上座部《双论》（巴利原文）

6.2.1.6. Atītānāgatavāra

6.2.1.6.1. Anulomapuggala

Yassa kāyasaṅkhāro uppajjittha tassa vacīsaṅkhāro uppajjissatīti?

Pacchimacittasamaṅgīnaṁ yassa cittassa anantarā avitakkaavicāraṁ pacchimacittaṁ uppajjissati tesaṁ kāyasaṅkhāro uppajjittha, no ca tesaṁ vacīsaṅkhāro uppajjissati. Itaresaṁ tesaṁ kāyasaṅkhāro ca uppajjittha vacīsaṅkhāro ca uppajjissati.

Yassa vā pana …pe… ? Āmantā.

Yassa kāyasaṅkhāro uppajjittha tassa cittasaṅkhāro uppajjissatīti?

Pacchimacittasamaṅgīnaṁ tesaṁ kāyasaṅkhāro uppajjittha, no ca tesaṁ cittasaṅkhāro uppajjissati. Itaresaṁ tesaṁ kāyasaṅkhāro ca uppajjittha cittasaṅkhāro ca uppajjissati.

Yassa vā pana …pe…. Āmantā.

Yassa vacīsaṅkhāro uppajjittha tassa cittasaṅkhāro uppajjissatīti?

Pacchimacittasamaṅgīnaṁ tesaṁ vacīsaṅkhāro uppajjittha, no ca tesaṁ cittasaṅkhāro uppajjissati. Itaresaṁ tesaṁ vacīsaṅkhāro ca uppajjittha cittasaṅkhāro ca uppajjissati.

Yassa vā pana …pe… ? Āmantā.

6.2.1.6.2. Anulomaokāsa

Yattha kāyasaṅkhāro uppajjittha …pe….

6.2.1.6.3. Anulomapuggalokāsa

Yassa yattha kāyasaṅkhāro uppajjittha tassa tattha vacīsaṅkhāro uppajjissatīti?

Kāmāvacare pacchimacittasamaṅgīnaṁ dutiyajjhānaṁ tatiyajjhānaṁ samāpannānaṁ tesaṁ tattha kāyasaṅkhāro uppajjittha, no ca tesaṁ tattha vacīsaṅkhāro uppajjissati. Paṭhamajjhānaṁ samāpannānaṁ itaresaṁ kāmāvacarānaṁ tesaṁ tattha kāyasaṅkhāro ca uppajjittha vacīsaṅkhāro ca uppajjissati.

Yassa vā pana yattha vacīsaṅkhāro uppajjissati tassa tattha kāyasaṅkhāro uppajjitthāti?

Rūpāvacarānaṁ arūpāvacarānaṁ tesaṁ tattha vacīsaṅkhāro uppajjissati, no ca tesaṁ tattha kāyasaṅkhāro uppajjittha. Paṭhamajjhānaṁ samāpannānaṁ kāmāvacarānaṁ tesaṁ tattha vacīsaṅkhāro ca uppajjissati kāyasaṅkhāro ca uppajjittha.

Yassa yattha kāyasaṅkhāro uppajjittha tassa tattha cittasaṅkhāro uppajjissatīti?

Kāmāvacare pacchimacittasamaṅgīnaṁ tesaṁ tattha kāyasaṅkhāro uppajjittha, no ca tesaṁ tattha cittasaṅkhāro uppajjissati. Paṭhamajjhānaṁ dutiyajjhānaṁ tatiyajjhānaṁ samāpannānaṁ itaresaṁ kāmāvacarānaṁ tesaṁ tattha kāyasaṅkhāro ca uppajjittha cittasaṅkhāro ca uppajjissati.

Yassa vā pana yattha cittasaṅkhāro uppajjissati tassa tattha kāyasaṅkhāro uppajjitthāti?

Catutthajjhānaṁ samāpannānaṁ rūpāvacarānaṁ arūpāvacarānaṁ tesaṁ tattha cittasaṅkhāro uppajjissati, no ca tesaṁ tattha kāyasaṅkhāro uppajjittha. Paṭhamajjhānaṁ dutiyajjhānaṁ tatiyajjhānaṁ samāpannānaṁ kāmāvacarānaṁ tesaṁ tattha cittasaṅkhāro ca uppajjissati kāyasaṅkhāro ca uppajjittha.

Yassa yattha vacīsaṅkhāro uppajjittha tassa tattha cittasaṅkhāro uppajjissatīti?

Savitakkasavicārabhūmiyaṁ pacchimacittasamaṅgīnaṁ tesaṁ tattha vacīsaṅkhāro uppajjittha, no ca tesaṁ tattha cittasaṅkhāro uppajjissati. Itaresaṁ savitakkasavicārabhūmiyaṁ tesaṁ tattha vacīsaṅkhāro ca uppajjittha cittasaṅkhāro ca uppajjissati.

Yassa vā pana yattha cittasaṅkhāro uppajjissati tassa tattha vacīsaṅkhāro uppajjitthāti?

Avitakkaavicārabhūmiyaṁ tesaṁ tattha cittasaṅkhāro uppajjissati, no ca tesaṁ tattha vacīsaṅkhāro uppajjittha. Savitakkasavicārabhūmiyaṁ tesaṁ tattha cittasaṅkhāro ca uppajjissati vacīsaṅkhāro ca uppajjittha.

