巴利《小部》· 无碍解道

Paṭisambhidāmagga

2 Yuganaddhavagga

2.8. Lokuttarakathā

Katame dhammā lokuttarā?

Cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo, cattāro ariyamaggā, cattāri ca sāmaññaphalāni, nibbānañca—

ime dhammā lokuttarā.

<b>Lokuttarā</b>ti kenaṭṭhena lokuttarā?

Lokaṁ tarantīti—lokuttarā.

Lokā uttarantīti—lokuttarā.

Lokato uttarantīti—lokuttarā.

Lokamhā uttarantīti—lokuttarā.

Lokaṁ atikkamantīti—lokuttarā.

Lokaṁ samatikkamantīti—lokuttarā.

Lokaṁ samatikkantāti—lokuttarā.

Lokena atirekāti—lokuttarā.

Lokantaṁ tarantīti—lokuttarā.

Lokā nissarantīti—lokuttarā.

Lokato nissarantīti—lokuttarā.

Lokamhā nissarantīti—lokuttarā.

Lokā nissaṭāti—lokuttarā.

Lokena nissaṭāti—lokuttarā.

Lokamhā nissaṭāti—lokuttarā.

Loke na tiṭṭhantīti—lokuttarā.

Lokasmiṁ na tiṭṭhantīti—lokuttarā.

Loke na limpantīti—lokuttarā.

Lokena na limpantīti—lokuttarā.

Loke asaṁlittāti—lokuttarā.

Lokena asaṁlittāti—lokuttarā.

Loke anupalittāti—lokuttarā.

Lokena anupalittāti—lokuttarā.

Loke vippamuttāti—lokuttarā.

Lokena vippamuttāti—lokuttarā.

Lokā vippamuttāti—lokuttarā.

Lokato vippamuttāti—lokuttarā.

Lokamhā vippamuttāti—lokuttarā.

Loke visaññuttāti—lokuttarā.

Lokena visaññuttāti—lokuttarā.

Lokā visaññuttāti—lokuttarā.

Lokasmiṁ visaññuttāti—lokuttarā.

Lokato visaññuttāti—lokuttarā.

Lokamhā visaññuttāti—lokuttarā.

Lokā sujjhantīti—lokuttarā.

Lokato sujjhantīti—lokuttarā.

Lokamhā sujjhantīti—lokuttarā.

Lokā visujjhantīti—lokuttarā.

Lokato visujjhantīti—lokuttarā.

Lokamhā visujjhantīti—lokuttarā.

Lokā vuṭṭhahantīti—lokuttarā.

Lokato vuṭṭhahantīti—lokuttarā.

Lokamhā vuṭṭhahantīti—lokuttarā.

Lokā vivaṭṭantīti—lokuttarā.

Lokato vivaṭṭantīti—lokuttarā.

Lokamhā vivaṭṭantīti—lokuttarā.

Loke na sajjantīti—lokuttarā.

Loke na gayhantīti—lokuttarā.

Loke na bajjhantīti—lokuttarā.

Lokaṁ samucchindantīti—lokuttarā.

Lokaṁ samucchinnattāti—lokuttarā.

Lokaṁ paṭippassambhentīti—lokuttarā.

Lokaṁ paṭippassambhitattāti—lokuttarā.

Lokassa apathāti—lokuttarā.

Lokassa agatīti—lokuttarā.

Lokassa avisayāti—lokuttarā.

Lokassa asādhāraṇāti—lokuttarā.

Lokaṁ vamantīti—lokuttarā.

Lokaṁ na paccāvamantīti—lokuttarā.

Lokaṁ pajahantīti—lokuttarā.

Lokaṁ na upādiyantīti—lokuttarā.

Lokaṁ visinentīti—lokuttarā.

Lokaṁ na ussinentīti—lokuttarā.

Lokaṁ vidhūpentīti—lokuttarā.

Lokaṁ na sandhūpentīti—lokuttarā.

Lokaṁ samatikkamma abhibhuyya tiṭṭhantīti—lokuttarā.

Lokuttarakathā niṭṭhitā.