完整藏文原文 · 德格版页 当前仅加载第 63 函德格 294a 版页；藏文 NFD、目录标记与异常页序保留在来源切片中，重复版页行以稳定序号区分。
དེ་དག་དང་། ཀླུའི་སྙིང་པོ་བཞི་པོ་དག་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། རི་བྲགས་ཀྱི་གནས་གང་དང་གང་དག་ཏུ་རེ་རེ་ཙམ་ཡང་སྟོན་ཏམ། འཆད་དམ། རབ་ཏུ་སྒྲོགས་སམ། དྲན་པར་བགྱིད་པ་དེ་དང་དེ་དག་ཏུ་བདག་ཅག་
D230.063.0294a01.01གིས་དུས་དུས་སུ་ཆར་དབབ་པ་དང་། གདུགས་དང་། བསེར་མ་དག་གཏོང་བར་བགྱིའོ། །དུས་མ་ལགས་པར་ནི་མ་ལགས་སོ། །དེ་དང་དེར་བདག་ཅག་གིས་ཕྱི་དགྲ་དང་། ནང་འཁྲུག་དང་། ཐབ་མོ་དང་། རྩོད་པ་དང་། གནོད་སེམས་དང་། ནད་
D230.063.0294a02.01དང་། མི་ངས་དང་། མུ་གེ་དག་རབ་ཏུ་ཞི་བར་བགྱི་ལགས་སོ། །དེ་དང་དེར་བདག་ཅག་གིས་སྐྱིད་པ་དང་། ལོ་ལེགས་པ་དང་། དགའ་བར་འགྱུར་བ་དག་བསྒྲུབ་པར་བགྱི་ལགས་སོ། །དེ་དང་དེར་སེམས་ཅན་རྣམས་ཀྱི་ས་བོན་དང་། མྱུ་གུ་དང་། སྡོང་བུ་དང་།
D230.063.0294a03.01འདབ་མ་དང་། མེ་ཏོག་དང་། འབྲས་བུ་དང་། ཤིང་དང་། འབྲུ་དང་། སྨན་དང་། རོ་དག་མི་ཉམས་པར་འཕེལ་བར་བགྱི་ལགས་སོ། །ལོངས་སྤྱོད་དང་། ཡོངས་སུ་སྤྱོད་པ་ཕལ་ཆེར་དྲི་ཞིམ་པ་དང་། རོ་ཞིམ་པ་དང་། སྣུམ་པ་དང་། འཇམ་པ་དག་ཏུ་
D230.063.0294a04.01བསྒྲུབ་པར་བགྱི་ལགས་སོ། །བདག་ཅག་གིས་འཛམ་བུའི་གླིང་འདིའི་རྒྱལ་པོ་རྣམས་ཀྱང་གཅིག་ལ་གཅིག་བྱམས་པའི་སེམས་དང་། ཕན་པའི་སེམས་དང་། འཁོན་མ་མཆིས་པའི་སེམས་དང་། རྩོད་པ་མ་མཆིས་པའི་སེམས་སུ་བསྒྲུབ་པར་བགྱི་ལགས་སོ། །དེ་
D230.063.0294a05.01བཞིན་དུ་བྲམ་ཟེའི་རིགས་དང་། རྗེའུ་རིགས་དང་། དམངས་རིགས་དང་། གནོད་སྦྱིན་རྣམས་ནས་དགེ་བསྙེན་དག་གི་བར་དག་ཏུ་བྱམས་པའི་སེམས་དང་ལྡན་པར་བསྒྲུབ་པར་བགྱི་ལགས་སོ། །གང་ན་གཟུངས་ཆེན་པོ་འདི་རབ་ཏུ་སྒྲོགས་པ་དེར་ནི་ཕན་ཚུན་སེམས་
D230.063.0294a06.01འཐུན་པར་བསྒྲུབ་པར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་ཀླུ་དེ་དག་ཐམས་ཅད་ལ་ལེགས་སོ་ལེགས་སོ་ཞེས་བྱ་བ་གནང་ངོ་། །ཐམས་ཅད་དང་ལྡན་པའི་འཁོར་ཇི་སྙེད་ལྷགས་པ་རྣམས་ཀྱིས་ཀྱང་ལེགས་སོ་ཞེས་བྱ་བ་བྱིན་ནོ། །དེ་ནས་བྱང་ཆུབ་སེམས་
D230.063.0294a07.01