完整巴利原文 · 稳定分页 当前仅加载第 103 阅读页；保留 Bilara 原生段落标识，每页最多 120 段。
vimutti phalaṁ.
ps2.5:13.4Pariggahaṭṭhena sammāvācā micchāvācāya vimuttā hoti, samuṭṭhānaṭṭhena sammākammanto micchākammantā vimutto hoti, vodānaṭṭhena sammāājīvo micchāājīvā vimutto hoti, paggahaṭṭhena sammāvāyāmo micchāvāyāmā vimutto hoti, upaṭṭhānaṭṭhena sammāsati micchāsatiyā vimuttā hoti, avikkhepaṭṭhena sammāsamādhi micchāsamādhito vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.
ps2.5:14.1<b>Vimuttī</b>ti dve vimuttiyo—
ps2.5:14.2nibbānañca vimutti, ye ca nibbānārammaṇatājātā dhammā sabbe vimuttā hontīti—
ps2.5:14.3vimutti phalaṁ.
ps2.5:14.4Sakadāgāmiphalakkhaṇe dassanaṭṭhena sammādiṭṭhi …pe…
ps2.5:15.1avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.
ps2.5:15.2<b>Vimuttī</b>ti dve vimuttiyo—
ps2.5:15.3nibbānañca vimutti, ye ca nibbānārammaṇatājātā dhammā sabbe vimuttā hontīti—
ps2.5:15.4vimutti phalaṁ.
ps2.5:15.5Anāgāmiphalakkhaṇe dassanaṭṭhena sammādiṭṭhi …pe…
ps2.5:16.1avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā …pe….
ps2.5:16.2Arahattaphalakkhaṇe dassanaṭṭhena sammādiṭṭhi …pe…
ps2.5:17.1avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā vimutto hoti, tadanuvattakakilesehi ca khandhehi ca vimutto hoti, bahiddhā ca sabbanimittehi vimutto hoti, vimutti vimuttārammaṇā vimuttigocarā vimuttiyā samudāgatā vimuttiyā ṭhitā vimuttiyā patiṭṭhitā.
ps2.5:17.2<b>Vimuttī</b>ti dve vimuttiyo—
ps2.5:17.3nibbānañca vimutti, ye ca nibbānārammaṇatājātā dhammā sabbe vimuttā hontīti—
ps2.5:17.4vimutti phalaṁ.
ps2.5:17.5Dassanavimutti sammādiṭṭhi …pe…
ps2.5:18.1avikkhepavimutti sammāsamādhi, upaṭṭhānavimutti satisambojjhaṅgo, paṭisaṅkhānavimutti upekkhāsambojjhaṅgo.
ps2.5:18.2Assaddhiye akampiyavimutti saddhābalaṁ …pe…
ps2.5:18.3avijjāya akampiyavimutti paññābalaṁ.
ps2.5:18.4Adhimokkhavimutti saddhindriyaṁ …pe…
ps2.5:18.5dassanavimutti paññindriyaṁ.
ps2.5:18.6Ādhipateyyaṭṭhena indriyā vimutti.
ps2.5:19.1Akampiyaṭṭhena balā vimutti, niyyānaṭṭhena bojjhaṅgā vimutti, hetuṭṭhena maggo vimutti, upaṭṭhānaṭṭhena satipaṭṭhānā vimutti, padahanaṭṭhena sammappadhānā vimutti, ijjhanaṭṭhena iddhipādā vimutti, tathaṭṭhena saccā vimutti, avikkhepaṭṭhena samatho vimutti, anupassanaṭṭhena vipassanā vimutti, ekarasaṭṭhena samathavipassanā vimutti, anativattanaṭṭhena yuganaddhaṁ vimutti, saṁvaraṭṭhena sīlavisuddhi vimutti, avikkhepaṭṭhena cittavisuddhi vimutti, dassanaṭṭhena diṭṭhivisuddhi vimutti, vimuttaṭṭhena vimokkho vimutti, paṭivedhaṭṭhena vijjā vimutti, pariccāgaṭṭhena vimutti vimutti, paṭippassaddhiyaṭṭhena anuppāde ñāṇaṁ vimutti, chando mūlaṭṭhena vimutti, manasikāro samuṭṭhānaṭṭhena vimutti, phasso samodhānaṭṭhena vimutti, vedanā samosaraṇaṭṭhena vimutti, samādhi pamukhaṭṭhena vimutti, sati ādhipateyyaṭṭhena vimutti, paññā taduttaraṭṭhena vimutti, vimutti sāraṭṭhena vimutti, amatogadhaṁ nibbānaṁ pariyosānaṭṭhena vimutti.
ps2.5:19.2Evaṁ vimutti phalaṁ.
ps2.5:19.3Evaṁ virāgo maggo, vimutti phalanti.
ps2.5:19.4Virāgakathā niṭṭhitā.
ps2.5:19.5