巴特那法句经

Patna Dharmapada

9. Tahna

manujassa pramattacāriṇo tahnāvaddhatimālutā iva ।

sā prāplavate hurāhuraṁ phalameṣī va vanamhi vānnaro ।।

yaṁ cesā sahate jaṁmī tahnā loke duraccayā ।

śokā tassa pravaddhaṁti ovaṭṭhā beruṇā iva ।।

yo cetāṁ sahate jaṁmiṁ tahnāṁ loke duraccayāṁ ।

śokā tassa vivaṭṭanti udabindū va pukkhare ।।

taṁ vo vademi bhadraṁ vo yāvaṁt-ittha samāgatā ।

tahnāṁ samūlāṁ khaṇatha uṣīrātthī va beruṇiṁ ।

tahnāya khatamūlāya nāsti śokā kato bhayaṁ ।।

tahnabitiyo puruṣo drīgham addhāna saṁsari ।

etthabhāvaṁñathābhāvaṁ tattha tattha punappuno ।।

etam ādīnavaṁ nyāttā tahnā dukkhassa saṁbhavaṁ ।

vītatahno anādāno sato bhikkhū parivraje ।।

na taṁ dṛḍhaṁ bandhanam āhu dhīrā yad āyasaṁ dārujaṁ babbajaṁ vā ।

sārattarattā maṇikuṇḍalesu putresu dāresu ca yā apekhā ।।

etaṁ dṛḍhaṁ bandhanam āhu dhīrā ohārimaṁ sukhumaṁ dupramuñcaṁ ।

etappi chettāna vrajanti santo anapekhino sabbadukhaṁ prahāya ।।

na kāhāpaṇavāsena ttrettī kāmesu vijjati ।

appāssādā dukhā kāmā iti viṁñāya paṇḍito ।।

api divvesu kāmesu ratiṁ so nādhigacchati ।।

tahnakkhayarato hoti saṁmasaṁbuddhasāvako ।।

vītatahno anādāno niruttīpadakovido ।

akkharāṇāṁ sannipātena ñāyyā pūrvvāparāṇi so ।

sa ve antimaśārīro mahāpraṁño ti vuccati ।।

saritāni sinehitāni ca somanassāni bhavanti jantuno ।

ye sātasitā sukheṣiṇo te ve jātijaropagā ।।

tahnāya purekkhaṭā prajā parisappanti śaśo va bādhito ।

te saṁjotanasaṅgasattā gabbham upenti punappuno ciraṁ pi ।।

muñca pure muñca pacchato majjhe muñca bhavassa pāragū ।

sabbattha vimuttamānaso na puno jātijarām upehisi ।।

yo nivvanadho vanā tu mutto vanamutto vanam eva dhāvati ।

taṁ puggalam etha paśśatha mutto bandhanam eva dhāvati ।।

ttriṇadoṣāṇi khettrāṇi rāgadoṣā ayaṁ prajā ।

tassā hi vītarāgesu dinnaṁ hoti mahapphalaṁ ।।

ttriṇadoṣāṇi khettrāṇi doṣadoṣā ayaṁ prajā ।

tassā hi vītadoṣesu dinnaṁ hoti mahapphalaṁ ।।

ttriṇadoṣāṇi khettrāṇi mohadoṣā ayaṁ prajā ।

tassā hi vītamohesu dinnaṁ hoti mahapphalaṁ ।।

ramaṇīyaṁ vatā ’raṇṇaṁ yamhiṁ na ramate jano ।

vītarāgāttha raṁsanti nāṁñe kāmagaveṣiṇo ।।

yathā pi mūle anupadrute dṛḍhe chinno pi rukkho punar-īva jāyati ।

em eva tahnānuśaye anūhate nivvattate dukkham idaṁ punappuno ।।

Tahnavarggaḥ