上座部律藏附随（巴利原文）

Parivāra

Aparagāthāsaṅgaṇika

12. Codanādipucchāvissajjanā

Codanā kimatthāya,

Sāraṇā kissa kāraṇā;

Saṅgho kimatthāya,

Matikammaṁ pana kissa kāraṇā.

Codanā sāraṇatthāya,

Niggahatthāya sāraṇā;

Saṅgho pariggahatthāya,

Matikammaṁ pana pāṭiyekkaṁ.

Mā kho turito abhaṇi,

mā kho caṇḍikato bhaṇi;

Mā kho paṭighaṁ janayi,

sace anuvijjako tuvaṁ.

Mā kho sahasā abhaṇi,

Kathaṁ viggāhikaṁ anatthasaṁhitaṁ;

Sutte vinaye anulome,

Paññatte anulomike.

Anuyogavattaṁ nisāmaya,

Kusalena buddhimatā kataṁ;

Suvuttaṁ sikkhāpadānulomikaṁ,

Gatiṁ na nāsento samparāyikaṁ;

Hitesī anuyuñjassu,

Kālenatthūpasaṁhitaṁ.

Cuditassa ca codakassa ca,

Sahasā vohāraṁ mā padhāresi;

Codako āha āpannoti,

Cuditako āha anāpannoti.

Ubho anukkhipanto,

Paṭiññānusandhitena kāraye;

Paṭiññā lajjīsu katā,

Alajjīsu evaṁ na vijjati;

Bahumpi alajjī bhāseyya,

Vattānusandhitena kāraye.

Alajjī kīdiso hoti,

Paṭiññā yassa na rūhati;

Etañca tāhaṁ pucchāmi,

Kīdiso vuccati alajjī puggalo.

Sañcicca āpattiṁ āpajjati,

Āpattiṁ parigūhati;

Agatigamanañca gacchati,

Ediso vuccati alajjīpuggalo.

Saccaṁ ahampi jānāmi,

Ediso vuccati alajjīpuggalo;

Aññañca tāhaṁ pucchāmi,

Kīdiso vuccati lajjīpuggalo.

Sañcicca āpattiṁ nāpajjati,

Āpattiṁ na parigūhati;

Agatigamanaṁ na gacchati,

Ediso vuccati lajjīpuggalo.

Saccaṁ ahampi jānāmi,

Ediso vuccati lajjīpuggalo;

Aññañca tāhaṁ pucchāmi,

Kīdiso vuccati adhammacodako.

Akālena codeti abhūtena,

Pharusena anatthasaṁhitena;

Dosantaro codeti no mettācitto,

Ediso vuccati adhammacodako.

Saccaṁ ahampi jānāmi,

Ediso vuccati adhammacodako;

Aññañca tāhaṁ pucchāmi,

Kīdiso vuccati dhammacodako.

Kālena codeti bhūtena,

Saṇhena atthasaṁhitena;

Mettācitto codeti no dosantaro,

Ediso vuccati dhammacodako.

Saccaṁ ahampi jānāmi,

Ediso vuccati dhammacodako;

Aññañca tāhaṁ pucchāmi,

Kīdiso vuccati bālacodako.

Pubbāparaṁ na jānāti,

Pubbāparassa akovido;

Anusandhivacanapathaṁ na jānāti,

Anusandhivacanapathassa akovido;

Ediso vuccati bālacodako.

Saccaṁ ahampi jānāmi,

Ediso vuccati bālacodako;

Aññañca tāhaṁ pucchāmi,

Kīdiso vuccati paṇḍitacodako.

Pubbāparampi jānāti,

Pubbāparassa kovido;

Anusandhivacanapathaṁ jānāti,

Anusandhivacanapathassa kovido;

Ediso vuccati paṇḍitacodako.

Saccaṁ ahampi jānāmi,

Ediso vuccati paṇḍitacodako;

Aññañca tāhaṁ pucchāmi,

Codanā kinti vuccati.

Sīlavipattiyā codeti,

atho ācāradiṭṭhiyā;

Ājīvenapi codeti,

codanā tena vuccatīti.

Aparaṁ gāthāsaṅgaṇikaṁ niṭṭhitaṁ.