6.2.1.6.4. Paccanīkapuggala

Yassa kāyasaṅkhāro nuppajjittha tassa vacīsaṅkhāro nuppajjissatīti? Natthi.

Yassa vā pana vacīsaṅkhāro nuppajjissati tassa kāyasaṅkhāro nuppajjitthāti? Uppajjittha.

Yassa kāyasaṅkhāro nuppajjittha tassa cittasaṅkhāro nuppajjissatīti? Natthi.

Yassa vā pana cittasaṅkhāro nuppajjissati tassa kāyasaṅkhāro nuppajjitthāti? Uppajjittha.

Yassa vacīsaṅkhāro nuppajjittha tassa cittasaṅkhāro nuppajjissatīti? Natthi.

Yassa vā pana cittasaṅkhāro nuppajjissati tassa vacīsaṅkhāro nuppajjitthāti? Uppajjittha.

6.2.1.6.5. Paccanīkaokāsa

Yattha kāyasaṅkhāro nuppajjittha …pe….

6.2.1.6.6. Paccanīkapuggalokāsa

Yassa yattha kāyasaṅkhāro nuppajjittha tassa tattha vacīsaṅkhāro nuppajjissatīti?

Rūpāvacarānaṁ arūpāvacarānaṁ tesaṁ tattha kāyasaṅkhāro nuppajjittha, no ca tesaṁ tattha vacīsaṅkhāro nuppajjissati. Rūpāvacare arūpāvacare pacchimacittasamaṅgīnaṁ yassa cittassa anantarā avitakkaavicāraṁ pacchimacittaṁ uppajjissati catutthajjhānaṁ samāpannānaṁ asaññasattānaṁ tesaṁ tattha kāyasaṅkhāro ca nuppajjittha vacīsaṅkhāro ca nuppajjissati.

Yassa vā pana yattha vacīsaṅkhāro nuppajjissati tassa tattha kāyasaṅkhāro nuppajjitthāti?

Kāmāvacare pacchimacittasamaṅgīnaṁ dutiyajjhānaṁ tatiyajjhānaṁ samāpannānaṁ tesaṁ tattha vacīsaṅkhāro nuppajjissati, no ca tesaṁ tattha kāyasaṅkhāro nuppajjittha. Rūpāvacare arūpāvacare pacchimacittasamaṅgīnaṁ yassa cittassa anantarā avitakkaavicāraṁ pacchimacittaṁ uppajjissati catutthajjhānaṁ samāpannānaṁ asaññasattānaṁ tesaṁ tattha vacīsaṅkhāro ca nuppajjissati kāyasaṅkhāro ca nuppajjittha.

Yassa yattha kāyasaṅkhāro nuppajjittha tassa tattha cittasaṅkhāro nuppajjissatīti?

Catutthajjhānaṁ samāpannānaṁ rūpāvacarānaṁ arūpāvacarānaṁ tesaṁ tattha kāyasaṅkhāro nuppajjittha, no ca tesaṁ tattha cittasaṅkhāro nuppajjissati. Rūpāvacare arūpāvacare pacchimacittasamaṅgīnaṁ asaññasattānaṁ tesaṁ tattha kāyasaṅkhāro ca nuppajjittha cittasaṅkhāro ca nuppajjissati.

Yassa vā pana yattha cittasaṅkhāro nuppajjissati tassa tattha kāyasaṅkhāro nuppajjitthāti?

Kāmāvacare pacchimacittasamaṅgīnaṁ tesaṁ tattha cittasaṅkhāro nuppajjissati, no ca tesaṁ tattha kāyasaṅkhāro nuppajjittha. Rūpāvacare arūpāvacare pacchimacittasamaṅgīnaṁ asaññasattānaṁ tesaṁ tattha cittasaṅkhāro ca nuppajjissati kāyasaṅkhāro ca nuppajjittha.

Yassa yattha vacīsaṅkhāro nuppajjittha tassa tattha cittasaṅkhāro nuppajjissatīti?

Avitakkaavicārabhūmiyaṁ tesaṁ tattha vacīsaṅkhāro nuppajjittha, no ca tesaṁ tattha cittasaṅkhāro nuppajjissati. Avitakkaavicārabhūmiyaṁ pacchimacittasamaṅgīnaṁ asaññasattānaṁ tesaṁ tattha vacīsaṅkhāro ca nuppajjittha cittasaṅkhāro ca nuppajjissati.

Yassa vā pana yattha cittasaṅkhāro nuppajjissati tassa tattha vacīsaṅkhāro nuppajjitthāti?

Savitakkasavicārabhūmiyaṁ pacchimacittasamaṅgīnaṁ tesaṁ tattha cittasaṅkhāro nuppajjissati, no ca tesaṁ tattha vacīsaṅkhāro nuppajjittha. Avitakkaavicārabhūmiyaṁ pacchimacittasamaṅgīnaṁ asaññasattānaṁ tesaṁ tattha cittasaṅkhāro ca nuppajjissati vacīsaṅkhāro ca nuppajjittha.

Uppādavāro.