德格《甘珠尔》D681

འགྲོ་འོང་སྟོན་པ་འདོད་བསྐུལ་བ། །མེད་མོད་ན་ཡང་དེ་ལྟར་སྤྱོད། །ཡུལ་གྱིས་མ་སྐྱེས་དབང་པོ་མིན། །དུས་ཀྱིས་མ་ཡིན་གཏན་གྱིས་མིན། །རྒྱུ་དང་དེ་བཞིན་རྟེན་གྱིས་མིན། །གནས་སྐབས་གཞན་ཡང་དེ་ལ་མེད། །དེ་ལ་སེམས་པའི་སེམས་ཉིད་

ཀྱང་། གང་ནས་མ་འོངས་གར་མི་གནས། །གར་ཡང་མ་སོང་བརྟགས་ན་སྟོང་། །བརྟག་པར་བྱེད་པ་རྟོག་པ་ཙམ། །དངོས་རྣམས་བརྟགས་པ་མིང་ཙམ་སྟེ། །ཀུན་རྫོབ་ཙམ་དུ་མིང་ཡིག་ལ། །བརྟེན་ནས་རང་གི་སེམས་བཟུང་ན། །དྲོད་ཀྱི་བཞི་པ་དང་པོར་བཟུང་། །ཕྱུང་བའི་

གཉིས་པ་དེ་ལ་བརྟེན། །དེ་ལ་དང་པོ་གཉིས་པས་བསྐོར། །དང་པོའི་བཅོ་ལྔས་མནན་པ་སྟེ། །བཅུ་དྲུག་པ་ནི་གྲོགས་སུ་བཞག །ཡི་གེ་དྲུག་ལ་གྲུབ་པ་ནི། །སངས་རྒྱས་དྲུག་གི་རང་བཞིན་ཏེ། །འོད་ཟེར་རྣམ་པ་དྲུག་ཏུ་བཅས། །རླུང་དྲུག་གིས་ནི་དབང་བྱས་ནས། །

ཡུལ་ནི་རྣམ་པ་དྲུག་ལ་འཇུག །ཡུལ་དྲུག་དག་གིས་དབང་བྱས་ནས། །ཉོན་མོངས་རྣམ་པ་དྲུག་དང་བཅས། །ཉོན་མོངས་རྒྱས་པར་འགྱུར་བ་ཡིན། །ཕུང་པོ་རྣམ་པ་དྲུག་དང་ལྡན། །ཕུང་པོ་གྲངས་ཀྱི་དབྱེ་བས་ནི། །ཡན་ལག་དྲུག་དྲུག་འཕེལ་བར་འགྱུར། །ཡན་ལག་རྫོགས་

པའི་གྲིབ་མར་ནི། །རང་བཞིན་དག་པའི་སེམས་སྒྲིབ་བྱེད། །སྒྲིབ་གཉིས་གོ་བས་མཐུག་པོ་ནི། །བསལ་དཀའི་རི་བོ་དང་བཅས་པ། །རྟག་ཆད་གནས་སུ་ཞུགས་པའོ། །སྲོག་རྩོལ་བསྡམ་པའི་སྦྱོར་བ་ཡིས། །ཕྱི་རོལ་སྣང་བ་ནུབ་པར་འགྱུར། །རྩོལ་དང་བྲལ་ནས་དགའ་

སྐྱེ་སྟེ། །ཡི་གེ་ལ་ནི་སེམས་གནས་འགྱུར། །ཡི་གེ་གསལ་བའི་འོད་ཟེར་ནི། །བ་སྤུ་ཁུང་རྣམས་ཐམས་ཅད་ནས། །སེམས་དང་བཅས་པ་ལྡང་འཇུག་སྟེ། །སླར་ཡང་ཐིག་ལེ་བསྡུས་ནས་ནི། །ཡི་གེ་ཉིད་ཀྱང་མི་དམིགས་སོ། །འཛིན་པ་དེ་ལས་ཐོས་ནས་ཀྱང་། །སྒྱུ་

མའི་རྣམ་པ་རྗེས་དྲན་བྱ། །དེ་ལ་གོམས་ནས་ཏིང་འཛིན་ནི། །ཉམས་པ་མེད་པར་ཐོབ་པར་འགྱུར། །ཏིང་འཛིན་དེ་བརྟན་གྱུར་ནས་ནི། །ལུས་འདིས་རིག་པ་འཛིན་པ་འཐོབ། །རིག་འཛིན་དེ་ལ་གནས་ནས་ནི། །བླ་མེད་བྱང་ཆུབ་དེ་ཐོབ་འགྱུར། །སྐད་ཅིག་དེ་ལ་དངོས་རྣམས་