巴特那法句经

Patna Dharmapada

3. Brāhmaṇa

chinna sūtraṁ parākrāmma bhavaṁ praṇuda brāhmaṇa ।

saṁkhārāṇāṁ khayaṁ ñāttā akathaso si brāhmaṇa ।।

yamhi dhammaṁ vijāneyā vṛddhamhi daharamhi vā ।

sakkacca naṁ namasseyā aggihotraṁ va brāhmaṇo ।।

yamhi dhammaṁ vijāneyā sammasaṁbuddhadeśitaṁ ।

tam eva apacāyeyā aggihotraṁ va brāhmaṇo ।।

na jaṭāhi na gotreṇa na jāccā hoti brāhmaṇo ।

yo tu bāhati pāpāni aṇutthūlāni sabbaśo ।।

bāhanā eva pāpānāṁ brahmaṇo ti pravuccati ।

vārī pukkharapatte vā ārāgre-r-iva sāsavo ।।

yo na lippati kāmesu tam ahaṁ brūmi brāhmaṇaṁ ।

udayaṁ tapati ādicco ratrim ābhāti candramā ।।

sannaddho khattiyo tapati jhāyiṁ tapati brāhmaṇo ।।

atha sabbe ahorātte buddho tapati tejasā ।।

yassa pāram apāram vā pārāpāraṁ na vijjati ।

vītajjaraṁ visaṁyuttaṁ tam ahaṁ brūmi brāhmaṇaṁ ।।

yadā dayesu dhammesu pāragū hoti brāhmaṇo ।

athassa sabbe saṁyogā atthaṁ gacchanti jānato ।।

sa khu so khīṇasaṁyogo khīṇamānapunabbhavo ।

saṁghāvasevī dhammaṭṭho saṁghaṁ na upeti vedagū ।।

akakkaśiṁ vinnapaṇiṁ girāṁ saccam udīraye ।

tāya nābhiṣape kaṁci tam ahaṁ brūmi brāhmaṇaṁ ।।

asaṁsaṭṭhaṁ gṛhaṭṭhehi anagārehi cūbhayaṁ ।

anokasāriṁ appicchaṁ tam ahaṁ brūmi brāhmaṇaṁ ।।

yassa kāyena vācāya manasā nāsti dukkataṁ ।

saṁvṛtaṁ trisu ṭṭhāṇesu tam ahaṁ brūmi brāhmaṇaṁ ।।

mā brāhmaṇassa prahare nāssa mucceya brāhmaṇo ।

dhī brāhmaṇassa hantāraṁ ya ssa vā su na muccati ।।

mātaraṁ paṭhamaṁ hantā rājānaṁ do ca khattiye ।

rāṣṭaṁ sānucaraṁ hantā anigho carati brāhmaṇo ।।

gambhīrapraṁñaṁ medhāviṁ māggā ’māggassa kovidaṁ ।

uttamāttham anuprāttaṁ tam ahaṁ brūmi brāhmaṇaṁ ।।

jhāyiṁ virajam āsīnaṁ katakiccaṁ anāsavaṁ ।

uttamātthaṁ anuprāttaṁ tam ahaṁ brūmi brāhmaṇaṁ ।।

Brāhmaṇavarggaḥ