德格《甘珠尔》D681

ཀུན་སློང་བྱང་ཆུབ་རིན་ཆེན་ཐོབ་མཛད་རྒྱུ། །རྟག་པར་འཆང་ན་གནས་སྒྱུར་བྱེད་པར་འགྱུར། །དེ་ནས་བཅོམ་ལྡན་ཐུབ་པ་ཆེས། །བློ་ལྡན་རྣམས་ལ་བཀའ་སྩལ་པ། །ལེགས་སོ་ལེགས་སོ་སེམས་དཔའ་ཆེ། །གང་དག་དེ་དག་དེ་བཞིན་དུ། །

བདེ་འདོད་རྣམ་པར་གཡེང་བ་དང་། །དེས་ནི་སྡུག་བསྔལ་མྱ་ངན་འདས། །གདུང་བ་ཆགས་སྡང་འཁྲུག་པ་དང་། །དེས་ནི་ལོག་པའི་ཆོས་འདོར་ཡང་། །དགེ་སྦྱོང་ལོག་ལྟས་ཚངས་པའི་གདོན། །སྔགས་ལོག་སྤྱོད་བྱེད་རིག་འཛིན་གདོན། །གདུལ་

དཀའ་དག་ལ་རྒྱུན་{རིངས་སོ,རིང་ངོ་}། །སྐྱེ་ངན་འཇིགས་ཕྱིར་བློ་ཟབ་སྤྱོད། །གང་གི་ཁྱིམ་དུ་རྒྱུད་འདི་ཡོད། །བྲི་དང་བཀླག་དང་མཆོད་པ་དང་། །རིམ་གྲོ་ཆེད་དུ་གསལ་བྱེད་དང་། །བཀྲ་ཤིས་ཚེ་རིང་དཔལ་འབྱོར་སྐྱེ། །བཅོམ་ལྡན་འདས་ཀྱིས་དེ་སྐད་ཅེས་བཀའ་

སྩལ་པ་དང་། །བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་དེ་དག་དང་། རིག་པའི་ལྷ་མོ་དང་། ཁྲོ་བོ་དུ་མ་དང་། ཉན་ཐོས་ཀྱི་ཚོགས་ཐམས་ཅད་དང་། །ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་སྤྱན་རས་གཟིགས་དབང་ཕྱུག་གི་རྩ་བའི་རྒྱུད་ཀྱི་རྒྱལ་པོ་པདྨ་དྲ་བ་ཞེས་བྱ་བ་ལས། སྦྱོར་བ་སྣ་ཚོགས་ཀྱི་ལེའུ་སྟེ་བཅུ་གཉིས་པའོ།། །།འཕགས་པ་སྤྱན་རས་གཟིགས་

དབང་ཕྱུག་གི་རྩ་བའི་རྒྱུད་ཀྱི་རྒྱལ་པོ་པདྨ་དྲ་བ་ཞེས་བྱ་བ་རྫོགས་སོ།། །།རིག་པའི་འབྱུང་གནས་རིག་པའི་འོད་ཟེར་གྱིས་ཤེས་རབ་པདྨ་རྒྱས་པའི་ཁ་ཆེའི་ཡུལ་བདུད་རྩི་འབྱུང་བའི་གཙུག་ལག་ཁང་ཆེན་པོར་པཎྜི་

ཏ་ཆེན་པོ་སོ་མ་ཤྲཱི་བྷ་བྱ་ཞེས་བྱ་བ་དང་། བོད་ཀྱི་ལོཙྪ་བ་ཀྱུ་ར་དགེ་སློང་ཚུལ་ཁྲིམས་འོད་ཟེར་གྱིས་བསྒྱུར་ཅིང་གཏན་ལ་ཕབ་པ།། །།