上座部律藏附随（巴利原文）

Saṅghassa anumodanāya gaṇassa anumodanāya puggalassa atthārā saṅghassa atthataṁ hoti kathinaṁ, gaṇassa atthataṁ hoti kathinaṁ, puggalassa atthataṁ hoti kathinanti.

6. Palibodhapañhābyākaraṇa

Pakkamanantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Pakkamanantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Cīvarapalibodho paṭhamaṁ chijjati;

Tassa saha bahisīmagamanā,

Āvāsapalibodho chijjati.

Niṭṭhānantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Niṭṭhānantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Āvāsapalibodho paṭhamaṁ chijjati;

Cīvare niṭṭhite cīvarapalibodho chijjati.

Sanniṭṭhānantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Sanniṭṭhānantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Dve palibodhā apubbaṁ acarimaṁ chijjanti.

Nāsanantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Nāsanantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Āvāsapalibodho paṭhamaṁ chijjati;

Cīvare naṭṭhe cīvarapalibodho chijjati.

Savanantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Savanantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Cīvarapalibodho paṭhamaṁ chijjati;

Tassa saha savanena,

Āvāsapalibodho chijjati.

Āsāvacchediko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Āsāvacchediko kathinuddhāro,

Vutto ādiccabandhunā;

Etañca tāhaṁ vissajjissaṁ,

Āvāsapalibodho paṭhamaṁ chijjati;

Cīvarāsāya upacchinnāya cīvarapalibodho chijjati.

Sīmātikkamanantiko kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Sīmātikkamanantiko kathinuddhāro,

Vutto ādiccabandhunā;

Etañca tāhaṁ vissajjissaṁ,

Cīvarapalibodho paṭhamaṁ chijjati;

Tassa bahisīme āvāsapalibodho chijjati.

Sahubbhāro kathinuddhāro,

Vutto ādiccabandhunā;

Etañca tāhaṁ pucchāmi,

Katamo palibodho paṭhamaṁ chijjati.

Sahubbhāro kathinuddhāro,

Vutto ādiccabandhunā;

Etañca tāhaṁ vissajjissaṁ,

Dve palibodhā apubbaṁ acarimaṁ chijjantīti.

Kati kathinuddhārā saṅghādhīnā?

Kati kathinuddhārā puggalādhīnā?

Kati kathinuddhārā neva saṅghādhīnā na puggalādhīnā?

Eko kathinuddhāro saṅghādhīno—

antarubbhāro.

Cattāro kathinuddhārā puggalādhīnā—

pakkamanantiko, niṭṭhānantiko, sanniṭṭhānantiko, sīmātikkamanantiko.

Cattāro kathinuddhārā neva saṅghādhīnā na puggalādhīnā—

nāsanantiko, savanantiko, āsāvacchediko, sahubbhāro.

Kati kathinuddhārā antosīmāya uddhariyyanti?

Kati kathinuddhārā bahisīmāya uddhariyyanti?

Kati kathinuddhārā siyā antosīmāya uddhariyyanti siyā bahisīmāya uddhariyyanti?

Dve kathinuddhārā antosīmāya uddhariyyanti—

antarubbhāro, sahubbhāro.

Tayo kathinuddhārā bahisīmāya uddhariyyanti—

pakkamanantiko, savanantiko, sīmātikkamanantiko.

Cattāro kathinuddhārā siyā antosīmāya uddhariyyanti siyā bahisīmāya uddhariyyanti—

niṭṭhānantiko, sanniṭṭhānantiko, nāsanantiko, āsāvacchediko.

Kati kathinuddhārā ekuppādā ekanirodhā?

Kati kathinuddhārā ekuppādā nānānirodhā?

Dve kathinuddhārā ekuppādā ekanirodhā—

antarubbhāro, sahubbhāro.

Avasesā kathinuddhārā ekuppādā nānānirodhāti.

Kathinabhedo niṭṭhito.

Tassuddānaṁ

Kassa kinti pannarasa,

dhammā nidānahetu ca;

Paccayasaṅgahamūlā,

ādi ca atthārapuggalā.

Tiṇṇaṁ tayo jānitabbaṁ,

atthāraṁ uddesena ca;

Palibodhādhinā sīmāya,

uppādanirodhena cāti.