巴特那法句经

Patna Dharmapada

15. Āsava

appakātemanuṣyesu ye janāpāragāmino ।

athāyam itarā prajā tīram evānudhāvati ।।

ye ca kho saṁmadākkhāte dhamme dhaṁmānuvattino ।

te janā pāram ehiṁti maccudheyaṁ suduttaraṁ ।।

kihne dhamme viprahāya śukre bhāvetha paṇḍitā ।

okā anokam āgaṁma viveko yattha dūramaṁ ।।

tatthābhiratim eṣāṇā hettā kāme akiṁcanā ।

payirodametha āttānaṁ cittaṁ kileśehi sabbaśo ।।

yassa saṁbodhiaṁgehi samaṁ cittaṁ subhāvitaṁ ।

āttānapaṭinissagge anupādāya ye ratā ।

khīṇāsavā jutīmanto te loke parinivṛtā ।।

yad⟨a?⟩hi kiccaṁ tad apaviddhaṁ akiccaṁ puna kīrati ।

unnaddhānāṁ pramattānāṁ tesaṁ vaddhaṁti āsavā ।।

yesaṁ ca susamāraddhā niccaṁ kāyagatā satī ।

akiccaṁ te na sevaṁti kicce sātaccakāriṇo ।

satānāṁ samprajānānāṁ tesaṁ khīyaṁti āsavā ।।

paravajjānupaśśīnāṁ niccaṁ ojjhāyasaṁñinā ।

āsavā tesaṁ vaddhanti ārā te āsavakkhayā ।।

jāgarikām anuyuttānāṁ ahorāttānuśikkhiṇāṁ ।

nibbāṇe adhimuttānāṁ atthaṁ gacchaṁti āsavā ।।

yesā ’savā parikkhīṇā āhāre ca aniśśitā ।

śuṁñatā ānimitto ca vimogho yesa gocaro ।

ākāśe va śakuntānāṁ padaṁ tesaṁ durannayaṁ ।

na hi śīlavrateneva bāhuśoccena vā puna ।

atha vā samādhilābhena vivittaśayanena vā ।।

phusāma nekkhaṁmasukhaṁ apṛthujjanasevitaṁ ।

bhikkhū viśśāsamāpādi aprāpyāsavakkhayaṁ ।।

nāyaṁ pramajjituṁ kālo ’prāpyāsavakkhayaṁ ।

pramattaṁ dukham anneti sīhaṁ vā mṛgamātikā ।

gabbham eke okraṁmanti nirayaṁ pāpakaṁmuṇo ।

saggaṁ sugatino yānti parinivvānti anāsavā ।।

yathā hrado ’ssa gaṁbhīro viprasanno anāvilo ।

evaṁ dhaṁmāṇi śottāna viprasīdaṁti paṇḍitā ।।

yassa jitaṁ nā ’ppajjīyati jitam assā na upeti antako ।

taṁ buddham anomanikramaṁ apadaṁ kena padena nehisi ।।

yassa jālinī visattikā tahnā nāsti kahiṁ ci netaye ।

taṁ buddham anantagocaraṁ apadaṁ kena padena nehisi ।।

Āsavavarggaḥ