完整巴利原文 · 稳定分页 当前仅加载第 4 阅读页；保留 Bilara 原生段落标识，每页最多 120 段。
Saṁyutta Nikāya 22.4
sn22.4:0.11. Nakulapituvagga
sn22.4:0.2Dutiyahāliddikānisutta
sn22.4:0.3Evaṁ me sutaṁ—
sn22.4:1.1ekaṁ samayaṁ āyasmā mahākaccāno avantīsu viharati kuraraghare papāte pabbate.
sn22.4:1.2Atha kho hāliddikāni gahapati yenāyasmā mahākaccāno …pe… ekamantaṁ nisinno kho hāliddikāni gahapati āyasmantaṁ mahākaccānaṁ etadavoca:
sn22.4:1.3“vuttamidaṁ, bhante, bhagavatā sakkapañhe:
sn22.4:1.4‘ye te samaṇabrāhmaṇā taṇhāsaṅkhayavimuttā, te accantaniṭṭhā accantayogakkhemino accantabrahmacārino accantapariyosānā seṭṭhā devamanussānan’ti.
sn22.4:1.5Imassa nu kho, bhante, bhagavatā saṅkhittena bhāsitassa kathaṁ vitthārena attho daṭṭhabbo”ti?
sn22.4:2.1“Rūpadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṁ khayā virāgā nirodhā cāgā paṭinissaggā ‘cittaṁ suvimuttanti’ vuccati.
sn22.4:3.1Vedanādhātuyā kho, gahapati …
sn22.4:4.1saññādhātuyā kho, gahapati …
sn22.4:4.2saṅkhāradhātuyā kho, gahapati …
sn22.4:4.3viññāṇadhātuyā kho, gahapati, yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, tesaṁ khayā virāgā nirodhā cāgā paṭinissaggā ‘cittaṁ suvimuttanti’ vuccati.
sn22.4:4.4Iti kho, gahapati, yaṁ taṁ vuttaṁ bhagavatā sakkapañhe:
sn22.4:5.1‘ye te samaṇabrāhmaṇā taṇhāsaṅkhayavimuttā te accantaniṭṭhā accantayogakkhemino accantabrahmacārino accantapariyosānā seṭṭhā devamanussānan’ti.
sn22.4:5.2Imassa kho, gahapati, bhagavatā saṅkhittena bhāsitassa evaṁ vitthārena attho daṭṭhabbo”ti.
sn22.4:6.1Catutthaṁ.
sn22.4:6.2