完整藏文原文 · 德格版页 当前仅加载第 93 函德格 102b 版页；藏文 NFD、目录标记与异常页序保留在来源切片中，重复版页行以稳定序号区分。
གདོན་གཏུམ་པོས་གདུག་པའི་དབུགས་བཏང་བས། །ཚ་བའི་ནད་ཀྱིས་ཉེན་ནས་འཆིར་ཉེ་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །རིམས་ནད་བསལ་ནས་ཚེ་ནི་རིང་བར་འགྱུར། །ཀླུ་གདོན་རྒྱུ་བས་གཙེས་ཏེ་སྐྲངས་པ་དང་། །ཤུ་འབྲས་མི་བཟད་
D691.093.0102b01.01རྣག་ཁྲག་འཛག་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ནས། །མཆིལ་མ་ལན་གསུམ་བྱུགས་པས་སྐྲངས་པ་ཞི། །སེམས་ཅན་རྟོག་པས་མི་དགེ་བསྐྱེད་པས་ན། །བྱད་སྟེམས་སྔགས་དང་དགྲས་ནི་གཙེས་པའི་ཚེ། །རྩེ་གཅིག་ཐུགས་རྗེ་ཆེན་པོའི་
D691.093.0102b02.01གཟུངས་བཟླས་ན། །སྟེམས་གནོད་དེ་ཀུན་གཏོང་བའི་མི་ལ་འདུ། །སྡིག་འཕེལ་སྙིགས་མས་དམ་ཆོས་འཇིག་པ་ན། །འདོད་པའི་མེ་ཆེན་སེམས་ནི་རྨོངས་ལོག་པས། །ཁྱོ་ཤུག་སོ་སོར་གཞན་ལ་འདོད་ཞེན་ནས། །ཉིན་མཚན་ལོག་བསམ་རྒྱུན་ནི་མི་འཆད་ཚེ། །
D691.093.0102b03.01གང་ཞིག་ཐུགས་རྗེ་ཆེན་པོའི་གཟུངས་བཟླས་ན། །འདོད་པའི་མེ་ཞི་ལོག་པའི་སེམས་བསལ་འགྱུར། །བདག་གིས་གཟུངས་འདིའི་མཐུ་སྟོབས་རྒྱས་བརྗོད་ན། །བསྐལ་པར་བརྗོད་ཀྱང་མཐར་ཐུག་ཡོང་མི་འགྱུར། །རིག་སྔགས་འདི་ལན་ལྔ་བཟླས་ཏེ་ཚོན་སྣ་ལྔའི་
D691.093.0102b04.01སྐུད་པ་ལ་མདུད་པ་ཉི་ཤུ་རྩ་བཞི་མདུད་ནས་མགུལ་དུ་གདགས་པར་བྱའོ། །གཟུངས་འདི་ནི་འདས་པའི་དེ་བཞིན་གཤེགས་པ་གང་གཱའི་ཀླུང་གི་བྱེ་བ་ཕྲག་དགུ་བཅུ་རྩ་དགུའི་བྱེ་མ་སྙེད་ཀྱིས་གསུངས་པ་ཡིན་ཏེ། དེ་བཞིན་གཤེགས་པ་དེ་དག་གིས་རྣལ་འབྱོར་པ་གང་དག་
D691.093.0102b05.01ཕ་རོལ་ཏུ་ཕྱིན་པ་དྲུག་མངོན་པར་བསྒྲུབ་པ་ཡོངས་སུ་མ་རྫོགས་པ་དག་ཡོངས་སུ་རྫོགས་པར་བྱ་བའི་ཕྱིར་དང་། བྱང་ཆུབ་ཏུ་སེམས་མ་བསྐྱེད་པ་དག་མྱུར་དུ་བྱང་ཆུབ་ཏུ་སེམས་བསྐྱེད་པར་བྱ་བའི་ཕྱིར་དང་། ཉན་ཐོས་ཀྱི་གང་ཟག་གང་དག་འབྲས་བུ་མངོན་དུ་མ་བྱས་པ་དེ་དག་མྱུར་དུ་མངོན་དུ་བྱ་བའི་ཕྱིར་
D691.093.0102b06.01སྟོང་གསུམ་གྱི་སྟོང་ཆེན་པའི་འཇིག་རྟེན་གྱི་ཁམས་ན་དྲང་སྲོང་གང་དག་བླ་ན་མེད་པའི་བྱང་ཆུབ་ཏུ་སེམས་མ་བསྐྱེད་པ་དག་མྱུར་དུ་སེམས་བསྐྱེད་པར་བྱ་བའི་ཕྱིར་དང་། སེམས་ཅན་གང་དག་ཐེག་པ་ཆེན་པོ་འདི་ལ་དད་པའི་དབང་པོ་མ་ཐོབ་པ་དག་གཟུངས་འདིའི་བྱིན་གྱི་རླབས་ཀྱི་
D691.093.0102b07.01