, ānisaṁsaṁ disvā rūpe chandarāgavinayakkhāyī satthā, vedanāya …
sn22.2:9.15saññāya …
sn22.2:9.16saṅkhāresu …
sn22.2:9.17viññāṇe chandarāgavinayakkhāyī satthā’ti.
sn22.2:9.18Akusale cāvuso, dhamme upasampajja viharato diṭṭhe ceva dhamme sukho vihāro abhavissa avighāto anupāyāso apariḷāho, kāyassa ca bhedā paraṁ maraṇā sugati pāṭikaṅkhā, nayidaṁ bhagavā akusalānaṁ dhammānaṁ pahānaṁ vaṇṇeyya.
sn22.2:10.1Yasmā ca kho, āvuso, akusale dhamme upasampajja viharato diṭṭhe ceva dhamme dukkho vihāro savighāto saupāyāso sapariḷāho, kāyassa ca bhedā paraṁ maraṇā duggati pāṭikaṅkhā, tasmā bhagavā akusalānaṁ dhammānaṁ pahānaṁ vaṇṇeti.
sn22.2:10.2Kusale cāvuso, dhamme upasampajja viharato diṭṭhe ceva dhamme dukkho vihāro abhavissa savighāto saupāyāso sapariḷāho, kāyassa ca bhedā paraṁ maraṇā duggati pāṭikaṅkhā, nayidaṁ bhagavā kusalānaṁ dhammānaṁ upasampadaṁ vaṇṇeyya.
sn22.2:11.1Yasmā ca kho, āvuso, kusale dhamme upasampajja viharato diṭṭhe ceva dhamme sukho vihāro avighāto anupāyāso apariḷāho, kāyassa ca bhedā paraṁ maraṇā sugati pāṭikaṅkhā, tasmā bhagavā kusalānaṁ dhammānaṁ upasampadaṁ vaṇṇetī”ti.
sn22.2:11.2Idamavocāyasmā sāriputto.
sn22.2:12.1Attamanā te bhikkhū āyasmato sāriputtassa bhāsitaṁ abhinandunti.
sn22.2:12.2Dutiyaṁ.
sn22.2:12.3