完整巴利原文 · 稳定分页 当前仅加载第 90 阅读页；保留 Bilara 原生段落标识，每页最多 120 段。
Saṁyutta Nikāya 22.86
sn22.86:0.19. Theravagga
sn22.86:0.2Anurādhasutta
sn22.86:0.3Ekaṁ samayaṁ bhagavā vesāliyaṁ viharati mahāvane kūṭāgārasālāyaṁ.
sn22.86:1.1Tena kho pana samayena āyasmā anurādho bhagavato avidūre araññakuṭikāyaṁ viharati.
sn22.86:1.2Atha kho sambahulā aññatitthiyā paribbājakā yenāyasmā anurādho tenupasaṅkamiṁsu; upasaṅkamitvā āyasmatā anurādhena saddhiṁ sammodiṁsu.
sn22.86:1.3Sammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinnā kho te aññatitthiyā paribbājakā āyasmantaṁ anurādhaṁ etadavocuṁ:
sn22.86:1.4“yo so, āvuso anurādha, tathāgato uttamapuriso paramapuriso paramapattipatto, taṁ tathāgato imesu catūsu ṭhānesu paññāpayamāno paññāpeti:
sn22.86:1.5‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā”ti?
sn22.86:1.6Evaṁ vutte, āyasmā anurādho te aññatitthiye paribbājake etadavoca:
sn22.86:2.1“yo so āvuso tathāgato uttamapuriso paramapuriso paramapattipatto taṁ tathāgato aññatra imehi catūhi ṭhānehi paññāpayamāno paññāpeti:
sn22.86:2.2‘hoti tathāgato paraṁ maraṇā’ti vā, ‘na hoti tathāgato paraṁ maraṇā’ti vā, ‘hoti ca na ca hoti tathāgato paraṁ maraṇā’ti vā, ‘neva hoti na na hoti tathāgato paraṁ maraṇā’ti vā”ti.
sn22.86:2.3Evaṁ vutte, aññatitthiyā paribbājakā āyasmantaṁ anurādhaṁ etadavocuṁ:
sn22.86:2.4“so cāyaṁ bhikkhu navo bhavissati acirapabbajito, thero vā pana bālo abyatto”ti.
sn22.86:2.5Atha kho aññatitthiyā paribbājakā āyasmantaṁ anurādhaṁ navavādena ca bālavādena ca apasādetvā uṭṭhāyāsanā pakkamiṁsu.
sn22.86:2.6Atha kho āyasmato anurādhassa acirapakkantesu tesu aññatitthiyesu paribbājakesu etadahosi:
sn22.86:3.1“sace kho maṁ te aññatitthiyā paribbājakā uttariṁ pañhaṁ puccheyyuṁ.
sn22.86:3.2Kathaṁ byākaramāno nu khvāhaṁ tesaṁ aññatitthiyānaṁ paribbājakānaṁ vuttavādī ceva bhagavato assaṁ, na ca bhagavantaṁ abhūtena abbhācikkheyyaṁ, dhammassa cānudhammaṁ byākareyyaṁ, na ca koci sahadhammiko vādānuvādo gārayhaṁ ṭhānaṁ āgaccheyyā”ti?
sn22.86:3.3Atha kho āyasmā anurādho yena bhagavā tenupasaṅkami; upasaṅkamitvā …pe… ekamantaṁ nisinno kho āyasmā anurādho bhagavantaṁ etadavoca:
sn22.86:4.1“idhāhaṁ, bhante, bhagavato avidūre araññakuṭikāyaṁ viharāmi.
sn22.86:4.2Atha kho, bhante, sambahulā aññatitthiyā paribbājakā yenāhaṁ tenupasaṅkamiṁsu …pe… maṁ etadavocuṁ:
sn22.86:4.3‘yo so, āvuso anurādha, tathāgato uttamapuriso paramapuriso paramapattipatto taṁ tathāgato imesu catūsu ṭhānesu paññāpayamāno paññāpeti—
sn22.86:4.4hoti tathāgato paraṁ maraṇāti vā, na hoti …
sn22.86:4.5hoti ca na ca hoti, neva hoti na na hoti tathāgato paraṁ maraṇāti vā’”ti?
sn22.86:4.6Evaṁ vuttāhaṁ, bhante, te aññatitthiye paribbājake etadavocaṁ:
sn22.86:5.1“yo so, āvuso, tathāgato uttamapuriso paramapuriso paramapattipatto, taṁ tathāgato aññatra imehi catūhi ṭhānehi paññāpayamāno paññāpeti:
sn22.86:5.2‘hoti tathāgato paraṁ maraṇā’ti vā …pe…
sn22.86:5.3‘neva hoti na na hoti tathāgato paraṁ maraṇā’ti vāti.
sn22.86:5.4Evaṁ vutte, bhante, te aññatitthiyā paribbājakā maṁ etadavocuṁ:
sn22.86:5.5‘so cāyaṁ bhikkhu na vo bhavissati acirapabbajito thero vā pana bālo abyatto’ti.
