巴利《小部》· 经集

Sutta Nipāta 4.1

Kāmasutta

Kāmaṁ kāmayamānassa,

tassa ce taṁ samijjhati;

Addhā pītimano hoti,

laddhā macco yadicchati.

Tassa ce kāmayānassa,

chandajātassa jantuno;

Te kāmā parihāyanti,

sallaviddhova ruppati.

Yo kāme parivajjeti,

sappasseva padā siro;

Somaṁ visattikaṁ loke,

sato samativattati.

Khettaṁ vatthuṁ hiraññaṁ vā,

gavāssaṁ dāsaporisaṁ;

Thiyo bandhū puthu kāme,

yo naro anugijjhati.

Abalā naṁ balīyanti,

maddantenaṁ parissayā;

Tato naṁ dukkhamanveti,

nāvaṁ bhinnamivodakaṁ.

Tasmā jantu sadā sato,

Kāmāni parivajjaye;

Te pahāya tare oghaṁ,

Nāvaṁ sitvāva pāragūti.

Kāmasuttaṁ paṭhamaṁ.