完整巴利原文 · 稳定分页 当前仅加载第 44 阅读页；保留 Bilara 原生段落标识，每页最多 120 段。
Saṁyutta Nikāya 22.44
sn22.44:0.15. Attadīpavagga
sn22.44:0.2Paṭipadāsutta
sn22.44:0.3Sāvatthinidānaṁ.
sn22.44:1.1“Sakkāyasamudayagāminiñca vo, bhikkhave, paṭipadaṁ desessāmi, sakkāyanirodhagāminiñca paṭipadaṁ.
sn22.44:1.2Taṁ suṇātha.
sn22.44:1.3Katamā ca, bhikkhave, sakkāyasamudayagāminī paṭipadā?
sn22.44:1.4Idha, bhikkhave, assutavā puthujjano ariyānaṁ adassāvī ariyadhammassa akovido ariyadhamme avinīto, sappurisānaṁ adassāvī sappurisadhammassa akovido sappurisadhamme avinīto,
sn22.44:1.5rūpaṁ attato samanupassati, rūpavantaṁ vā attānaṁ; attani vā rūpaṁ, rūpasmiṁ vā attānaṁ.
sn22.44:1.6Vedanaṁ attato …
sn22.44:1.7saññaṁ …
sn22.44:1.8saṅkhāre …
sn22.44:1.9viññāṇaṁ attato samanupassati, viññāṇavantaṁ vā attānaṁ; attani vā viññāṇaṁ, viññāṇasmiṁ vā attānaṁ.
sn22.44:1.10Ayaṁ vuccati, bhikkhave, ‘sakkāyasamudayagāminī paṭipadā, sakkāyasamudayagāminī paṭipadā’ti.
sn22.44:1.11Iti hidaṁ, bhikkhave, vuccati ‘dukkhasamudayagāminī samanupassanā’ti.
sn22.44:1.12Ayamevettha attho.
sn22.44:1.13Katamā ca, bhikkhave, sakkāyanirodhagāminī paṭipadā?
sn22.44:2.1Idha, bhikkhave, sutavā ariyasāvako ariyānaṁ dassāvī ariyadhammassa kovido ariyadhamme suvinīto, sappurisānaṁ dassāvī sappurisadhammassa kovido sappurisadhamme suvinīto,
sn22.44:2.2na rūpaṁ attato samanupassati, na rūpavantaṁ vā attānaṁ; na attani vā rūpaṁ, na rūpasmiṁ vā attānaṁ.
sn22.44:2.3Na vedanaṁ attato …
sn22.44:2.4na saññaṁ …
sn22.44:2.5na saṅkhāre …
sn22.44:2.6na viññāṇaṁ attato samanupassati, na viññāṇavantaṁ vā attānaṁ; na attani vā viññāṇaṁ, na viññāṇasmiṁ vā attānaṁ.
sn22.44:2.7Ayaṁ vuccati, bhikkhave, ‘sakkāyanirodhagāminī paṭipadā, sakkāyanirodhagāminī paṭipadā’ti.
sn22.44:2.8Iti hidaṁ, bhikkhave, vuccati ‘dukkhanirodhagāminī samanupassanā’ti.
sn22.44:2.9Ayamevettha attho”ti.
sn22.44:2.10Dutiyaṁ.
sn22.44:2.11