sn22.86:5.6Atha kho maṁ, bhante, te aññatitthiyā paribbājakā navavādena ca bālavādena ca apasādetvā uṭṭhāyāsanā pakkamiṁsu.
sn22.86:5.7Tassa mayhaṁ, bhante, acirapakkantesu tesu aññatitthiyesu paribbājakesu etadahosi:
sn22.86:6.1‘sace kho maṁ te aññatitthiyā paribbājakā uttariṁ pañhaṁ puccheyyuṁ.
sn22.86:6.2Kathaṁ byākaramāno nu khvāhaṁ tesaṁ aññatitthiyānaṁ paribbājakānaṁ vuttavādī ceva bhagavato assaṁ, na ca bhagavantaṁ abhūtena abbhācikkheyyaṁ, dhammassa cānudhammaṁ byākareyyaṁ, na ca koci sahadhammiko vādānuvādo gārayhaṁ ṭhānaṁ āgaccheyyā’”ti?
sn22.86:6.3“Taṁ kiṁ maññasi, anurādha,
sn22.86:7.1rūpaṁ niccaṁ vā aniccaṁ vā”ti?
sn22.86:7.2“Aniccaṁ, bhante”.
sn22.86:7.3“Yaṁ panāniccaṁ dukkhaṁ vā taṁ sukhaṁ vā”ti?
sn22.86:7.4“Dukkhaṁ, bhante”.
sn22.86:7.5“Yaṁ panāniccaṁ dukkhaṁ vipariṇāmadhammaṁ kallaṁ nu taṁ samanupassituṁ:
sn22.86:7.6‘etaṁ mama, esohamasmi, eso me attā’”ti?
sn22.86:7.7“No hetaṁ, bhante”.
sn22.86:7.8“Vedanā …
sn22.86:7.9saññā …
sn22.86:7.10saṅkhārā …
sn22.86:7.11viññāṇaṁ niccaṁ vā aniccaṁ vā”ti?
sn22.86:7.12“Aniccaṁ, bhante” …pe…
sn22.86:7.13tasmātiha …pe…
sn22.86:7.14evaṁ passaṁ …pe…
sn22.86:7.15nāparaṁ itthattāyāti pajānāti”.
sn22.86:7.16“Taṁ kiṁ maññasi, anurādha,
sn22.86:8.1rūpaṁ tathāgatoti samanupassasī”ti?
sn22.86:8.2“No hetaṁ, bhante”.
sn22.86:8.3“Vedanaṁ …
sn22.86:8.4saññaṁ …
sn22.86:8.5saṅkhāre …
sn22.86:8.6viññāṇaṁ tathāgatoti samanupassasī”ti?
sn22.86:8.7“No hetaṁ, bhante”.
sn22.86:8.8“Taṁ kiṁ maññasi, anurādha,
sn22.86:9.1rūpasmiṁ tathāgatoti samanupassasī”ti?
sn22.86:9.2“No hetaṁ, bhante”.
sn22.86:9.3“Aññatra rūpā tathāgatoti samanupassasī”ti?
sn22.86:9.4“No hetaṁ, bhante”.
sn22.86:9.5“Vedanāya …pe…
sn22.86:9.6aññatra vedanāya …pe…
sn22.86:9.7saññāya …
sn22.86:9.8aññatra saññāya …
sn22.86:9.9saṅkhāresu …
sn22.86:9.10aññatra saṅkhārehi …
sn22.86:9.11viññāṇasmiṁ …
sn22.86:9.12aññatra viññāṇā tathāgatoti samanupassasī”ti?
sn22.86:9.13“No hetaṁ, bhante”.
sn22.86:9.14“Taṁ kiṁ maññasi, anurādha,
sn22.86:10.1rūpaṁ … vedanā … saññā … saṅkhārā … viññāṇaṁ tathāgatoti samanupassasī”ti?
sn22.86:10.2“No hetaṁ, bhante”.
sn22.86:10.3“Taṁ kiṁ maññasi, anurādha,
sn22.86:11.1ayaṁ so arūpī … avedano … asaññī … asaṅkhāro … aviññāṇo tathāgatoti samanupassasī”ti?
sn22.86:11.2“No hetaṁ, bhante”.
sn22.86:11.3“Ettha ca te, anurādha, diṭṭheva dhamme saccato thetato tathāgate anupalabbhiyamāne kallaṁ nu te taṁ veyyākaraṇaṁ:
sn22.86:12.1‘yo so, āvuso, tathāgato uttamapuriso paramapuriso paramapattipatto taṁ tathāgato aññatra imehi catūhi ṭhānehi paññāpayamāno paññāpeti—
sn22.86:12.2hoti tathāgato paraṁ maraṇāti vā … na hoti … hoti ca na ca hoti … neva hoti na na hoti tathāgato paraṁ maraṇāti vā’”ti?
sn22.86:12.3“No hetaṁ, bhante”.
sn22.86:12.4“Sādhu sādhu, anurādha.
sn22.86:13.1Pubbe cāhaṁ, anurādha, etarahi ca dukkhañceva paññapemi, dukkhassa ca nirodhan”ti.
sn22.86:13.2Catutthaṁ.
sn22.86:13.3